លោកហ្គារី វ៉េតដល អាយុ៥០ឆ្នាំ គ្រូបង្រៀនសាលាមធ្យមសិក្សាមួយកន្លែងនៅក្នុងតំបន់អេហ្វ្រាតា រដ្ឋវ៉ាស៊ីនតោន សហរដ្ឋអាមេរិក ដែលធ្លាប់ប្រកាសក្រោយពេលកើតហេតុការណ៍១១ កញ្ញា ឆ្នាំ២០០១ថា នឹងមិនកោពុកមាត់ដរាបណាប៊ីនឡាដេន មិនទាន់ត្រូវបានចាប់ខ្លួន។ បច្ចុប្បន្នដល់ពេលវេលាដែលលោកត្រូវធ្វើតាមការប្រកាសនោះហើយដោយកោរពុកមាត់ចេញជាលើកដំបូងចាប់តាំងពីរក្សាមកក្នុងអំឡុងពេល១០ឆ្នាំ។ លោកបានបន្តថា ទម្រាំនឹងបង្ខំចិត្តកោរពុកមាត់ចេញ ត្រូវចំណាយពេលស្មិងស្មាធិ៍សម្រេចតចិត្តប្រមាណ៥នាទី ។
ស្របពេលជាមួយគ្នានេះ ក៏មានរបាយការណ៍ផ្សាយឱ្យដឹងថា ក្រោយពីលោកប៊ីនឡាដេន ត្រូវបានសម្លាប់ក្រុមអាជីវករផលិតវត្ថុអនុស្សាវរីយ៍មានដូចជាអាវយឺត ស្រោមមុខ និងវត្ថុផ្សេងៗទៀតទាក់ទិននឹងប៊ីនឡាដេន បានចេញដាក់លក់នៅតាមហាង និងវ៉េបសាយភ្លាមៗ ដោយលទ្ធផលបង្ហាញថា ទទួលការចាប់អារម្មណ៍បំផុតពីសំណាក់អតិថិជន។ ក្រៅពីនេះក៏មានរបាយការណ៍បញ្ជាក់ទៀតថា ទាហានប៉ាគីស្ថានបានចូលចាប់ខ្លួនលោកសេម រ៉េស ខាន កសិករម្នាក់អាយុ៥០ឆ្នាំ ស្នាក់នៅលំនៅឋានខាងក្រោយជាប់នឹងភូមិគ្រឹះប៊ីនឡាដេន ។ កូនប្រុស និងបងប្អូនញាតិមិត្តរបស់គេ (លោកខាន) បាននិយាយថា លោកខានត្រូវទាហានចូលចាប់ខ្លួនទៅសាកសួរក្រោយពីគាត់ និងបក្សពួកចេញទៅឈរសម្លឹងមើលភូមិគ្រឹះប៊ីនឡាដេន កាលពីព្រឹកថ្ងៃចន្ទកន្លងមក។
ស្របពេលជាមួយគ្នានេះ ក៏មានអ្នកស្រុកជាច្រើននាក់បានបញ្ជាក់ថា ក្រុមគ្រួសារនេះគ្រាន់តែជាកសិករក្រីក្រ និងជាមនុស្សបរិសុទ្ធប៉ុណ្ណោះ ព្រោះពួកគេស្គាល់ច្បាស់ណាស់ ។ ទោះជាយ៉ាងណា ទាហានប៉ាគីស្ថានបានប្រគល់ការការពារភូមិគ្រឹះរបស់ប៊ីនឡាដេនដល់អាជ្ញាធរប៉ូលិស និងថែមទាំងអនុញ្ញាតឱ្យក្រុមសារព័ត៌មានចូលទៅក្នុងបរិវេណជុំវិញអគារ ប៉ុន្តែហាមចូលទៅក្នុងបរិវេណភូមិគ្រឹះ ហើយប៉ូលិសបានចូលទៅតអំពូលភ្លើងនៅខាងក្រោយអគារឱ្យភ្លឺក្នុងពេលយប់ ៕
ចែករំលែកព័តមាននេះ