ក្រុម«បុកទូរ» នៅភ្នំពេញគេស្គាល់មុខអស់ហើយ ចេញទៅធ្វើសកម្មភាពតាមបណ្តាខេត្ត ត្រូវអស់លក្ខណ៍
- ឧត្តរមានជ័យ
ខេត្តឧត្តរមានជយ័ ៖ ចោរជើងចាស់ចំនួន៣នាក់ ជាមុខសញ្ញាលួច «បុកទូរ» ដែលនៅតាមទីផ្សារ
ខេត្តឧត្តរមានជយ័ ៖ ចោរជើងចាស់ចំនួន៣នាក់ ជាមុខសញ្ញាលួច «បុកទូរ» ដែលនៅតាមទីផ្សារតូចធំ និងទីប្រជុំជននានា ក្នុងទីក្រុងភ្នំពេញ ត្រូវបានអាជីវករ និងប្រជាពលរដ្ឋគេស្គាល់មុខអស់ ហើយ កាលពីព្រឹកថ្ងៃទី២៣ ខែមិថុនា ឆ្នាំ២០២៣ បានចេញទៅធ្វើសកម្មភាព«បុកទូរ» លួចលុយអាជីវករលក់ខោអាវនៅចំណុចតូបមុខផ្សារសំរោង ស្ថិតក្នុងភូមិសំរោង សង្កាត់សំរោង ក្រុងសំរោង ខេត្តឧត្តមានជ័យ ធ្វើឲ្យមានការភ្ញាក់ផ្អើលទាំងព្រឹក ។ តែទោះជាយ៉ាងណាក្តី ជនសង្ស័យមុខសញ្ញាលួចទាំង៣ នាក់នោះត្រូវបានសមត្តកិច្ចតាមប្រមាញ់ នឹងឃាត់ខ្លួនមកវិញផងដែរ ។
ជនសង្ស័យទាំង៣នាក់ខាងលើរួមមាន ១-ឈ្មោះ សេង ធី ភេទស្រី អាយុ៦៤ឆ្នាំ មានទីលំនៅភូមិស្រះចក សង្កាត់ស្រះចក ខណ្ឌដូនពេញ រាជធានីភ្នំពេញ (ជនដៃដល់) ២-ឈ្មោះ ហ៊ាន ណាក់ ភេទស្រី អាយុ៥៩ឆ្នាំ មានទីលំនៅភូមិអូរកណ្ដាល ឃុំព្រៃក្របៅស្រុកកងមាស ខេត្តកំពង់ចាម (អ្នកផ្សំគំនិត) និង៣-ឈ្មោះ វន វឿន ភេទប្រុស អាយុ៣៦ឆ្នាំ មានទីលំនៅភូមិសា លាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប (ជាអ្នកបើកម៉ូតូកង់បី) ។
តាមសេចក្តីរាយការឲ្យដឹងថា នៅព្រឹកថ្ងៃខែខាងលើជនរងគ្រោះឈ្មោះ ធ សុលាង ភេទស្រី អាយុ៣២ ឆ្នាំ មុខរបរ ជាអ្នកលក់ខោអាវនៅមុខផ្សារសំរោង បានទៅលក់ដូរដូចសព្វដង ស្រាប់តែមានជនសង្ស័យម្នាក់ បានដើរចូលទៅសួររកទិញខោអាវ ដោយបានរើសមើល និងទាញទម្លាក់ៗ រួចឲ្យជនរងគ្រោះវេចខ្ចប់មួយ ចំនួនហាក់ដូចធ្វើជាទិញ ។ លុះពេលជនរងគ្រោះកំពុងជាប់រវល់មមាញឹក ស្រាប់តែជនសង្ស័យបានឆ្លៀតឱកាសលួចយកលុយរបស់ជនរងគ្រោះ ដែលទុកនៅក្នុងថតតុចំនួន១០០ ដុល្លារអាមេរិក និងលុយខ្មែរចំនួន៤០ម៉ឺនរៀល រួចគេចខ្លួនឡើងជិះម៉ូតូកង់បី ដែលបក្ខពួកនៅចាំតាមផ្លូវ៦៨ចាស់ ទល់មុខធនាគារអម្រឹត ឆ្ពោះទៅទិសខេត្តសៀមរាប ធ្វើឲ្យមានការភ្ញាក់ផ្អើលទាំងព្រឹក ។
បន្ទាប់ពីបានដឹងថា ចោរលួចយកលុយនោះចេញផុតទៅ ជនរងគ្រោះបានទៅបណ្តឹងភ្លាម ទើបលោកអធិការនគរបាលក្រុងសំរោង បានដឹកនាំកម្លាំងជំនាញចុះទៅសហការជាមួយនគរបាលស្រុកក្រឡាញ់ ធ្វើការស្ទាក់ឃាត់ខ្លួនជនសង្ស័យទាំង ៣នាក់នៅតាមផ្លូវ រួចនាំទៅកាន់អធិការដ្ឋាននគរបាលក្រុងសំរោង វិញ ដើម្បីធ្វើកសាងសំណុំរឿងតាមទៅសាលាដំបូងខេត្តតាមនានីតិវិធី ៕
ចែករំលែកព័តមាននេះ