មន្ទីរប៉ង់តាហ្គោនថា បាល់ឡុងចិនមិនប្រមូលព័ត៌មានស៊ើបការណ៍ឡើយ
សហរដ្ឋអាមេរិក-ចិន ៖ មន្ទីរប៉ង់តាហ្គោនថ្លែងកាលពីថ្ងៃទី២៩មិថុនាថា បាល់ឡុងចិនដែលអាមេរិក
សហរដ្ឋអាមេរិក-ចិន ៖ មន្ទីរប៉ង់តាហ្គោនថ្លែងកាលពីថ្ងៃទី២៩មិថុនាថា បាល់ឡុងចិនដែលអាមេរិកបាញ់ទម្លាក់កាលពីខែកុម្ភៈ ពីលើមហាសមុទ្រអត្លង់ទិក ពុំបានប្រមូលព័ត៌មានស៊ើបការណ៍ឡើយពេលហោះពីលើដែនដីអាមេរិក។
អ្នកនាំពាក្យមន្ទីរប៉ង់តាហ្គោនលោកPAT RYDER អះអាងថា យើងវាយតម្លៃនាពេលនេះថា បាល់ឡុងនោះមិនបានប្រមូលព័ត៌មានស៊ើបការណ៍ឡើយ ពេលហោះកាត់ឬហោះពីលើដែនដីអាមេរិក។ លោកបន្តថាអាមេរិកចាត់វិធានការនានា ដើម្បីកម្រិតលទ្ធភាពស៊ើបការណ៍ដោយបាល់ឡុងនោះ។
លោកPAT RYDER មិនបានផ្ដល់ការបញ្ជាក់នានាទៀតឡើយ។ បាល់ឡុងនោះបានហោះកាត់សហរដ្ឋអាមេរិកពីលិចទៅកើត ពីអាឡាស្កាទៅរដ្ឋការ៉ូលីនខាងត្បូងពីដំណាច់ខែមករាមកដើមខែកុម្ភៈ និងហោះកាត់ពីលើបណ្ដាទីតាំងយោធាយុទ្ធសាស្ត្រផង។
បាល់ឡុងនោះត្រូវបានបាញ់ទម្លាក់កាលពីថ្ងៃទី៤កុម្ភៈពីលើមហាសមុទ្រអត្លង់ទិក ហើយបណ្ដាបំណែករបស់វាត្រូវបានកងទ័ពអាមេរិកប្រមូលយកមកសិក្សា។ ឧប្បត្តិហេតុនោះបណ្ដាលឲ្យមានភាពតានតឹងកាន់តែខ្លាំងបំផុត ក្នុងទំនាក់ទំនងរវាងប្រទេសទាំង២ ។
រដ្ឋមន្ត្រីការបរទេសអាមេរិកលោកអានតូនីប្លីនកេន បានលុបចោលភ្លាមៗទស្សនកិច្ចរបស់លោកនៅចិន។ ក្រុងវ៉ាស៊ីនតោនអះអាងកាលពីពេលមុនថា បាល់ឡុងនោះជាបាល់ឡុងចារកម្មតែក្រុងប៉េកាំងបានបដិសេធថា វាវង្វេងហោះចូលដោយអចេតនាក្នុងដែនអាកាសអាមេរិក ៕
ចែករំលែកព័តមាននេះ