ខេត្តកំពត៖ ឯកឧត្តមម៉ៅ ធនិន អភិបាលខេត្តកំពតបានមានប្រសាសន៍ប្រាប់ប្រជាពលរដ្ឋចំនួន៤ឃុំកាលពីព្រឹកថ្ងៃទី២៧ ខែមិថុនា នេះ នៅក្នុងបវេណវត្តដំណាក់កន្ទួត ឃុំដំណាក់កន្ទួត ស្រុកកំពង់ត្រាចថា លោកសុំចូលខ្លួនជាសមាជិកក្នុងគ្រួសារប្រជាពលរដ្ឋម្នាក់ទៀតមានន័យថា គ្រួសារនីមួយៗសុទ្ធតែមានទីអាងថា មានកូនជាអភិបាលខេត្តមួយដែរ ងាយស្រួលនិងរាយការណ៍ ។
បើមានមេភូមិ លោកមេឃុំ លោកស្មៀនឃុំ លោកមេប៉ុស្តិ៍ លោកភូមិបាល និងលោកចៅហ្វាយស្រុកបម្រើការមិនល្អជូនពុកម៉ែបងប្អូនទេ សុំឱ្យពុកម៉ែរាយការណ៍ទៅចៅហ្វាយខេត្តភ្លាម ។
លោកឯកឧត្តមអភិបាលខេត្តប្រាប់ប្រជាពលរដ្ឋថា រឿងអីត្រូវខ្លាចអស់លោកនៅខាងមូលដ្ឋាន ព្រោះបំរើការមិនបានល្អជូនពុកគាត់ គ្រាន់តែបោះត្រាលោកស្មៀនខ្លះយឺតយ៉ាវណាស់ ។ ឯកឧត្តម ម៉ៅ ធនិនអភិបាលខេត្តមានប្រសាសន៍ថា បើលោកមេឃុំ លោកមេភូមិ លោកមេស្រុក លោកភូមិបាល ធ្វើល្អជាមួយប្រជាពលរដ្ឋ ពិតជាបានទទួលរង្វាន់ពីអភិបាលខេត្ត ។
ប៉ុន្តែមិនមែនមន្ត្រីភូមិស្រុកអ្នកធ្វើលិខិតថា ខ្លួនល្អទេ ទាល់តែប្រជាពលរដ្ឋរាយការណ៍ថា មន្ត្រីទាំងអស់នោះល្អទើបលោកជឿ ។ ឯកឧត្តមម៉ៅ ធនិន អភិបាលខេត្តកំពត មានប្រសាសន៍ទៅកាន់ប្រជាពលរដ្ឋទទៀតថា សូមអោយពលរដ្ឋគ្រប់រូប យកបេះដូងសម្ដេចតេជោហ៊ុន សែន ដាក់ក្នុងបេះដូងរបស់ពុកម៉ែទៅទើបបានសុខសន្តិភាព ។
ព្រោះសម្ដេចតេជោ បានយកជីវិតមកប្ដូរយកសន្តិភាពជូនពុកម៉ែមកដល់សព្វថ្ងៃ ។ ឯកឧត្តមម៉ៅ ធនិនអភិបាលខេត្តកំពត មានប្រសាសន៍ថា យើងកុំចោទប្រជាពលរដ្ឋថា បក្សនេះបក្សនោះ គឺមានបក្សតែមួយគត់ គឺគណបក្សប្រជាជនតែមួយគត់ ។ ឯកឧត្តមអភិបាលខេត្តបានអំពាវវនាវដល់ប្រជាពលរដ្ឋទៅចូលរួមបោះឆ្នោតនៅថ្ងៃ២៣ ខែកក្កដា ខាងមុខអោយបានគ្រប់គ្នា ។
ចែករំលែកព័តមាននេះ