ខេត្តស្ទឹងត្រែង ៖ ផ្ទៃដីរដ្ឋល្បីថា រាប់រយរាប់ពាន់ហិកតា ស្ថិតនៅភូមិកោះកី ឃុំកោះស្នែង ស្រុកបុរីអូរស្វាយសែនជ័យ ត្រូវបានទន្ទ្រានចាប់យកតាមរយៈការប្រើប្រាស់កម្លាំងប្រជាពលរដ្ឋ រួចប្រមូលទិញដោយអ្នកមានលុយមហាសាលម្នាក់។
តាមប្រភពព័ត៌មាន បានអោយដឹងថា ផ្ទៃដីរដ្ឋ ខ្លះថារាប់រយ ខ្លះថារាប់ពាន់ហិកតានោះ គឺត្រូវប្រជាពលរដ្ឋកា.ប់ទន្ទ្រានលក់ទៅអោយឈ្មោះ ភារៈ ដោយមិនដឹងថា តើ ភារៈ នោះធ្វើការងារអ្វីទេ? តែមានលុយប្រមូលទិញដីរដ្ឋ រាប់រយរាប់ពាន់ហិកតា កាយប្រវ៉ាត់ព្រំដី ជីកស្រះ ធ្វើផ្ទះលំហែ ជាហូរហែផងដែរ។
ប្រភពដដែលបន្តថា នាពេលថ្មីៗមុននេះបន្តិច ដោយបន្តផែនការសម្អាតផ្ទៃដី ដែលបានទិញរួច ម្ចាស់ដីក៏បានជួលគ្រឿងចក្រ (អាអ៊ិច) ទៅគាស់កាយលើផ្ទៃដីនោះ ស្រាប់តែកម្លាំងកងរាជអាវុធហត្ថចុះទៅបង្ក្រាប នាំយកគ្រឿងចក្រទៅរក្សាទុកនៅកន្លែងមេព្រៃផងដែរ ចំណែកម្ចាស់គ្រឿងចក្រដាក់មេប្រូចបាត់។
ទាក់ទិននឹងការអោយប្រជាពលរដ្ឋកា.ប់រានទន្ទ្រានដីរដ្ឋ ហើយប្រមូលទិញជាក្រោយនោះ គេមិនទាន់ដឹងថា តើមានឯកសារពាក់ព័ន្ធមួយណាដែលត្រូវនឹងច្បាប់ទម្លាប់នោះដែរ? ព្រោះពុំទាន់មានមន្ត្រីជំនាញពាក់ព័ន្ធណាម្នាក់បង្ហាញអំពីអត្តសញ្ញាណម្ចាស់ដីនោះនៅឡើយដែរ ពោលគឺហាក់បីដូច មានអាថ៌កំបាំងអ្វីនៅពីក្រោយផ្ទៃដីរដ្ឋ នៅចំណុចភូមិ ឃុំ ស្រុកខាងលើនេះ ព្រោះផ្ទៃដីរដ្ឋរាប់រយរាប់ពាន់ហិកតា មិនមែនអ្នកមានលុយតិចតួចស្តួចស្តើងអាចធ្វើទៅបាននោះឡើយ គ្រាន់តែមានពាក្យថាឈ្មោះ ភារៈ។
ពាក់ព័ន្ធករណីបង្ក្រាបគ្រឿងចក្រនៅលើផ្ទៃដីរដ្ឋខាងលើនេះ កោះសន្តិភាពកំពុងរង់ចាំស្តាប់មើលថា ដំណើរការនីតិវិធីស្រាវជ្រាវ ម្ចាស់ដីរាប់រយរាប់ពាន់ហិកតានោះ តើជានណាអោយប្រាកដនៅឡើយទេ?។ ប៉ុន្តែមានអ្នកបង្ហើបថា ឈ្មោះភារៈនេះ ជាបុគ្គលកំពុងតែមានអំណាចក្រាស់នៅលើស្មា កំពុងអួតពីខ្នងក្រាស់ ទើបអាចឈូសឆាយដីរដ្ឋរាប់រយរាប់ពាន់ហិកតាដោយរលូនយ៉ាងនេះ។
ព័ត៌មានពិស្ដារនឹងមានផ្សាយបន្ត ក្រោយពីមានប្រតិកម្មណាមួយ ដែលកន្លងមកយើងមិនអាចសុំការបំភ្លឺបានឡើយ៕
ចែករំលែកព័តមាននេះ