សត្វគោចំនួន២ក្បាល ត្រូវរន្ទះបាញ់បណ្ដាលឲ្យដួលងា.ប់ភ្លាមៗនៅកណ្ដាលវាលស្រែ តែម្ចាស់ដែលដើរឃ្វាលបានរួចផុតជីវិត ខណៈផ្ទៃមេឃងងឹត និងភ្លៀងកំពុងតែរលឹមស្រិចៗ បង្កឱ្យមានការភ្ញាក់ផ្អើលកាលពី
ខេត្តបាត់ដំបង ៖ បើតាមសេចក្តីរាយការណ៍បានឱ្យដឹងថា សត្វគោចំនួន២ក្បាល ត្រូវរន្ទះបាញ់បណ្ដាលឲ្យដួលងា.ប់ភ្លាមៗនៅកណ្ដាលវាលស្រែ តែម្ចាស់ដែលដើរឃ្វាលបានរួចផុតជីវិត ខណៈផ្ទៃមេឃងងឹត និងភ្លៀងកំពុងតែរលឹមស្រិចៗ បង្កឱ្យមានការភ្ញាក់ផ្អើលកាលពីរសៀលថ្ងៃទី២០ ខែមិថុនា ឆ្នាំ២០២៣ នៅចំណុចវាលស្រែមួយកន្លែងខាងលិច ស្ថិតក្នុងភូមិសំរោង ឃុំស្នឹង ស្រុកបាណន់ ។
បើតាមសមត្ថកិច្ចបានប្រាប់ឱ្យដឹងថា ហេតុការណ៍ខាងលើនោះ បានកើតឡើងនៅពេលម្ចាស់គោឈ្មោះ រី ចិន្ដា ភេទប្រុស អាយុ៤៤ឆ្នាំ បានដេញគោរបស់គាត់យកទៅឃ្វាលនៅខាងលិចភូមិ ដែលជាទីកន្លែងអ្នកភូមិដទៃទៀតតែងតែដេញគោយកទៅឃ្វាលនៅទីនោះ។
បើតាមអ្នកភូមិក៏បាននិយាយដែរថា នៅមុនពេលកើតហេតុ មេឃហាក់ពុំមានភ្លៀងខ្លាំងនោះទេ ស្រាប់តែមានរន្ទះបាញ់យ៉ាងសាហា.វតែម្ដង។ អ្នកភូមិនិយាយបន្តថា ពេលនោះមេឃងងឹតខ្លាំង និងមានភ្លៀងធ្លាក់រលឹមតិចៗ តែគ្មានផ្គរ គ្មានខ្យល់នោះទេ ប៉ុន្តែនៅសុខៗស្រាប់តែមានរន្ទះបាញ់ក្ដាំងតែម្ដង។
ចំណែកអ្នកឃើញហេតុការណ៍ខាងលើបាននិយាយថា ដំបូងគេឃើញមានផ្លេកបន្ទោរ ស្រាប់សំឡេងស្នូររន្ទះបានលាន់កក្រើកព្រមគ្នា រីឯសត្វគោពីរក្បាលដែលកំពុងស៊ីស្មៅនៅកណ្ដាលវាលស្រែនោះ ក៏ដួលព្រមៗគ្នាតែម្ដង ប៉ុន្តែម្ចាស់គោពុំមានគ្រោះថ្នាក់ ដោយសារបាតុភូតរន្ទះបាញ់នេះទេ។
ទោះបីជាយ៉ាងណាក៏ដោយ នេះគឺជាបាតុភូតធម្មជាតិ ដែលកើតឡើងដោយគេពុំបានដឹងជាមុខឡើយ ដូច្នេះប្រជាពលរដ្ឋដែលនៅតាមស្រែចម្ការ គួរតែមានការប្រុងប្រយ័ត្នខ្ពស់នៅពេលមានអាកាសធាតុមិនល្អ៕
ចែករំលែកព័តមាននេះ