ADផ្ទាំងផ្សព្វផ្សាយពាណិជ្ជកម្ម

អ្នកវិទ្យាសាស្ត្រ និងអ្នកជំនាញពន្យល់ហេតុការណ៍កើតឡើងចំពោះនាវាដែលផ្ទុះនៅបាតសមុទ្រ

2 ឆ្នាំ មុន

២៣ ខែ មិថុនា ឆ្នាំ ២០២៣ ម៉ោង ២០:៣០

បរទេស ៖ ក្រុមល្បាតដែនសមុទ្ររបស់អាមេរិកបានប្រកាសថានាវាមុជទឹកខ្នាតតូចឈ្មោះទីតាន (Titan) ដែលបាត់ដំណឹងកាលពីព្រឹកថ្ងៃអាទិត្យនោះ បានជួបនឹងឧបទ្ទវហេតុផ្ទុះបែកជាចម្រៀកដោយសារការទទួលរងសម្ពាធពីខាងក្រៅ (implosion)។ កាលនោះ, ទីតានដឹកមនុស្សសរុប ៥…

រហូតមកដល់ពេលនេះ, គេមិនទាន់ដឹងមូលហេតុលម្អិតពាក់ព័ន្ធនឹងហេតុការណ៍នេះទេ ព្រោះអ្វីៗស្ថិតនៅឯបាតសមុទ្រជម្រៅ ៣៨០០ ម៉ែត្ រ។ គេគ្រាន់តែដឹងថាទី ១- អ្នកទាំង ៥ បានស្លាប់អស់ហើយ, និងទី ២- តាមរយៈរូបភាពដែលបញ្ជូនដោយរ៉ូបូតដែលចុះទៅដល់កន្លែងកើតហេតុ, គេឃើញនាវាបែកជា ៥ ចម្រៀកធំៗចម្ងាយ ៤៤៨ ម៉ែត្រពីខ្មោចកប៉ាល់ថាយថានិច ។ នៅក្នុងនាទីនេះ យើងសូមនាំអារម្មណ៍ប្រិយមិត្តមកស្ដាប់ការវិភាគរបស់ក្រុមអ្នកបច្ចេកទេសដែលផ្ដល់សេចក្ដីពន្យល់ និងប៉ាន់ស្មានពីហេតុការណ៍ដែលបានកើតឡើងចំពោះនាវានោះ ។

ជនរងគ្រោះដែលស្លាប់នៅក្នុងហេតុការណ៍ផ្ទុះនាវា Titan នៅបាតមហាសមុទ្ទអាត្លង់ទិច

តើអ្វីទៅជាការផ្ទុះដោយសម្ពាធពីខាងក្រៅ (implosion)?
បើយោងតាមអ្នកឯកទេស និងអ្នករូបវិទ្យា, ការផ្ទុះដោយសម្ពាធពីខាងក្រៅកើតឡើងនៅពេលមានសម្ពាធសង្កត់កាន់តែខ្លាំងដល់កម្រិតស៊ូទ្រាំលែងបានទៅលើវត្ថុអ្វីមួយ ជាលក្ខណៈសង្កត់ផ្ទប់ ឬរុញផ្ទប់ ។ ចំណែកនៅខាងក្នុងវត្ថុនោះ ក៏ទទួលរងសម្ពាធផងដែរ ប៉ុន្តែរងសម្ពាធតិចជាងកម្លាំងសង្កត់ពីខាងក្រៅ ។ ករណីផ្ទុះនេះគ្រាន់តែជាហេតុការណ៍ ១ នៅក្នុងចំណោមស្រឡាយព្រឹត្តិការណ៍ដែលកើតឡើងចំពោះនាវាទីតាន នៅពេលនាវាមុជកាន់តែជ្រៅ និងទទួលរងសម្ពាធកាន់តែខ្លាំង ។

កម្លាំងទប់ទល់ពីខាងក្នុងមានកំណត់ ។ បើសម្ពាធពីខាងក្រៅខ្លាំងពេកហួសពីសមត្ថភាពទប់ទល់បាន នៅទីបញ្ចប់លទ្ធផលគឺមានតែការផ្ទុះបែកនាវានេះជាចម្រៀកៗតែប៉ុណ្ណោះ ។ ម៉្យាងទៀត ការផ្ទុះនេះគឺផ្ទះសាហាវតែម្ដង ព្រោះកម្លាំងរុញផ្ទប់មានសភាពខ្លាំងក្លាដល់កម្រិតខ្ពស់បំផុត ។ គេមិនអាចនឹងស្រមៃថាការផ្ទុះនោះមានទំហំកម្រិតណាទេ, ខណៈដែលនាវានេះផលិតពីសារធាតុដែលរឹងជាងដែកថែបទៅទៀត ។

ករណីផ្ទុះ ១ ទៀតគេហៅថាផ្ទុះដោយសារសម្ពាធពីខាងក្នុង (explosion) ។ ករណីនេះកើតឡើងនៅពេលសម្ពាធខាងក្នុងកាន់តែតឹងទៅៗដល់ដំណាក់កាលទប់លែងបាន ។ ឧទាហរណ៍ ដូចជាករណីផ្ទុះកង់ឡានដោយសារខ្យល់នៅក្នុងពោះវៀនឡានតឹងខ្លាំងដល់ដំណាក់កាលដែលពោះវៀន និងសម្បកកង់មិនអាចទប់ទល់តទៅទៀត ។ ករណីផ្ទុះប៉ឺតប៉ោងក៏ដូចគ្នា ។

ហេតុដូចម្ដេចបានជាគេសន្និដ្ឋានថានាវាទីតានផ្ទុះដោយសម្ពាធពីខាងក្រៅ ?
នាវាមុជទឹកប្រវែង ៦,៧ ម៉ែត្រឈ្មោះទីតាននេះផលិតរួមគ្នាដោយសាកលវិទ្យាល័យវ៉ាស៊ីនតោន និងអង្គការណាហ្សា (NASA) ដោយប្រើប្រាស់សរសៃកាបោន (carbon fiber) និងសារធាតុទីតានីញ៉ូម ដែលជាសារធាតុរឹងមាំខ្លាំង និងទប់ទល់នឹងកម្លាំងសង្កត់ខ្លាំង ។ នេះបើយោងតាមលោកស្តុកតុន រ៉ាស់ (Stockton Rush) ជាម្ចាស់នាវានេះផ្ទាល់ និងជាអ្នកដែលបានបើកនាវាដោយផ្ទាល់ដៃចុះទៅមើលខ្មោចកប៉ាល់ថាយថានិចលើកចុងក្រោយ ហើយបញ្ចប់ជីវិតនៅក្នុងពេលនោះតែម្ដង ។

នាវាទីតានធ្លាប់ចុះទៅមើលខ្មោចកប៉ាល់ថាយថា និចជាច្រើនដងហើយ ហើយពុំដែលមានបញ្ហាទេ ។ ដូច្នេះ លើកនេះអាចបណ្ដាលមកពីនាវារៀបចំលក្ខណៈសម្បត្តិមិនបានគ្រប់គ្រាន់ ឬអាចមកពីសម្ពាធទឹកសមុទ្ទមានសភាពខ្លាំងក្លាជាងរាល់ដង ។ បើមិនដូច្នេះទេ វាមិនអាចចាប់ហែកនាវាដែលផលិតពីសរសៃកាបោន និងទីតានីញ៉ូមឱ្យបែកជាចម្រៀកៗបានឡើយ ។ នៅក្នុងជម្រៅទឹកដែលនាវាទីតានចុះទៅដល់នោះ គេគិតថាសម្ពាធមានជិត ៤២១ គីឡូក្រាមនៅក្នុងធារទឹក ១ សង់ទីម៉ែត្រការ៉េ ។

លោកស្តុកតុន រ៉ាស់ (Stockton Rush) ជាម្ចាស់ប្រធានក្រុមហ៊ុន OceanGate Expedition ដែលបើកដំណើរការសេវាដឹកភ្ញៀវចុះទៅមើលខ្មោចកប៉ាល់ Titanic។ លោកជាអ្នកបើកនាវានេះដោយផ្ទាល់ដៃ ។

នាវានេះអាចទប់ទល់នឹងសម្ពាធទឹកសមុទ្ទជម្រៅ ៤ គីឡូម៉ែត្រ ។ ដូច្នេះ វាអាចមុជចុះទៅដល់ខ្មោចកប៉ាល់ថាយថា និចជម្រៅ៣ ៨០០ ម៉ែត្រដោយគ្មានបញ្ហា ។ ប៉ុន្តែនាវានេះពុំដែលទទួលបានអាជ្ញាប័ណ្ណពីអាជ្ញាធរត្រួតពិនិត្យគុណភាពរបស់នាវាម្ដងណាទេ ។ នេះបើយោងតាមលោកដេវីដ ឡូករីត (David Lochridge) ជាអតីតប្រធានផ្នែកប្រតិបត្តិការដែនសមុទ្ទរបស់ក្រុមហ៊ុនអូសេនហ្គេត អ៊ិចស្ពីឌីសឹន (OceanGate Expeditions) ។ លោកធ្លាប់ព្រមានតាំងពីឆ្នាំ ២០១៨ អំពីសុវត្ថិភាពនៃនាវាទីតាន និងធ្លាប់ដាក់ពាក្យប្ដឹងទៅតុលាការថែមទៀតផង។ ប៉ុន្តែនៅទីបញ្ចប់ លោកបែរជាត្រូវថ្នាក់លើបណ្ដេញចេញពីការងារ ៕

ប្រភព ៖ ND TV និងប្រភពដទៃទៀត
https://www.ndtv.com/world-news/titan-submersible-what-is-a-catastrophic-implosion-likely-cause-of-titan-subs-destruction-4145349
https://euro.eseuro.com/trends/518341.html