ខេត្តបន្ទាយមានជ័យ ៖ សមត្ថកិច្ចចម្រុះ បានរកឃើញ និងដកហូតផលិតផលដើមដំណើតចេញពីសត្វទម្ងន់៧តោនដែលវេចខ្ចប់មិនបានត្រឹមត្រូវ បង្កឱ្យមានការភ្ញាក់ផ្អើលកាលពីថ្ងៃទី១៥ ខែមិថុនា ឆ្នាំ២០២៣ នៅក្បែរផ្សារត្រី ស្ថិតក្នុងភូមិប៉ាលិលេយ្យ១ សង្កាត់-ក្រុងប៉ោយប៉ែត ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្ត បានប្រាប់ឱ្យដឹងថា ក្រោយធ្វើការស្រាវជ្រាវ និងកំណត់មុខសញ្ញាហើយ មន្ត្រីអគ្គនាយកដ្ឋានសុខភាពសត្វ និងផលិតសត្វ សហការជាមួយមន្ត្រីការិយាល័យផលិតកម្ម និងបសុព្យាបាលខេត្ត បានចុះពិនិត្យឃ្លាំង១កន្លែងដែលនាំទំនិញផលិតផលដើមកំណើតចេញពីសត្វ ដែលកំពុងស្តុកទុកនៅក្នុងឃ្លាំងជាង២០តោន ហើយត្រូវបានដកហូត៧តោន ព្រោះតែរកឃើញថា ការវេចខ្ចប់គ្មានលក្ខណៈបច្ចេកទេសត្រឹមត្រូវ និងខូចគុណភាពផងដែរ។
លោកបន្តថា ក្រោយពេលពិនិត្យទំនិញផលិតផលដើមកំណើតពីសត្វ ទម្ងន់៧តោន ក៏ត្រូវបានដកហូតមុខទំនិញវេចខ្ចប់គ្មានលក្ខណៈបច្ចេកទេសត្រឹមត្រូវ និងខូចគុណភាព ដោយសារព្រួយបារម្ភខ្លាចមានជំងឺផ្តាសាយបក្សី ដែលជាទំនិញឈ្មួញជាម្ចាស់ឃ្លាំងនាំចូលពីប្រទេសថៃ ដើម្បីនាំចេញទៅលក់បន្តនៅតាមបណ្តាខេត្តមួយចំនួន។
ក្រោយពីធ្វើការដកហូត ម្ចាស់ឃ្លាំងត្រូវបានមន្ត្រីជំនាញ នាំខ្លួនយកទៅសួរនាំនៅការិយាល័យផលិតកម្ម និងបសុព្យាបាលខេត្ត ដើម្បីអនុវត្តបន្ត ចំណែកសាច់មាន់ប្រហិតចម្រុះដែលត្រូវដកហូតនោះ នឹងយកទៅដុតកម្ទេចចោលផងដែរ ៕
ចែករំលែកព័តមាននេះ