ADផ្ទាំងផ្សព្វផ្សាយពាណិជ្ជកម្ម

Picture

លោកគ្រូ សាន សុជា ៖ ពាក្យថា«ហួសពេល» ប្រើតែទៅលើមនុស្សមិនស្គាល់តម្លៃពេលវេលា

9 ខែ មុន
  • ភ្នំពេញ

រាជធានី​ភ្នំពេញ ៖ មាន​មនុស្ស​ម្នា​ជា​ច្រើន​តែងតែ​ស្តាយក្រោយ​ជា​និច្ច នៅ​ពេល​ដែល​ពួក​គាត់​ជួប​រឿង​នឹក​ស្មាន​មិន​ដល់ ឬ​ក៏​ធ្វើ​អ្វីមួយ​ខុស​នោះ​នៅ​ក្នុង​ជីវិត ។ រហូត​មាន​ពាក្យចាស់​លោក​ពោល​ថា «​ពេលវេលា​ជា​មាសប្រាក់​» ហើយ​ពេលវេលា​មិន​រង់ចាំ​យើង​ឡើយ ។…

រាជធានី​ភ្នំពេញ ៖ មាន​មនុស្ស​ម្នា​ជា​ច្រើន​តែងតែ​ស្តាយក្រោយ​ជា​និច្ច នៅ​ពេល​ដែល​ពួក​គាត់​ជួប​រឿង​នឹក​ស្មាន​មិន​ដល់ ឬ​ក៏​ធ្វើ​អ្វីមួយ​ខុស​នោះ​នៅ​ក្នុង​ជីវិត ។ រហូត​មាន​ពាក្យចាស់​លោក​ពោល​ថា «​ពេលវេលា​ជា​មាសប្រាក់​» ហើយ​ពេលវេលា​មិន​រង់ចាំ​យើង​ឡើយ ។

ជាក់ស្តែង លោកគ្រូ សាន សុ​ជា បាន​បង្ហោះ​វី​ដេ​អូ​មួយ​ដែល​មាន​រយៈពេល​ជាង​៧​នាទី នា​ព្រឹក​ថ្ងៃ​ទី​២១ ខែមិថុនា​នេះ​ថា «​មិន​ចេះ​ហួសពេល ព្រោះ​អ្នក​នៅ​មាន​ថ្ងៃនេះ​» ដោយ​លោកគ្រូ បាន​បញ្ជាក់​ថា ៖ ហួសពេល​ត្រូវ​បាន​ប្រើ​តែ​ពេល​ទៅ​លើ​មនុស្ស​ដែល​មិន​ស្គាល់​តម្លៃនៃ​ពេលវេលា​ដែល​កំពុង​តែ​ប្រាកដ​ក្នុង​ពេល​នេះឯង ។ លោកគ្រូ សាន សុ​ជា បាន​បន្ត​ថា ដូច​ថ្ងៃមុន​ខ្ញុំ​បាន​បង្ហោះ​ពាក្យ​ថា បើ​ម្សិលមិញ​មានរឿង​រ៉ាវ​ធ្វើ​ឲ្យ​អ្នក​មិន​សប្បាយចិត្ត ចូរ​អ្នក​រីករាយ​ចំពោះ​អ្វី​ដែល​កំពុង​ប្រាកដ​ក្នុង​ពេល​បច្ចុប្បន្ន​នេះ ។

លោក​ម្ចាស់​គ្រូ សាន សុ​ជា បាន​បន្ថែម​ទៀត​ថា ពាក្យ​ថា រឿង​ទាំងឡាយ​ត្រូវ​បាន​ផ្សាំ​ផ្គុំ​ឡើង​ដោយ​ចិត្ត ដូច្នេះ​ទើប​ព្រះ​បរមគ្រូ ព្រះ​អង្គ​ទ្រង់ ប្រៀបធៀប​នូវ​ចិត្ត​ហ្នឹង ដូច​ជា​កល​មាយា​បូក​ផ្សំ​លិច កើត ជើង​ត្បូង​ទៅ​ជា​រឿង ។ តើ​អ្នក​ទាំងឡាយ​មាន​សង្កេត​ឃើញ​ទេ? មាន​យប់​ខ្លះ​ដែល​អ្នក​សម្រាន្ត​មិន​លក់ គេង​មិន​លក់ តើ​រូប​អ្នកជា​អ្នកធ្វើការ ឬ​ចិត្ត​អ្នកជា​អ្នកធ្វើការ ? គឺ​ចិត្តជា​អ្នកធ្វើការ វា​គិត​រឿង​នេះ រឿង​នោះ ហើយ​ចិត្ត​នោះ​មិនសូវ​នៅ​មួយ​ក្រ​វ៉​ល់​រាង​កាយ​យើង​នោះ​ទេ គឺ​វា​តែងតែ​ហោះហើរ​ទៅ​កាន់​អារម្មណ៍​ឆ្ងាយ​ៗ ។ ដូច្នេះ​ហើយ​ទើប​ព្រះ​បរមគ្រូ ទ្រង់​កំណត់​សញ្ញា​ផ្លូវ​របស់​ចិត្ត ដែល​យើង​ហៅ​ថា វិ​ថី​ចិត្ត​មាន​៦​ច្រក គឺ​ទ្វារ​ភ្នែក ទ្វារ​ត្រចៀក ទ្វារ​ច្រមុះ ទ្វារ​អណ្តាត ទ្វារ​កាយ និង​ទ្វារ​ចិត្ត ។ ហើយ​ទ្វារ​ទាំង​អស់នេះ មិន​នៅ​ទីណា ក្រៅពី​នៅ​ជាមួយ​អ្នក​ទាំងអស់​គ្នា​ទេ ។

ជាមួយ​គ្នា​នោះ​ដែរ លោកគ្រូ សាន សុ​ជា ក៏​បាន​បន្ត​ទៀត​ថា ឃើញ​ទេ ​ព្រះសម្មាសម្ពុទ្ធ​ទ្រង់​ត្រាស់​សំដែង​ធម៌​ៗ​ហ្នឹង គឺ​ធម៌​នៅ​ក្នុង​អ្នក​ទាំងអស់​គ្នា​ហ្នឹងឯង មិនមែន​ធម៌​នៅ​ក្នុង​ព្រះ​ត្រៃ​បិដក មិនមែន​ធម៌​នៅ​ទីណា​មួយ​នៃ​ពិភពលោក​នេះ ក្រៅពី​ធម៌​នៅ​ក្នុង​ខ្លួន​យើង​ទាំងអស់​គ្នា​នោះ​ទេ ។ ដូច្នេះ​ពាក្យ​ថា សិក្សា​ព្រះធម៌ ស្តាប់​ព្រះធម៌ ប្រ​តិ​បត្ត​ព្រះធម៌ គឺ​អនុវត្ត​សង្កេត​តាមដាន នូវ​អ្វី​ដែល​កំពុង​ប្រាកដ នៅ​ក្នុង​ខ្លួន​យើង​ម្នាក់​ៗ ។ ដូច្នេះ រឿង​ប្រសិនបើ​យើង​បណ្តោយ​ចិត្ត​ឲ្យ​គិត វា​មាន​ច្រើន​ប្រភេទ ច្រើន​រឿង ហើយ​ធំ​ៗ​ទៀត​ផង ​រហូត​ដល់​មានបងប្អូន​មួយ​ចំនួន​ទទួលយក​លែង​បាន គិត​ថា បើ​មិន​មានជីវិត​ប្រហែល​អាច​ជា​រួចខ្លួន​ពី​រឿង​ទាំង​អស់នោះ ។

លោកគ្រូ សាន សុជា ថា ប៉ុន្តែ​ឥឡូវ សាកល្បង​ទាញ​ចិត្ត​ទាញ​គំនិត​មក​មើល​ជុំវិញ​ខ្លួន​យើង​បន្តិច​មើល៎ ដូច​ជាខ្ញុំ​កំពុង​តែ​អង្គុយ​ក្នុង​បន្ទប់​នេះ ហើយ​ផ្តោត​ទៅ​លើ​កា​មេ​រា ឃើញ​ទេ នៅ​ពេល​ដែល​ខ្ញុំ​កំពុង​តែ​ផ្តោត​លើ​ការ​មេ​រា កំពុង​គិត​ទៅ​លើ​អ្វី​ដែល​ខ្ញុំ​ចង់​និយាយ​ទៅ​អ្នក​ទាំងឡាយ រឿង​ទាំងអស់​អត់​បាន​គ្រប​ចិត្ត​ខ្ញុំ​ទេ មិនមែន​ខ្ញុំ​អត់​រឿង​ទេ មាន ។ ប៉ុន្តែ​នៅ​ពេល​ដែល​ខ្ញុំ​ផ្តោត​ទៅ​លើ​កា​មេ​រា​នៅ​ពេល​នេះ អ្វី​ៗ​នៅ​ជុំវិញ​ខ្ញុំ​ពេល​នេះ ចិត្ត​នេះ​ត្រូវ​បាន​កាត់​បន្ថយ​ពី​រឿងរ៉ាវ​ដែល​ខ្ញុំ​អង្គុយ​គិត​មិ​ញ ។ អ៊ីចឹង​កាលណា​គិត​នៅ​ក្នុង​រឿង​នៅ​ជិត​ៗ​យើង​ហើយ​ជា​ពិសេស​ចំពោះ​អ្វី​ដែល​កំពុង​ប្រាកដ​នេះ​មាន​កម្លាំង​ជាង​ចិត្ត​ដែល​គិត​ប្រមើល៎​ស្រមៃ ។ ព្រោះ​ពេល​ដែល​ចិត្ត​គិត​ស្រមើល​ស្រមៃ ចិត្ត​មិន​បាន​ផ្តោត​ទៅ​លើ​រឿង​អ្វី​ឲ្យ​ច្បាស់លាស់​នោះ​ទេ ហើយ​វា​ចេះ​តែ​ហោះ​ទៅ វា​ចេះ​តែ​គិត​ទៅ​រហូត​ឲ្យ​យើង​មាន​អារម្មណ៍​ថា អស់កម្លាំង​នូវ​ពេល​ដែល​យើង​សម្រាន្ត ក៏​លក់​មិន​ស៊ប់ ស្រមើល​ស្រមៃ​រហូត​ដល់​ទៅ​យល់សប្តិ​ច្រើន ភ្ញាក់​ឡើង​ក៏​នៅ​តែ​អស់កម្លាំង ។

លើស​ពី​នេះ​ទៅ​ទៀត លោកគ្រូ សាន សុ​ជា​ក៏​បាន​បញ្ជាក់​ថា អ៊ីចឹង​បាន​មាគ៌ា​ព្រះ​បរមគ្រូ​ព្រះ​អង្គ​ទ្រង់​បង្រៀន គឺ​មិន​បង្រៀន​យើង​ហួសវិស័យ​ដែល​យើង​យក​មក​ប្រតិបត្តិ​ទេ ។ អ៊ីចឹង​អ្នក​ឡាយ​ដែល​ចង់​ដើរ​តាម​មាគ៌ា​ព្រះធម៌ គួរ​ជ្រើសរើស​មាគ៌ា​ព្រះធម៌​ដែល​អ្នក​ទាំងឡាយ ពិសោធន៍​បាន កុំ​ស្តាប់ធម៌​រវើរវាយ កុំ​ស្តាប់ធម៌​ដែល​មើល​មិនឃើញ ឬ​ក៏​ពិសោធន៍​មិន​បាន ។ ថ្វី​ត្បិត​តែ​ពាក់ព័ន្ធ​នឹង​មេរៀន​ខ្លះ​វា​ពាក់ព័ន្ធ​នឹង​ចិត្ត​ដែល​ជា​អច្ឆរិយ​ខ្លះ ប៉ុន្តែ​នោះ​មិនមែន​ជា​ចំណុច​ស្នូល​ដែល អ្នក​ត្រូវ​តែ​រត់​ទេ ។ ធម៌​ដែល​អ្នក​ឡាយ​ត្រូវ​ទៅ​រក គឺ​ធម៌​ដែល​កំពុង​ប្រាកដ​តាម​ភ្នែក តាម​ត្រចៀក តាម​ច្រមុះ តាម​អណ្តាត តាម​កាយ​យើង​ទាំងមូល​ហ្នឹង និង​ចិត្ត​ដែល​វា​កំពុង​គិត​ហ្នឹងឯង ។

ដូច្នេះ ពាក្យ​ថា ហួសពេល​មិន​មាន​ទេ សម្រាប់​អ្នក​ដែល​យល់​នូវ​សភាវៈ​ដែល​កំពុង​ប្រាកដ ដូច​ពាក្យ​ដែល​ព្រះ​បរមគ្រូ ព្រះ​អង្គ​ទ្រង់​ត្រាស់​ថា កិច្ច​ដែល​គួរ​ធ្វើ​ដុសខាត់​សម្អាតចិត្ត បុគ្គល​គួរតែ​ធ្វើ​ថ្ងៃ​នេះឯង ។ ហួសពេល បុគ្គល​ច្រើន​តែ​និយាយ​បូក​ពី​ពេល​មុន​មក បាន​ធ្វើ​អី​ៗ​ហើយ​ឥឡូវ​ហួសពេល តែ​តើ​យើង​មាន​ថ្ងៃនេះ​ឬ​អត់? កំពុង​ប្រាកដ​ថ្ងៃនេះ ឥឡូវនេះ​យើង​មាន​ឬ​អត់? មាន អ៊ីចឹង​យើង​ផ្ទៀងផ្ទាត់ ជាមួយ​ពាក្យ​ព្រះសម្មាសម្ពុទ្ធ អម្បាញ់មិញ​ថា កិច្ច​ដែល​គួរ​ធ្វើ​ដុសខាត់​សម្អាតចិត្ត ចម្រើន​បញ្ញា​ហ្នឹង បុគ្គល​គួរ​ធ្វើ​ក្នុងថ្ងៃនេះ​ឯង មិនមែន​ថ្ងៃ​ម្សិលមិញ​ទេ គឺ​ថ្ងៃ​នេះឯង មិនមែន​ថ្ងៃស្អែក​ទេ អ៊ីចឹង​ពាក្យ​នេះ​យើង​បញ្ជាក់​ថា អត់​ហួសពេល​ទេ ព្រោះ​យើង​មាន​ថ្ងៃនេះ ។

ទន្ទឹមនោះដែរ លោកគ្រូ សាន សុជា បានបន្ថែម ​ព្រះ​អង្គ​បញ្ជាក់​ទៀត​ថា នរណា​ហ្នឹង​ដឹង​ថា ស្លា​.​ប់​នូវ​ថ្ងៃស្អែក? យើង​ជា​មនុស្ស​សាមញ្ញ​ធម្មតា​ហ្នឹង​អត់​មាន​អភិញ្ញា យើង​អត់​មាន​ដឹង​ពី​អនាគត​បាន ប៉ុន្តែ​ស្អី​ដែល​យើង​ដឹង គឺ​យើង​ដឹង​កំពុង​តែ​មាន​ថ្ងៃ​នេះឯង អ៊ីចឹង​មិន​ថា​ពី​ម្សិលមិញ ខែ​មុន ឆ្នាំ​មុន យើង​ចំណាយពេល​អស់​ប៉ុន្មាន​ទេ ឲ្យ​តែ​យើង​មាន​ថ្ងៃនេះ គឺ​យើង​អាច​ចាប់ផ្តើម​ថ្ងៃនេះ គឺ​យើង​អាច​ធ្វើ​សេចក្តី​ល្អ​ថ្ងៃនេះ យើង​អាច​ចម្រើន​បញ្ញា​ថ្ងៃនេះ សូម​ឲ្យ​អ្នក​ទាំងឡាយ​មាន​ថ្ងៃនេះ​ជា​ថ្ងៃ​ល្អ ៕

អត្ថបទសរសេរ ដោយ

កែសម្រួលដោយ