ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនភ្លាមៗ ក្រោយពីប្រើកាំបិតប៉័ងតោកាប់ទៅលើពូរបស់ខ្លួន ពេលកំពុងផឹកស៊ីជាមួយគ្នាបណ្ដាលឲ្យរងរបួសធ្ងន់ កាលពីវេលាម៉ោង៧និង៣០នាទីយប់ថ្ងៃទី២៥ មិថុនា នៅភូមិឆាយរំពាត់ ឃុំកន្ទឺ២ ស្រុកបាណន់ ។ ជនសង្ស័យឈ្មោះ ឈាន ឆេង ប្រុសអាយុ៣១ឆ្នាំ (ក្មួយ) រីឯជនរងគ្រោះឈ្មោះ តែង វ៉ាន់ អាយុ៤៤ឆ្នាំ (ពូ) រស់នៅក្នុងភូមិ ឃុំខាងលើ។
បើតាមសមត្ថកិច្ចបានឲ្យដឹងថា អំពើហិង្សារវាងពូនិងក្មួយនេះផ្ដើមចេញពីការប៉ះទង្គិចពាក្យសម្តីគ្នា ពេលកំពុងផឹកស៊ីជាមួយគ្នា។ គេមិនទាន់ដឹងឲ្យជាលាក់ពីមូលហេតុ ដែលនាំឲ្យពូនិងក្មួយនេះកាប់ចាក់គ្នាក្នុងវង់ផឹកស៊ីនោះទេ ស្រាប់តែក្មួយទាញកាំបិតប៉័ងតោកាប់ទៅលើពូរហូតរបួសធ្ងន់បែបនេះ។ បើតាមសេចក្ដីរាយការណ៍បានបញ្ជាក់ថា ជនរងគ្រោះរបួស០២កន្លែង ត្រង់ថ្ងាស និង ថ្គាមរយះដល់ស្លឹកត្រចៀក។
យ៉ាងណាក្ដី កម្លាំងអធិការស្រុកបាណន់ បានឃាត់ខ្លួនជនដៃដល់ នាំទៅកាន់អធិការស្រុក ដើម្បីចាត់ការតាមនីតិវិធីហើយ ខណ:ជនរងគ្រោះ ដែលត្រូវក្មួយរបស់ខ្លួន កាប់ត្រូវ០២ប៉ាំងតោបណ្ដាលឲ្យរងរបួសធ្ងន់ ត្រូវបានក្រុមគ្រួសារបញ្ជូនទៅកាន់មន្ទីរពេទ្យភ្លាមៗដែរ។ នេះជាលទ្ធផលផឹកស៊ីក្លែមពាក្យសំដី ចុងក្រោយពូចូលពេទ្យ ក្មួយអាចចូលគុក ៕
ចែករំលែកព័តមាននេះ