ពិធីបុណ្យឡើងអ្នកតា «មេ ស» នៅស្រុកបាភ្នំ រយៈពេល ៣ថ្ងៃ ដើម្បីសុំសេចក្តីសុខ និងទឹកភ្លៀង ពលរដ្ឋមកចូលរួមយ៉ាងច្រើនកុះករ
- ព្រៃវែង
ខេត្តព្រៃវែង ៖ ប្រជាពលរដ្ឋយ៉ាងច្រើនកុះករ មកពីគ្រប់ទិសទី បានចូលរួមទស្សនា និងកម្សាន្តសប្បាយក្នុងពិធីបុណ្យឡើងអ្នកតា «មេ ស» ដែលជាពិធីបុណ្យទំនៀមទម្លាប់ប្រពៃណីដ៏ធំប្រចាំឆ្នាំ ស្ថិតនៅរមណីយដ្ឋានវប្បធម៌ប្រវត្តិសាស្ត្រនគរភ្នំ ក្នុងស្រុកបាភ្នំ ខេត្តព្រៃវែង ដែលបានធ្វើឡើងរយៈពេល 3 យប់ 3 ថ្ងៃ គឺចាប់ពីថ្ងៃទី 29 ដល់ថ្ងៃទី 31 ឧសភា។
លោក ម៉ននី បណ្ឌិត អភិបាលស្រុកបាភ្នំ បានមានប្រសាសន៍ថា ការប្រារព្ធពិធីឡើងអ្នកតា មេ ស នេះធ្វើឡើងតាមជំនឿរបស់ប្រជាពលរដ្ឋស្រុកបាភ្នំ ដើម្បីរំដល់គុណអ្នកតា មេ ស ដែលតែងតែផ្ដល់សេចក្តីសុខ សេចក្តីចម្រើន ដល់ប្រជាពលរដ្ឋនៅក្នុងស្រុកបាភ្នំនេះផង និងសុំទឹកភ្លៀងដើម្បីបង្កបង្កើនផលស្រូវនារដូវវស្សា និងដំណាំផ្សេងៗផងដែរ ឲ្យទទួលបាននៅទិន្នផលខ្ពស់ មិនមានសត្វល្អិតមកបៀតបៀនយាយី ដែលធ្វើឲ្យជីវភាពរបស់គាត់កាន់តែមានភាពរីកចម្រើន ពីមួយឆ្នាំទៅមួយឆ្នាំ។
លោក អភិបាលស្រុក បានបន្ថែមទៀតថាពិធីបុណ្យឡើងអ្នកតា មេ ស នេះក្រៅពីបង្កើតនូវភាពសប្បាយរីករាយជូនដល់បងប្អូនប្រជាពលរដ្ឋហើយនោះ ក៏បានបង្កើននូវប្រាក់ចំណូលដល់ប្រជាពលរដ្ឋក្នុងស្រុកបាភ្នំ បានច្រើនផងដែរ តាមរយៈការលក់ដូរនំចំណីម្ហូបអាហារ និងទំនិញផ្សេងៗនៅក្នុងកម្មវិធីនេះ។
លោកអភិបាលស្រុក បន្តបញ្ជាក់ថា ក្នុងកម្មវិធីរយៈពេល 3 ថ្ងៃនេះ អាជ្ញាធរមូលដ្ឋាន និងកងកម្លាំងមានសមត្ថកិច្ចស្រុកបាភ្នំ ក៏បានយកចិត្តទុកដាក់ខ្ពស់ក្នុងការសម្របសម្រួលចរាចរណ៍ ការពារសន្តិសុខ និងសណ្តាប់ធ្នាប់ ជូនដល់បងប្អូនប្រជាពលរដ្ឋ ធ្វើឱ្យកម្មវិធីទាំងមូលប្រព្រឹត្តទៅដោយរលូន គ្មានបាតុភាពអសកម្មណាមួយកើតឡើងឡើយ។
គួរំលឹកផងដែរថា ពិធីបុណ្យឡើងអ្នកតាមេ ស មិនត្រឹមតែជាការគោរពចំពោះវត្ថុស័ក្តិសិទ្ធិថែរក្សាទឹកដីប៉ុណ្ណោះទេ ប៉ុន្តែវាក៏ជាការរួមចំណែកយ៉ាងសំខាន់ក្នុងការថែរក្សា អភិរក្សវប្បធម៌អរូបីរបស់ខ្មែរ និងការលើកកម្ពស់វិស័យទេសចរណ៍ក្នុងខេត្តព្រៃវែងផងដែរ៕
ចែករំលែកព័តមាននេះ