រាជធានីភ្នំពេញ ៖ ក្នុងស្មារតីលើកកម្ពស់ផលិតផលក្នុងស្រុក រោងចក្រ អឹម ឡែប (Mlab) ដែលជាសហគ្រាសជារបស់កូនខ្មែរ ១០០% បានលេចរូបរាងឡើងនៅលើទឹកដីខ្មែរ ជាមួយការប្ដេជ្ញាចិត្តផលិតទំនិញមានគុណភាពខ្ពស់ ក្រោមម៉ាកយីហោខ្មែរពិតៗ ស្របពេលដែលប្រជាពលរដ្ឋកំពុងមានចរន្តពហិការមិនប្រើប្រាស់ផលិតផលនាំចូលពីប្រទេសជិតខាងដែលឈ្លានពានប្រទេសកម្ពុជា ។
នៅក្នុងដំណើរទស្សនកិច្ចមកកាន់រោងចក្រផ្ទាល់កាលពីថ្ងៃទី ២៩ ខែឧសភា ឆ្នាំ ២០២៦ មកនេះ លោកឧកញ៉ា សឹង ចាតវិជ្ជា ស្ថាបនិកសហគ្រាស អឹម ឡែប និងជាស្ថាបនិកក្រុមហ៊ុន ម៉ូរៀ បានមានប្រសាសន៍ឱ្យដឹងថា រោងចក្រនេះបានចាប់ផ្ដើមដំណើរការតាំងពីដើមឆ្នាំ ២០២៦ នេះ ។ លោកឧកញ៉ាបានសង្កត់ធ្ងន់ថា ៖ «ការបង្កើតរោងចក្រនេះ គឺកើតចេញពីការឈឺចាប់ និងការឆ្លើយតបភ្លាមៗទៅនឹងការរំលោភបំពានពីប្រទេសជិតខាង (ថៃ) ។ យើងចង់បង្ហាញថា កូនខ្មែរក៏អាចផលិតផលិតផលដែលមានស្តង់ដារខ្ពស់ និងគិតគូរពីសុវត្ថិភាពអ្នកប្រើប្រាស់ជាចម្បងបានដែរ» ។
លោកឧកញ៉ា ឱ្យដឹងទៀតថា បច្ចុប្បន្ន រោងចក្រ អឹម ឡែប ដែលស្ថិតក្នុងខណ្ឌសែនសុខ រាជធានីភ្នំពេញ ក្រោមទុនវិនិយោគជិត ៣ លានដុល្លារអាមេរិក មួយនេះក្នុងជំហានដំបូងមានសមត្ថភាពផលិតសាប៊ូកក់សក់បានរហូតដល់ទៅជាង ៤ ម៉ឺនដបក្នុងមួយថ្ងៃ និងបានបង្កើតឱកាសការងារយ៉ាងច្រើនដល់ប្រជាពលរដ្ឋក្នុងសហគមន៍ថែមទៀតផង ។
អឹម ឡែប មានគម្រោងផលិតផលិតផលធំៗចំនួន ៤ មុខដោយក្នុងនោះផលិតផលចំនួន ២ បានចេញរូបរាងហើយ និងកំពុងចរាចរណ៍លើទីផ្សារក្នុងប្រទេសដោយមានការគាំទ្រខ្លាំង រួមមាន ៖ សាប៊ូកក់សក់ «សុខមាល» ដែលតំណាងឱ្យ «សុខភាព» ជាប្រភេទសាប៊ូកក់សក់ 2in1 (កក់ផង បន្ទន់ផងក្នុងដបតែមួយ) ផ្សំឡើងពីសារធាតុសំខាន់ៗដូចជា ៖ ប្រេងអាល់ម៉ុន (Almond oil) និងវីតាមីន B5 ដែលសារធាតុផ្សំមួយចំនួនប្រើប្រាស់ផលិតផលក្នុងស្រុក នាំចូលពីប្រទេសចិន កូរ៉េ និងអឺរ៉ុប ។ «សុខមាល» មាន ២ ទំហំសម្រាប់ជ្រើសរើស (៣០០មិល្លីលីត្រ និង ៥០០មិល្លីលីត្រ) ក្នុងតម្លៃសមរម្យ ។ ក្រៅពីនេះមានម៉ាស់បិទមុខ ដែលប្រើប្រាស់វត្ថុធាតុដើម និងសារធាតុផ្សំនៅក្នុងស្រុកពិតៗតែម្តង ។
ទោះជាយ៉ាងណា លោកឧកញ៉ា សឹង ចាតវិជ្ជា បានគូសបញ្ជាក់ថា កន្លងមកកម្ពុជាពឹងផ្អែកលើផលិតផលនាំចូលពីប្រទេសជិតខាងរហូតដល់ទៅជិត ៨០% ខណៈផលិតផលសាប៊ូដែលផលិតដោយរោងចក្រខ្មែរទើបតែផ្គត់ផ្គង់ទីផ្សារបានប្រមាណ ២០% ប៉ុណ្ណោះ ។ ហេតុនេះ លោកឧកញ៉ាបានអំពាវនាវដល់បងប្អូនប្រជាពលរដ្ឋខ្មែរគ្រប់រូបឱ្យមកចូលរួមគ្នាគាំទ្រ និងប្រើប្រាស់ផលិតផលជាតិ ដើម្បីឈានទៅជំនួសការនាំចូលនាពេលអនាគត ៕ អត្ថបទសហការ
ចែករំលែកព័តមាននេះ