ខេត្តព្រៃវែង ៖ បឹងធំគឺជាដីបឹងសាធារណៈរបស់រដ្ឋ ស្ថិតនៅក្នុងភូមិស្វាយ ឃុំព្រៃសាឡិត ស្រុកពារាំង ខេត្តព្រៃវែងកំពុងត្រូវបានក្រុមឈ្មួញជាច្រើនក្រុមដណ្ដើមគ្នាជីកយកអាចម៍លក់យ៉ាងណាអធិបតេយ្យ ខណៈកន្លងមក មេឃុំថាអោយគេជីក ដើម្បីការពារកុំអោយពលរដ្ឋដែលមានដីនៅជុំវិញនោះរំលោភយក…
ខេត្តព្រៃវែង ៖ បឹងធំគឺជាដីបឹងសាធារណៈរបស់រដ្ឋ ស្ថិតនៅក្នុងភូមិស្វាយ ឃុំព្រៃសាឡិត ស្រុក
ពារាំង ខេត្តព្រៃវែងកំពុងត្រូវបានក្រុមឈ្មួញជាច្រើនក្រុមដណ្ដើមគ្នាជីកយកអាចម៍លក់យ៉ាងណាអធិបតេយ្យ ខណៈកន្លងមក មេឃុំថាអោយគេជីក ដើម្បីការពារកុំអោយពលរដ្ឋដែលមានដីនៅជុំវិញនោះរំលោភយក ។ ប៉ុន្តែថ្មីៗនេះ ស្រាប់តែកើតមានបញ្ហាចម្រូងចម្រាស់ឡើងរហូតដល់មានការប្តឹងផ្តល់គ្នាដោយសារតែមានឈ្មួញខ្លះចូលទៅជីកបាន តែឈ្មួញខ្លះទៀតគេមិនអោយជីក។
ជាក់ស្តែង កាលពីថ្ងៃទី១០ ខែមិថុនា ឆ្នាំ២០២៣ មានគ្រឿងចក្រមួយក្រុមបានចូលទៅសុំជីកយកអាចម៍ដីនៅក្នុងបឹងធំនោះដែរ ប៉ុន្តែត្រូវបានឈ្មួញ៣ក្រុមទៀត ដែលកំពុងជីកក្នុងបឹងនោះហាមឃាត់ មិនអោយជីក ទើបកើតជារឿងជម្លោះរវាងឈ្មួញនិងឈ្មួញ រហូតមានអាជ្ញាធរចុះទៅហាមឃាត់ និងបញ្ជាអោយកំលាំងប៉ុស្តិ៍ឃាត់គ្រឿងចក្រទាំងអស់លែងអោយជីក ។
លុះដល់ថ្ងៃទី១១ មិថុនា លោកជា សយ មេឃុំព្រៃសាឡិត ក៏បានហៅអោយក្រុមគ្រឿងចក្រទាំងនោះមកដោះស្រាយគ្នានៅសាលាឃុំ ហើយក៏បានធ្វើកិច្ចសន្យាអោយផ្អាកជីកសិនរងចាំមានការដោះស្រាយសម្របសម្រួលគ្នាសិន។ ប៉ុន្តែមកដល់ថ្ងៃទី១៤ ខែមិថុនា ស្រាប់ តែឃើញគ្រឿងចក្រមួយក្រុម បានមកជីកយកអាចម៍ដីនៅក្នុងបឹងធំនេះទៀតទាំងដែលមេឃុំទើបនិងអោយផ្អាក ធ្វើអោយក្រុមឈ្មួញផ្សេងៗទៀត ផ្ទុះប្រតិកម្មជាខ្លាំង។
ជុំវិញករណីនេះដែរ សារព័ត៌មានកោះសន្តិភាព មិនទាន់អាចសុំការបំភ្លឺពីលោក ជា សយ មេឃុំព្រៃសាឡិត បាននោះទេ គិតត្រឹមព្រឹកថ្ងៃទី១៥មិថុនានេះ ដោយសារទូរស័ព្ទរបស់លោក ខលចូលហើយ តែគ្មានអ្នកទទួល។
គួររំលឹកផងដែរថា កន្លងមកក៏មានខាងសារព័ត៌មានបានចុះផ្សាយម្តងរួចមកហើយ ទាក់ទិនទៅនិងរណ្តៅដីមួយនេះ ពេលនោះ លោក ជា សយ មេឃុំព្រៃសាឡិតបានថ្លែងថា គាត់អោយគេជីក ដើម្បីការពារបឹង កុំអោយពលរដ្ឋរំលោភយក ប៉ុន្តែពេលនេះ បែរជាកើតមានរឿងដដែល ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ