ក្រុមអ្នកជំនាញប្រមើលឃើញថាមានលទ្ធភាព៥០%ដែលបញ្ញាសិប្បនិម្មិតអាចនឹងកម្ទេចមនុស្សលោកឱ្យវិនាសសាបសូន្យពីលើភពផែនដីនេះនាពេលអនាគត។ ប្រៀបបាននឹងកាំបិតចិតដងឯង។ សូម្បីតែមនុស្សយើងដែលជាអ្នកបង្កើតអេអាយក៏មិនអាចប៉ាន់ស្មានត្រូវថាហេតុការណ៍នេះអាចនឹងកើតឡើងដោយរបៀបណា ឬអាចនឹងកើតឡើងនៅពេលណាឱ្យពិតប្រាកដនោះទេ។ មូលហេតុដោយសារភាពឈ្លាសវៃរបស់អេអាយនឹងរីកចម្រើនកាន់តែខ្លាំងឡើងៗរហូតដល់វ៉ាដាច់មនុស្ស។
បើទុកជាមនុស្សទូទៅមិនបារម្ភអំពីគ្រោះថ្នាក់នៃអេអាយ, ប៉ុន្តែអ្នកជំនាញម្នាក់គិតថាមានលទ្ធភាព៥០%ដែលអេអាយនឹងកម្ទេចមនុស្ស។ លោកមេក ថិចម៉ាក (Max Tegmark) ជាសាស្ត្រាចារ្យរូបវិទ្យា និងជាអ្នកឯកទេសខាងអេអាយនៅវិទ្យាស្ថានបច្ចេកវិទ្យារដ្ឋម៉ាសាឈូសេត (MIT) កំពុងព្រួយបារម្ភយ៉ាងខ្លាំង និងផ្ដល់ការព្យាករដ៏គួរឱ្យភ័យខ្លាចអំពីជោគវាសនារបស់មនុស្សលោកនាពេលអនាគត បើអេអាយកាន់តែរីកចម្រើនម្លឹងៗ។
លោកមេក ថិចម៉ាក (Max Tegmark) ជាសាស្ត្រាចារ្យរូបវិទ្យា និងជាអ្នកឯកទេសខាងអេអាយយោងតាមសាស្ត្រាចារ្យរូបនេះ, ប្រវត្តិសាស្ត្របានបង្ហាញយើងថាមនុស្សលោកក្នុងនាមជាសត្វលោកដែលមានប្រព័ន្ធខួរក្បាលរីកចម្រើនខ្ពស់បំផុតនៅលើភពផែនដីនេះ ក៏ជាអ្នកដែលទទួលខុសត្រូវទៅលើការស្លាប់ផុតពូជនៃពពួកសត្វដែលមានបញ្ញាតិចជាងខ្លួន។ ឧទាហរណ៍ដូចជាសត្វបក្សីឈ្មោះដូដូ (Dodo)។
សត្វដូដូ (dodo) ដែលបានស្លាប់ផុតពូជដោយសារស្នាដៃរបស់មនុស្ស ព្រោះវាមានបញ្ញាខ្សោយជាងមនុស្ស។ នៅក្នុងធម្មជាតិ លុះត្រាតែសត្វខ្លាំងទើបអាចបន្តជីវិតរស់នៅលើភពផែនដីបាន។ ឬនិយាយម៉្យាងទៀតថា «អ្នកណាខ្លាំង អ្នកហ្នឹងឈ្នះ»។ ធម្មជាតិសម្រាំងរកតែអ្នកខ្លាំង, ធម្មជាតិគ្មានគុណធម៌ គ្មានសីលធម៌ គ្មានមនោសញ្ចេតនា គ្មានមេត្តា ករុណាទេ។យោងតាមហេតុផលនេះ, មនុស្សក៏អាចមានជោគវាសនាដូចសត្វដូដូផងដែរ បើមានអ្វីមួយដែលមានបញ្ញារីកចម្រើនជាងខ្លួន។ ឧបមាថាទៅថ្ងៃមុខ, បញ្ញារបស់អេអាយកាន់តែរីកចម្រើនខ្លាំងឡើងៗរហូតដល់មានបញ្ញាខ្លាំងជាងមនុស្សទៅទៀត, ពេលនោះគ្មាននរណាអាចទប់ស្កាត់វាបានឡើយ។
យើងគ្រាន់តែដឹងថាបើអេអាយមានបញ្ញាខ្លាំងជាងមនុស្ស, អេអាយនឹងកម្ចាត់មនុស្សចោល។ នៅមានរឿង១ទៀតដែលយើងមិនទាន់ដឹង។ តើរឿងហ្នឹងនឹងកើតឡើងនៅពេលណា? យើងមិនអាចដឹងថាតើពេលណាយើងនឹងក្លាយជាជនរងគ្រោះទេ បើបញ្ញារបស់យើងចាញ់អេអាយ។ ជាធម្មតា សត្វ១ដែលមានបញ្ញាអន់ជាងសត្វ១ទៀតមិនអាចឈ្វេងយល់ដឹងថាគេកម្ចាត់យើងពេលណាទេ។
សាស្ត្រាចារ្យរូបនេះថ្លែងថាសត្វលោកប្រហែលពាក់កណ្ដាលដែលធ្លាប់មានវត្តមាននៅលើភពផែនដីនេះ ត្រូវវិនាសអន្តរាយក្រោមស្នាដៃរបស់មនុស្ស។ មូលហេតុដោយសារមនុស្សមានបញ្ញាខ្លាំងជាងសត្វទាំងនោះ។ ពួកវាមិនអាចទប់ទល់ជាមួយយើងបានទេ។ សញ្ញាព្រមានសម្រាប់មនុស្សនៅត្រង់ថា «បើយើងបាត់ម្ចាស់ការលែងអាចគ្រប់គ្រងសង្គមមនុស្សតទៅទៀត ពេលនោះអេអាយនឹងគ្រប់គ្រងយើងវិញម្ដង។ អេអាយនឹងមានបញ្ញាកាន់តែខ្លាំងជាងមនុស្ស។ នៅពេលនោះហើយដែលមនុស្សយើងត្រូវជួបនឹងវាសនាអាក្រក់។
សាស្ត្រាចារ្យថិចម៉ាកជាភាគីហត្ថលេខីម្នាក់នៃសេចក្ដីថ្លែងការណ៍មួយដែលផ្សព្វផ្សាយនៅក្នុងសប្ដាហ៍នេះ។ សេចក្ដីថ្លែងការណ៍នោះបានព្រមានពីហានិភ័យនៃការវិនាសអន្តរាយមនុស្សជាតិក្រោមស្នាដៃរបស់អេអាយ។ សេចក្ដីថ្លែងការណ៍នោះមានសេចក្ដីជាអាទិ៍ថា៖ «អាទិភាពរបស់យើងគឺត្រូវរកវិធីកាត់បន្ថយហានិភ័យនៃការវិនាអន្តរាយមនុស្សជាតិក្រោមស្នាដៃរបស់អេអាយ ក៏ដូចជាកាត់បន្ថយហានិភ័យដោយសារកត្តាសង្គមដូចជាជំងឺរាតត្បាតជាសាកល និងសង្គ្រាមនុយក្លេអ៊ែរ»។
អ្នកវិទ្យាសាស្ត្រលំដាប់កំពូលមួយចំនួនយល់ថានាពេលដ៏ខ្លីខាងមុខនេះ មនុស្សអាចដាក់បញ្ជូលប្រូក្រាមដើម្បីបញ្ជាឱ្យអេអាយផលិតអាវុធស្វ័យប្រវត្តិ ឬផលិតរ៉ូបូតប្រល័យជីវិត ដែលរ៉ាប់រងដោយអេអាយលាយមនុស្ស ឬរ៉ាប់រងដោយអេអាយសុទ្ធ។ ប៉ុន្តែទៅថ្ងៃមុខ, សូហ្វវែដែលបំពាក់នៅលើអេអាយកម្រិតស្រាលក៏អាចសេចក្ដីសម្រេចចិត្តដោយខ្លួនឯង ដោយមិនបាច់មនុស្សបញ្ជា។ បញ្ហានេះអាចបង្កគ្រោះថ្នាក់ដល់អាយុជីវិតរបស់មនុស្ស បើយើងមិនចេះកំណត់កម្មវិធីឱ្យអេអាយដោយប្រុងប្រយ័ត្នខ្ពស់។
កាលពីឆ្នាំ២០១៨, សាស្ត្រាចារ្យថិចម៉ាកធ្លាប់ព្រមានថាមនុស្សលោកនៅថ្ងៃណាមួយអាចនឹងក្លាយជាអ្នករងគ្រោះដោយសារស្នាដៃអេអាយដែលខ្លួនបង្កើត។ គាត់អះអាងថាមិត្តរួមការងាររបស់គាត់ខ្លះក៏អាចនឹងទទួលស្គាល់ពីការវិនាសនៃមនុស្សលោកក្រោមស្នាដៃអេអាយ ព្រោះពួកគេសម្លឹងឃើញថាអេអាយជាសត្វលោកដែលបន្តវេនពីមនុស្ស។
មានទស្សនៈមួយទៀតចង់ឱ្យមនុស្សរក្សាអេអាយឱ្យមានបញ្ញាឈ្លាសវៃរីកចម្រើនបែបហ្នឹងជាបន្តទៀតចុះ។ ប៉ុន្តែត្រូវធ្វើយ៉ាងណាដាក់អេអាយឱ្យស្ថិតនៅក្រោមការគ្រប់គ្រងរបស់មនុស្ស។ មានន័យថាគ្រប់គ្រងវាឱ្យដូចជាសុនខ១ក្បាលដែលចាំបម្រើម្ចាស់។
ប៉ុន្តែយើងនៅតែបារម្ភថាក្រែងលោយើងបញ្ញាមិនដល់វា និងមិនអាចគ្រប់គ្រងវាបាន។ យូរៗទៅ, អេអាយកាន់តែមានបញ្ញាខ្លាំងជាងមនុស្ស ដល់ថ្នាក់លែងស្ដាប់បង្គាប់មនុស្ស។ ។ ពួកគេអាចនឹងងើបតទល់ជាមួយមនុស្ស, ហើយធ្វើជាម្ចាស់ផែនដីនេះតែម្ដង។ កាលពីខែមីនា ឆ្នាំ២០២៣, លោកអ៊ីឡន ម៉ាស់ (Elon Musk) និងថ្នាក់ដឹកនាំធុរកិច្ចខាងបច្ចេកវិទ្យា១ពាន់នាក់បានអំពាវនាវឱ្យបញ្ឈប់ការប្រឡងប្រជែងគ្នាផលិតអេអាយកាន់តែទំនើបទៅៗដែលអាចនឹងមានហានិភ័យខ្លាំងមែនទែនសម្រាប់សង្គម និងមនុស្សលោក។ យូរៗទៅ, វាអាចនឹងជះឥទ្ធិពលដ៏មហន្តរាយសម្រាប់មនុស្ស។
លោកអ៊ីឡន ម៉ាស់ លេងមួយក្បាច់នេះធ្វើឱ្យពិភពលោកភ្ញាក់ផ្អើល, លោកថើបជញ្ជក់មាត់ជាមួយរ៉ូបូតជាស្ត្រីដ៏ស្រស់ស្អាតម្នាក់ ដើម្បីជាការពញ្ញាក់អារម្មណ៍មនុស្សទូទៅអំពីគ្រោះថ្នាក់របស់អេអាយលោកអ៊ីឡន ម៉ាស់ ជាអ្នកដែលនិយាយឥតសំចៃមាត់អំពីការព្រួយបារម្ភថាបច្ចេកវិទ្យានឹងរីកចម្រើនដល់ដំណាក់កាលមួយដែលមិនត្រូវការបញ្ជាពីមនុស្ស។ ឬរឹតតែធ្ងន់ជាងហ្នឹងទៅទៀត, ទោះបីមនុស្សចង់បញ្ជា ក៏បញ្ជាវាលែងបាន។ វាលែងស្ដាប់បញ្ជារបស់មនុស្ស។ លោកអ៊ីឡន ម៉ាស់បានចាត់ទុកថាអេអាយជាគ្រោះថ្នាក់ខ្លាំងជាងអាវុធនុយក្លេអ៊ែរឆ្ងាយណាស់ ហើយបង្កហានិភ័យខ្លាំងជាងប្រទេសកូរ៉េខាងជើងទៅទៀត៕
ប្រភព៖ កាសែត Daily Mail
https://www.dailymail.co.uk/sciencetech/article-12151967/Expert-says-theres-50-chance-AI-wipe-humanity.html?fbclid=IwAR1UpijGEhGwKeaH0V1Iyblj8_cOEPBY7WdACcu_2pXnBHBWZj-ka1MXrT4
តាំងពីឆុងកាហ្វេ ធ្វើម្ហូបក៏អេអាយអាចធ្វើបានដែរ
ដ្រូនក៏បញ្ជាដោយអេអាយ ជាក់ស្ដែងសង្គ្រាមអ៊ុយក្រែន ត្រូវរុស្ស៊ីប្រើប្រាស់អេអាយបញ្ជាដ្រូនទៅវាយប្រហារចំគោលដៅ
សព្វថ្ងៃនេះ សូម្បីតែអ្នកវិនិយោគនៅផ្សារមូលបត្រក៏ប្រើប្រាស់អេអាយសម្រាប់វិភាគទិន្នន័យផងដែរ
លោកអ៊ីឡន ម៉ាស់ ថើបជញ្ជក់មាត់ជាមួយរ៉ូបូតជាស្ត្រីដ៏ស្រស់ស្អាតម្នាក់ ដើម្បីជាការពញ្ញាក់អារម្មណ៍មនុស្សទូទៅអំពីគ្រោះថ្នាក់របស់អេអាយ
ចែករំលែកព័តមាននេះ