កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់ ក្រសួងមហាផ្ទៃ កាលពីថ្ងៃទី២០ ខែឧសភា ឆ្នាំ២០២៣ បានធ្វើការឃាត់ខ្លួនមុខសញ្ញាឆក់ទូរស័ព្ទដៃ និង
រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់ ក្រសួងមហាផ្ទៃ កាលពីថ្ងៃទី២០ ខែឧសភា ឆ្នាំ២០២៣ បានធ្វើការឃាត់ខ្លួនមុខសញ្ញាឆក់ទូរស័ព្ទដៃ និងខ្សែ.កម្នាក់ ក្នុងចំណោមបក្សពួក៤នាក់ រួចកសាងសំណុំរឿងបញ្ជូនទៅកាន់តុលាការ ។
ជនសង្ស័យខាងលើនេះ មានឈ្មោះ ហ៊ាន ភក្កី ភេទប្រុស អាយុ២៤ឆ្នាំ មុខរបរ និងស្នាក់នៅមិនពិតប្រាកដ ហើយគឺជាយុវជនបោះបង់ចោលការសក្សា និងដើរមិនចូលផ្ទះផងដែរ។
សូមរម្លឹកថា កាលពីរសៀលថ្ងៃទី២០ ខែឧសភា ឆ្នាំ២០២៣ ជនសង្ស័យរួមនឹងបក្សពួកម្នាក់ទៀតបានធ្វើសកម្មភាពឆក់ខ្សែ.កពីបុរសជនជាតិឥណ្ឌាម្នាក់ ខណៈកំពុងធ្វើដំណើរតាមបណ្តោយផ្លូវលេខ៣៧៦ ស្ថិតក្នុងភូមិ៨ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ បានសម្រេច រួចជនសង្ស័យក៏ជិះម៉ូតូរត់គេចខ្លួនបាត់។ ប៉ុន្តែពេលនោះត្រូវបានកម្លាំងល្បាតរបស់ការិយាល័យនគរបាលព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្ម ទណ្ឌក្រសួងមហាផ្ទៃ ដេញតាមប្រមាញ់ រហូតដល់មុខមន្ទីរពេទ្យព្រះកុសមៈ «ពេទ្យលោកសង្ឃ» ទើបឃាត់ខ្លួនមុខសញ្ញាឆក់ម្នាក់។
ក្រោយពេលឃាត់ខ្លួន ជនសង្ស័យបានសារភាពថា រូបគេមានបក្សពួកទាំងអស់ចំនួន៤នាក់ និងមានម៉ូតូសម្រាប់ជិះធ្វើសកម្មភាពចំនួន២គ្រឿង។ ជនសង្ស័យបន្តថា កន្លងមក ខ្លួនធ្លាប់ធ្វើសកម្មភាពឆក់ខ្សែ.ក និងទូរស័ព្ទដៃចំនួន២លើក ដោយលើកទី១ កាលពីវេលាម៉ោង៥នាទីទៀបភ្លឺ ថ្ងៃទី១៧ ខែមិថុនា ឆ្នាំ២០២៣ ពួកគេមានគ្នា៤នាក់ជិះម៉ូតូ២គ្រឿងធ្វើសកម្មភាពឆក់ទូរស័ព្ទដៃនៅតាមបណ្តោយផ្លូវ២១៧ ស្ថិតក្នុងសង្កាតវាលវង់ ខណ្ឌ៧មករា រាជធានីភ្នំពេញ ពីជនជាតិបរទេសម្នាក់កំពុងតែឈររង់ចាំរថយន្ដក្រុង តែមិនបានសម្រេច ។ ដោយឡែកលើកទី២ នៅថ្ងៃទី២០ ខែមិថុនា ពួកគេទាំង៤នាក់បានធ្វើសកម្មភាពឆក់ខ្សែ.កពីជនជាតិឥណ្ឌា ដែលកំពុងធ្វើដំណើរតាមផ្លូវនៅក្នុងខណ្ឌបឹងកេង រាជធានីភ្នំពេញ។
ក្រោយពេលកើតហេតុនោះ សមត្ថកិច្ចក៏ដេញតាមប្រមាញ់ រហូតចាប់ខ្លួនបានម្នាក់ គឺឈ្មោះ ហ៊ាន ភក្កី នេះ បន្ទាប់ពីចាប់ខ្លួន ជនសង្ស័យរូបនេះត្រូវបានកសាងសំណុំរឿង រួចបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ