ធ្លាយរឿងមេគយខេត្តតាកែវនាំកម្លាំងចុះទៅវាស់ដីបឹងរបស់រដ្ឋ ! (វីដេអូ)
- តាកែវ
ថ្មីរហូតសំរាប់ខេត្តតាកែវ ដែលអស់ពីរឿងមួយចូលរឿងមួយ តែរឿងបែកធ្លាយថា មេគយខេត្តតាកែវ នាំកំលាំងជាង៥០នាក់មកវាស់ដីបឹងរបស់រដ្ឋ ស្ថិតនៅចំណុច
ខេត្តតាកែវ ៖ ថ្មីរហូតសំរាប់ខេត្តតាកែវ ដែលអស់ពីរឿងមួយចូលរឿងមួយ តែរឿងបែកធ្លាយថា មេគយខេត្តតាកែវ នាំកំលាំងជាង៥០នាក់មកវាស់ដីបឹងរបស់រដ្ឋ ស្ថិតនៅចំណុចភូមិចក សង្កាត់រការក្រៅ ក្រុងដូនកែវ ខេត្តតាកែវ ជារឿងថ្មីមិនធ្លាប់ជួប ។
យោងតាមប្រភពព័ត៌មានបានអោយដឹងថា កាលពីពេលថ្មីៗនេះ មានកំលាំងជាង៥០នាក់ ដឹកនាំដោយមន្ត្រីគយបានចុះមកវាស់វែងដីបឹងរបស់រដ្ឋនៅចំណុចខាងលើ ហើយការវាស់វែងនោះទៀតសោត ក្រុមខាងលើ បានវាស់ចំលំនៅឋានរបស់មន្ត្រីយោធាមួយគ្រួសារ ដែលពួកគាត់រស់នៅជិត៤០ឆ្នាំមកហើយបានកើតជាជម្លោះ ហើយក្រុមអ្នកវាស់វែងថា នឹងរុះរើលំនៅឋាននេះចោលទាំងបំពានច្បាប់ ។
មហាជនបានអោយដឹងទៀតថា ទំនងជាត្រូវដងត្រូវផ្លែគ្នា ជាមួយអាជ្ញាធរខេត្តតាកែវទាំងអស់ហើយមើលទៅ បានជាហ៊ានវាស់ដីបឹងរបស់រដ្ឋបាន របស់លោកស៊ុន ឆាយ ជាមេគយ និងរដ្ឋករខេត្តតាកែវ ។ មហាជនបានបន្តទៀតថា ដីបឹងរបស់រដ្ឋដែលលោកស៊ុន ឆាយ នាំកំលាំងចុះមកវាស់វែងបើគិតតម្លៃទីផ្សារបច្ចុប្បន្នមិនក្រោមលានដុល្លារនោះទេ ដូច្នេះបានជាអាជ្ញាធររៀងស្រក់ទឹកមាត់តក់ៗ ហើយផ្តួចផ្ដើមច្បាមយកតែម្ដងទៅ ។
ជុំវិញករណីខាងលើ កោះសន្តិភាពមិនអាចសុំការបំភ្លឺពីលោកស៊ុន ឆាយ ជាមេគយនិងរដ្ឋាករខេត្តតាកែវ បានទេ ដោយលោកមិនដែលលើកទទួលទូរស័ព្ទ ។ ចំណែកលោកនួន សុធា ប្រធានមន្ទីសុរិយោដី និងនគរូបនីយកម្ម និងសំណង់បានឱ្យដឹងដែរថា លោកពិតជាបានអោយមន្ត្រីរបស់លោកចុះទៅវាស់វែងមែន ដោយមានកាស្នើសុំពីលោកស៊ុន ឆាយ ជាមេគយខេត្តតាកែវ ។
លោកបានបន្តទៀតថា ចំពោះដីនៅចំណុចខាងលើ គឺពិតជាដីបឹងរបស់រដ្ឋ តែលោកគ្រាន់តែោ្យវាស់ទុកសិនទេ ។ ចំណែកវាស់ចំលំនៅឋានរបស់មន្ត្រីយោធា គឺលោកមិនបានឱ្យវាស់ប៉ះពាល់ទេ ហើយអារឿងមានជម្លោះ ឬគំរាមរុះរើលំនៅឋានចោល អ្នកណានិយាយត្រូវទទួលខុសត្រូវខ្លូនឯងតាមផ្លូវច្បាប់ទៅ ។
ប្រធានមន្ទីររូបនេះឆ្លើយមិនរួចទេ នៅពេលកោះសន្តិភាពសួរថា «តើលោកមានឯកសារស្នើសុំពីមេគយដែរឬទេ? ហើយលោកមេគយសម្អាងអង្គហេតុអ្វី បានជាលោកហ៊ានចាត់មន្ត្រីឱ្យចុះទៅវាស់ដីបឹងរបស់រដ្ឋ?
លោកប្រធានមន្ទីរខាងលើ មិនបានឆ្លើយនឹងសំណួររបស់កោះសន្តិភាពទេ តែលោកឱ្យកោះសន្តិភាពទៅសួរលោកស៊ុន ឆាយ ទៅ ។ លោកប្រធានមន្ទីរបានបន្តទៀតថា លោកគ្រាន់តែវាស់តាមលោកមេគយទេ អោយដឹងទិន្នន័យ តែទៅថ្ងៃខាងមុខទៀត មានរឿង ឬដីនេះបានទៅមេគយ ក៏លោកមិនដឹងដែរ ។
ខាងក្រោមនេះ ព័ត៌មានបន្ថែមពាក់ព័ន្ធ ករណីធ្លាយរឿងមេគយខេត្តតាកែវ នាំកម្លាំងចុះទៅវាស់ដីបឹងរបស់រដ្ឋ !
ព័ត៌មានបន្ថែម នឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ