ខេត្តក្រចេះ ៖ មន្ត្រីនគរបាលនៃអធិការដ្ឋានស្រុកស្នួល កំពុងតែកសាងសំណុំរឿងគ្រោះថ្នាក់ចរាចរណ៍ដែលបង្កឱ្យមនុស្សរងរបួសធ្ងន់ និងស្រាល ហើយរថយន្តបានរងការខូចខាតអស់ជាច្រើនគ្រឿង រីឯជនបង្កដែលអះអាងថាជាក្រុមអ្នកកាសែតនោះ បានរត់គេចខ្លួនបាត់។ រហូតមកទល់នឹងពេលនេះមានរយះពេលមួយសប្តាហ៍ហើយ
ខេត្តក្រចេះ ៖ មន្ត្រីនគរបាលនៃអធិការដ្ឋានស្រុកស្នួល កំពុងតែកសាងសំណុំរឿងគ្រោះថ្នាក់ចរាចរណ៍ដែលបង្កឱ្យមនុស្សរងរបួសធ្ងន់ និងស្រាល ហើយរថយន្តបានរងការខូចខាតអស់ជាច្រើនគ្រឿង រីឯជនបង្កដែលអះអាងថាជាក្រុមអ្នកកាសែតនោះ បានរត់គេចខ្លួនបាត់។ រហូតមកទល់នឹងពេលនេះមានរយះពេលមួយសប្តាហ៍ហើយ ដែលនគរបាលនៃអធិការដ្ឋានស្រុកស្នួល បាននិងកំពុងកសាងសំណុំរឿងបញ្ជូនទៅកាន់សាលាដំបូងខេត្ត និងស្វែងរកចាប់ខ្លួនជនបង្កដែលអាចជាអ្នកកាសែតជជុះដែលបានធ្វើសកម្មភាពដេញប៉ផាប់ចាប់ពភីងទៅលើរថយន្តដឹកជន្លុងម្រេច បណ្តាលឱ្យជួបគ្រោះថ្នាក់ចរាចរណ៍លើដងផ្លូវជាតិ ខូចខាតទ្រព្យសម្បត្តិអ្នកដទៃ និងរងរបួសមនុស្សផងដែរ។
គួររំលឹកថា កាលពីវេលាម៉ោង១១និង៥០នាទីយប់ ថ្ងៃទី៣០ មេសា កន្លងទៅថ្មីៗនេះ នៅលើផ្លូវជាតិលេខ៧ ចំណុចទួលថ្មពួក ភូមិឃ្សឹមក្រៅ ឃុំឃ្សឹម ស្រុកស្នួល មានករណីគ្រោះថ្នាក់ចរាចរណ៍មួយដែលបង្កឡើងដោយរថយន្តម៉ាកកាមរីពណ៌ទឹកសមុទ្រ ពាក់ស្លាកលេខភ្នំពេញ 2M-0392 បើកបរដោយឈ្មោះយ៉ាន បរិសុទ្ធ ភេទប្រុស ដែលអះអាងថាខ្លួនជាចាងហ្វាងសារព័ត៌មានវិមានឯករាជ្យបានធ្វើសកម្មភាពបើករថយន្តដេញស្ទាក់រថយន្តទួរីសដឹកជន្លុងម្រេច ពាក់ស្លាកលេខភ្នំពេញ 2L-0967 ពណ៌ខៀវ បើកបរដោយឈ្មោះធី កាណាល់ ភេទប្រុស អាយុ១៨ឆ្នាំ បណ្តាលឲ្យរថយន្តធ្លាក់ជង្ហុកក្រឡាប់ជាច្រើនត្រឡប់ ហើយអ្នកបើកបររងរបួសជាទម្ងន់។
តាមប្រភពព័ត៌មានពីកន្លែងកើតហេតុបានឲ្យដឹងថា នៅយប់ថ្ងៃកើតហេតុរថយន្តទួរីសមួយគ្រឿងនេះមានដឹកឈើជន្លុងម្រេចជាច្រើនដើមចេញពីចំណុចភូមិឃ្សឹម ហើយរថយន្តក្រុមជនដែលអះអាងថាជាអ្នកកាសែតមានគ្នាច្រើននាក់ដែលចតជាបណ្តុំកុងត្រូលជជុះនៅចំណុចទួលពន្លឺ ឃុំឃ្សឹម ស្រុកស្នួល មានចំនួនបីគ្រឿង បានបើកដេញតាមស្ទាក់ទារលុយពីរថយន្តដឹកជន្លុងម្រេចនោះ ។ លុះមកដល់ចំណុចកើតហេតុខាងលើក៏បានកៀររថយន្តទួរីសដឹកជន្លុងម្រេចនេះធ្លាក់ចូលជង្ហុកផ្លូវក្រឡាប់ជាច្រើនត្រឡប់ បណ្តាលឲ្យបុរសជាអ្នកបើករថយន្តរងរបួសធ្ងន់សន្លប់នៅនឹងកន្លែង។ រីឯរថយន្តក្រុមជនដែលអះអាងថាជាអ្នកកាសែតទាំងបីគ្រឿង មួយគ្រឿង ម៉ាកកាមរីពណ៌ទឹកសមុទ្រគូទស្វិត ពាក់ស្លាកលេខភ្នំពេញ 2M-0392 បើកបរដោយឈ្មោះយ៉ាន បរិសុទ្ធ បានជ្រុលទៅបុករថយន្តម៉ាកកាមរីឆ្លាម ពណ៌ប្រផេះ របស់ឈ្មោះនូ សុផល ខណៈពេលម្ចាស់រថយន្តនោះកំពុងតែឈរពិនិត្យមើលរថយន្តខូចរបស់ខ្លួននៅចិញ្ចើមផ្លូវ បណ្តាលឲ្យរងរបួសធ្ងន់សន្លប់នៅនឹងកន្លែង។ ឯរថយន្តមួយគ្រឿងទៀតបានរេចង្កូតទៅបុកម៉ូតូអ្នកធ្វើដំណើរ បណ្តាលឲ្យអ្នកបើកម៉ូតូនោះរងរបួសដូចគ្នា។
បន្ទាប់ពីបង្កហេតុរួច រថយន្តក្រុមជនដែលគេស្គាល់តាមការអះអាងថា ជាក្រុមអ្នកកាសែតជជុះមានចំនួនពីរគ្រឿងទៀតបានបើករត់គេចខ្លួនបាត់ តែទោះបីជាយ៉ាងណាក៏សមត្ថកិច្ចកំពុងតែតាមស្រាវជ្រាវផងដែរ។ លោកម៉ែន ប៊ុនធឿន អធិការរងស្តីទីនៃអធិការដ្ឋាននគរបាលស្រុកស្នួល បានមានប្រសាសន៍ឲ្យដឹងកាលពីថ្ងៃទី៦ ឧសភា ថា បន្ទាប់ពីធ្វើការវាស់វែងនៅកន្លែងកើតហេតុរួចសម្ភារ និងរថយន្តទាំងអស់ត្រូវបានយកមករក្សាទុកនៅក្នុងអធិការដ្ឋាន ។ ដោយឡែកក្រុមជនបង្កដែលបាននាំគ្នារត់គេចខ្លួនបន្ទាប់ពីបង្កគ្រោះថ្នាក់នៅតាមដងផ្លូវនោះ ក៏ត្រូវបានសមត្ថកិច្ចជំនាញកសាងសំណុំរឿងបញ្ជូនទៅសាលាដំបូង ខេត្ត ដើម្បីសុំដីកានាំខ្លួនមកវិនិច្ឆ័យទោស ទោះបីជាពេលនេះពួកគេបានរត់គេចខ្លួនបាត់ទៅហើយក្តី ៕
ចែករំលែកព័តមាននេះ