ទូរទស្សន៍ប៉ាគីស្ថាន EXPRESS រាយការណ៍ថា ក្រុមភេរវកម្មអាល់កៃដា បានអះអាងពីការស្លាប់របស់មេដឹកនាំរបស់គេអូសាម៉ា ប៊ីនឡាដេន ។
ទូរទស្សន៍ថ្លែងថា ក្រុមអាល់កៃដាបានអះអាងពីការស្លាប់របស់មេដឹកនាំក្រុមគេអូសាម៉ា ប៊ីនឡាដេន ក្នុងសេចក្តីប្រកាសមួយចេញផ្សាយតាមបណ្តាញអ៊ីនធើរណេតរបស់ពួកជីហាដ ។ ក៏ប៉ុន្តែ EXPRESS ពុំបានបញ្ជាក់ពីកាលបរិច្ឆេទនៃការចេញផ្សាយសេចក្តីប្រកាសនោះ ឬកាលបរិច្ឆេទ ឬពីមូលហេតុដែលនាំឱ្យប៊ីនឡាដេន ស្លាប់ឡើយ ។
ទោះបីជាមានការប្រកាសរបស់សហរដ្ឋអាមេរិកពីការស្លាប់របស់អូសាម៉ា ប៊ីនឡាដេន ក្នុងទីក្រុង ABBOTTABAD របស់ប៉ាគីស្ថានក្នុងប្រតិបត្តិការយោធាមួយកាលពីយប់ថ្ងៃទី១ មកទី២ ឧសភា របស់កងកម្លាំងពិសេសអាមេរិក ក៏ដោយ ក៏នៅមានការសង្ស័យទាំងឡាយចំពោះការស្លាប់របស់មេភេរវកម្មដែលគេតាមរកបំផុតនោះដែរ ពីព្រោះសហរដ្ឋអេមរិកបានសម្រេចមិនចេញផ្សាយរូបថតទាំងឡាយនៃសាកសពរបស់អូសាម៉ា ប៊ីឡាដេន ។ ប្រការដែលភាគីអាមេរិកបានប្រញាប់ប្រញាល់ទម្លាក់សាកសពរបស់ប៊ីនឡាដេន ទៅក្នុងទឹកសមុទ្រក៏ជាកត្តាមួយទៀតដែលបង្កើនការសង្ស័យជុំវិញការស្លាប់របស់ប៊ីនឡាដេនដែរ ។ ពលរដ្ឋប៉ាគីស្ថានជាច្រើនគិតថា ព័ត៌មានពីការស្លាប់របស់ប៊ីនឡាដេនគឺជាការឃោសនាមួយ ហើយបណ្តាម៉ាស៊ីនឃោសនាក្នុងស្រុករហូតដល់និយាយថា ប៊ីនឡាដេនស្លាប់បាត់តាំងពីយូរមកហើយទៀត
ផង ។
ចំណែកពួកតាលីបង់អាហ្វហ្គានីស្ថានវិញ ថ្លែងកាលពីថ្ងៃទី៧ ឧសភា ក្នុងសេចក្តីប្រកាសមួយថា ការស្លាប់របស់ប៊ីនឡាដេននឹងអាចប្រើដើម្បីពង្រឹងការប្តេជ្ញាចិត្តរបស់ពួកបះបោរនិងលើកទឹកចិត្តពួកគេឱ្យប្រយុទ្ធប្រឆាំងកាន់តែខ្លាំង ថែមទៀតលើកងកម្លាំងរបស់អាមេរិក និងកងកម្លាំងដទៃៗទៀតរបស់អូតង់ ។ សេចក្តីប្រកាសនេះបញ្ជាក់ថា អេមីរ៉ាត អ៊ិស្លាមជាឈ្មោះផ្តល់ឱ្យអាហ្វហ្គានីស្ថានដោយពួកតាលីបង់មានជំនឿជាក់ថា ទុក្ករកម្មរបស់ស៊ិកអូសាម៉ា ប៊ីនឡាដេននឹងផ្តល់នូវកម្លាំងជម្រុញថ្មីមួយដល់សង្គ្រាមសាសនាប្រឆាំងពួកឈ្លានពានលុកលុយក្នុងដំណាក់កាលដ៏គ្រោះថ្នាក់នេះរបស់ជីហាដ ។ ចលនាជីហាដ នឹងទទួលបានការពង្រឹងកម្លាំង ។ ដំណាក់កាលខាងមុខនឹងបង្ហាញច្បាស់ទាំងសម្រាប់បណ្តាមិត្តទាំងសម្រាប់ពួកសត្រូវ ប្រសិនបើនោះជាបំណងរបស់ព្រះជាម្ចាស់ ៕
ចែករំលែកព័តមាននេះ