កងកម្លាំងដែលមានភក្តីភាពចំពោះលោកមូអាម៉ា កាដាហ្វី កាលពីថ្ងៃទី៧ ឧសភា កន្លងមក បានបើកការវាយប្រហារប្រឆាំងកន្លែងស្តុកប្រេងដ៏សំខាន់នៅក្នុងទីក្រុងមីស្ត្រាតាបណ្តាលឱ្យធុងស្តុកប្រេងចំនួន៦រងការបំផ្លាញទាំងស្រុង ហើយបង្កឱ្យមានភ្លើងឆេះយ៉ាងសន្ធោសន្ធៅ ។ នេះបើតាមការឱ្យដឹងដោយអ្នកនាំពាក្យរបស់ពួកឧទ្ទាម។ ការវាយប្រហារប្រឆាំងកន្លែងស្តុកប្រេងនេះធ្វើឡើងដោយប្រើយន្តហោះទម្លាក់គ្រាប់បែកពីលើកន្លែងស្តុកប្រេងនេះតែម្តង ដែលជាការរំលោភបំពានតំបន់ហាមហោះហើរ ដែលដាក់អនុវត្តដោយក្រុមប្រឹក្សាសន្តិសុខ អ.ស.ប។
ទន្ទឹមនឹងនេះ នៅក្នុងទីក្រុងបេនហ្គាហ្ស៊ី ដែលកាន់កាប់ដោយពួកឧទ្ទាមក្រុមប្រឆាំងបានឯកភាពគ្នាបំពាក់អាវុធដល់ពួកឧទ្ទាម ។
អនុប្រធានក្រុមប្រឹក្សាបណ្តោះអាសន្នជាតិលីប៊ី លោក Abdul Hafiz Ghoga ថ្លែងថា តំណាងក្រុមប្រឆាំងបានធ្វើដំណើរទៅកាន់ប្រទេសអុីតាលីដើម្បីស្វះស្វែងរកការបញ្ចប់កិច្ចព្រមព្រៀងបំពាក់អាវុធដល់ពួកឧទ្ទាមនេះ ។
ពួកឧទ្ទាមលីប៊ីដែលមានបំណងយកឈ្នះលើកងកម្លាំងរបស់លោកកាដាហ្វី ដោយការវាយប្រហារតាមផ្លូវគោកដោយមិនចាំបាច់មានជំនួយពីកងទ័ពបរទេសនោះបានទទូចសុំឱ្យមានការបំពាក់អាវុធដល់ពួកគេ ខណៈពេលការប្រយុទ្ធគ្នាបានរីករាលដាលដល់ទីក្រុងនានា។
កន្លែងស្តុកប្រេងដែលរងការវាយប្រហារដោយកងកម្លាំងរបស់លោកកាដាហ្វីនោះមានចម្ងាយប្រហែល២គីឡូម៉ែត្រ ពីកំពង់ផែដ៏សំខាន់របស់ទីក្រុងមីស្ត្រាតា ។
ទីក្រុងកំពង់ផែមីស្ត្រាតានៅភាគខាងលិចលីប៊ីដែលកាន់កាប់ដោយពួកឧទ្ទាមជាកន្លែងកើតមានការប្រយុទ្ធគ្នារយៈពេលជាច្រើនសប្តាហ៍មកហើយ នៅពេលកងកម្លាំងរបស់លោកកាដាហ្វី ព្យាយាមដណ្តើមកាន់កាប់ទីក្រុងនេះ ៕
ចែករំលែកព័តមាននេះ