បុរសម្នាក់ត្រូវកម្លាំងមូលដ្ឋាន ធ្វើការស្រាវជ្រាវ រហូតឃាត់ខ្លួនបាន កាលពីរសៀលថ្ងៃទី២០ ខែមិថុនា ឆ្នាំ២០២៣ ស្ថិតក្នុងភូមិទូលស្វាយ ឃុំមុខរាហ៍ ស្រុករុក្ខគិរី ក្រោយពីបុរសរូបនេះលួចមេគោគេមួយក្បាលបានតែមួយថ្ងៃក៏ត្រូវ
ខេត្តបាត់ដំបង ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវកម្លាំងមូលដ្ឋាន ធ្វើការស្រាវជ្រាវ រហូតឃាត់ខ្លួនបាន កាលពីរសៀលថ្ងៃទី២០ ខែមិថុនា ឆ្នាំ២០២៣ ស្ថិតក្នុងភូមិទូលស្វាយ ឃុំមុខរាហ៍ ស្រុករុក្ខគិរី ក្រោយពីបុរសរូបនេះលួចមេគោគេមួយក្បាលបានតែមួយថ្ងៃក៏ត្រូវអស់លក្ខណ៍ ខណៈពេលម្ចាស់បានចងគោឲ្យស៊ីស្មៅនៅខាងក្រោយផ្ទះ។
សេចក្ដីរាយការណ៍បានបន្តថា ជនសសង្ស័យខាងលើនេះ មានឈ្មោះ ខ្លឹង ចាន់ អាយុ២៣ឆ្នាំ រស់នៅភូមិទូលស្វាយ ឃុំមុខរាហ៍ ស្រុករុក្ខគិរី។ ជននេះត្រូវកម្លាំងនគរបាលប៉ុស្ដិ៍រដ្ឋបាល ឃុំមុខរាហ៍ និងឃុំស្ដុកប្រវឹក ធ្វើការស្រាវជ្រាវឃាត់ខ្លួនបានជាមួយនឹងមេគោមួយក្បាល ដែលជននេះលួចពីម្ចាស់គោឈ្មោះ សុខ សែ ភេទប្រុស អាយុ៤៣ឆ្នាំ រស់នៅភូមិព្រះអណ្ដូង ឃុំស្ដុកប្រវឹក ស្រុករុក្ខគិរី។
បើតាមរឿងហេតុនៃបទល្មើសខាងលើនេះ ជនសង្ស័យឈ្មោះ ខ្លឹង ចាន់ នេះ បានធ្វើសកម្មភាពលួចមេគោមួយក្បាលរបស់ឈ្មោះ សុខ សែ ខណៈពេលគាត់ចងគោឲ្យស៊ីស្មៅនៅវាលស្រែខាងក្រោយផ្ទះ កាលពីព្រឹកថ្ងៃទី១៩ ខែមិថុនា ឆ្នាំ២០២៣ នៅចំណុចភូមិព្រះអណ្ដូង ឃុំស្ដុកប្រវឹក។
ប្រភពព័ត៌មានដដែលបានឲ្យដឹងថា សកម្មភាពរបស់ជនសង្ស័យដែលលួចមេគោគេនោះ ត្រូវបានគេប្រទះឃើញ ទើបគេរាយការណ៍ប្រាប់សមត្ថកិច្ច រហូតត្រូវសមត្ថកិច្ចស្រាវជ្រាវចាប់ខ្លួនបានទាំងមនុស្ស និងដកហូតបានទាំងមេគោយកទៅប្រគល់ជូនម្ចាស់វិញ។
បើតាមមន្ត្រីមូលដ្ឋានបានឲ្យដឹងថា ជនសង្ស័យខាងលើនេះ បានសារភាពទទួលស្គាល់នូវទង្វើល្មើសច្បាប់របស់ខ្លួន នៅពេលសមត្ថកិច្ចនាំខ្លួនយកមកសួរនាំអំពីរឿងនេះ។ ក្រោយបញ្ចប់ការសួរនាំ មេគោក៏ត្រូវបានប្រគល់ជូនម្ចាស់វិញ រីឯជនសង្ស័យត្រូវកសាងសំណុំរឿងចាត់ការតាមនីតិវិធីច្បាប់ហើយ៕
ចែករំលែកព័តមាននេះ