ស្ត្រីជាជនជាតិចិនម្នាក់ ត្រូវកម្លាំងសមត្ថកិច្ចនគរបាលមន្ទីរប្រឆាំងបទល្មើសគ្រឿងញៀ.ន ធ្វើការឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ
រាជធានីភ្នំពេញ ៖ ស្ត្រីជាជនជាតិចិនម្នាក់ ត្រូវកម្លាំងសមត្ថកិច្ចនគរបាលមន្ទីរប្រឆាំងបទល្មើសគ្រឿងញៀ.ន ធ្វើការឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី២៩ ខែមិថុនា ឆ្នាំ២០២៣នេះ ពាក់ព័ន្ធករណីកែច្នៃ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀ.នប្រមាណជាង២៣គីឡូក្រាម និងសារធាតុគីមីផ្សំជាង១២០គីឡូក្រាម។
ជនសង្ស័យខាងលើនេះមានឈ្មោះ អ៊ូ ហ័រ ជិន (WU HUA ZHEN) ភេទស្រី អាយុ៤៣ឆ្នាំ ជាជនជាតិចិន។ ស្ត្រីជាជនសង្ស័យត្រូវបានសមត្ថកិច្ចដឹកតាមរថយន្តចូលទៅក្នុងបរិវេណសាលាដំបូងរាជធានីភ្នំពេញ ដោយឆ្លងកាត់ទ្វាររបង «ចេញបិទ ចូលបិទ» ដោយមិនអនុញ្ញាតិឲ្យអ្នកសារព័ត៌មានបានថតផ្តិតយករូបភាពជនសង្ស័យនោះទេ។ លុះពេលចូលទៅដល់ខាងក្នុងនោះទៀត សមត្ថកិច្ចក៏បាននាំយកខ្លួនជនសង្ស័យទៅដាក់ក្នុងបន្ទប់ជាន់ក្រោមដី ដើម្បីរង់ចាំការចាត់បញ្ជូនទៅតំណាងអយ្យការ ធ្វើការសាកសួរ។
ពាក់ព័ន្ធសំណុំរឿងស្ត្រីជនជាតិចិនជួញដូរគ្រឿងញៀ.នជាង២៣គីឡូក្រាម និងសារធាតុផ្សំជាង១២០គីឡូក្រាមខាងលើនេះ ត្រូវបានស្ថិតនៅលោក វង្ស សាវ៉ាត ព្រះរាជអាជ្ញារងនៃអយ្យការអមសាលដំបូងរាជធានីភ្នំពេញ បើកការស៊ើបសួរ។
សូមជម្រាបផងដែរថា ដោយអនុវត្តតាមបញ្ជានាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងនាយឧត្ដមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀ.ន និងក្រោមការបញ្ជាដឹកនាំផ្ទាល់ពីឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀ.ន នៅថ្ងៃទី២៧ ខែមិថុនា ឆ្នាំ២០២៣ កម្លាំងសមត្ថកិច្ចនគរបាលជំនាញការិយាល័យ (ក១០) នៃមន្ទីរប្រឆាំងគ្រឿងញៀ.ន ដឹកនាំដោយឧត្ដមសេនីយ៍ទោ សារី បុត្រសត្យា ឧត្តសេនីយ៍ត្រី យឹម សែនឧត្ដម្ភ នាយករងមន្ទីរប្រឆាំងគ្រឿងញៀ.ន និងវរសេនីយ៍ឯក តឹក សូនី នាយការិយាល័យ វរសេនីយ៍ត្រី ផៃ កុសល នាយរងការិយាលយ័ ដោយមានការសម្របសម្រួលពីលោក អុំ សុភ័ក្រ ព្រះរាជអជ្ញារងសាលាដំបូងរាជធានីភ្នំពេញ បានចុះបង្ក្រាបករណីកែច្នៃ និងជួញដូរដោយខុសច្បាប់នូវសារធាតុញៀ.ន ដែលប្រព្រឹត្ដនៅចំណុចខុនដូមួយកន្លែង ស្ថិតក្នុងសង្កាត់ទន្លេបាសាក់ ខណ្ឌចំកាមន រាជធានីភ្នំពេញ ដោយឃាត់ខ្លួនជនសង្ស័យជាស្ត្រីជនជាតិចិនម្នាក់។
ប្រតិបត្តិការខាងលើនោះ សមត្ថកិច្ចចាប់យកវត្ថុតាង រួមមាន ៖ ១- សារធាតុញៀ.ន ប្រភេទមេតំហ្វេតាមីន ចំនួន១៣២.៣៣ក្រាម, ២- សារធាតុញៀ.ន ប្រភេទកេតាមីន ចំនួន៩៨៤.២៩ ក្រាម, ៣- ថ្នាំប្រភេទ MDMA ២២៥៧០.៥ ក្រាម សរុបទាំងអស់សារធាតុញៀនមានទម្ងន់ ២៣ ៦៧៦.៦៧ ក្រាម (ជាង២៣គីឡូក្រាម)។ ចំណែកសារធាតុមិនច្បាស់ទម្ងន់ ១២២គីឡូ៩៣៤ក្រាម។
ក្រោយពេលឃាត់ខ្លួនជនសង្ស័យ រួមនឹងវត្ថុតាង ត្រូវបានសមត្ថកិច្ចកសាងសំណុំរឿង រួចបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ