រាជធានីភ្នំពេញ ៖ កាលពីវេលាម៉ោង១២និង១៥នាទីអធ្រាត្រឈានចូលថ្ងៃទី៦ ឧសភា បុរសម្នាក់ជិះម៉ូតូគុបជ្រុង៥០ ពណ៌សំបកឪឡឹក ពាក់ស្លាកលេខ ភព ១ឃ ០៩៧១ បានជួបនឹងគ្រោះថ្នាក់ចរាចរណ៍ ខណៈឌុបមិត្ដស្រីចេញពីហាងផឹកស៊ីដែលទំនងរវល់តែប្រឡែងគ្នាមិនបានមើលទៅមុខក៏បណ្ដាលឱ្យជ្រុលចង្កូតទៅបុកពីក្រោយរថយន្ដហ៊ីយ៉ាន់ដាយ
រាជធានីភ្នំពេញ ៖ កាលពីវេលាម៉ោង១២និង១៥នាទីអធ្រាត្រឈានចូលថ្ងៃទី៦ ឧសភា បុរសម្នាក់ជិះម៉ូតូគុបជ្រុង៥០ ពណ៌សំបកឪឡឹក ពាក់ស្លាកលេខ ភព ១ឃ ០៩៧១ បានជួបនឹងគ្រោះថ្នាក់ចរាចរណ៍ ខណៈឌុបមិត្ដស្រីចេញពីហាងផឹកស៊ីដែលទំនងរវល់តែប្រឡែងគ្នាមិនបានមើលទៅមុខក៏បណ្ដាលឱ្យជ្រុលចង្កូតទៅបុកពីក្រោយរថយន្ដហ៊ីយ៉ាន់ដាយ ពណ៌ខៀវ ពាក់ស្លាកលេខភ្នំពេញ 2L-0494 ដែលឈប់នៅលើចិញ្ចើមថ្នល់ខាងស្ដាំ បណ្ដាលឱ្យដួលទៅនឹងថ្នល់សន្លប់តែម្ដង។ ហេតុការណ៍នេះកើតឡើងនៅមុខវិទ្យាល័យបឹងត្របែកតាម បណ្ដោយមហាវិថីព្រះនរោត្ដម ក្នុងសង្កាត់បឹងត្របែក ខណ្ឌចំការមន ។
តាមព័ត៌មានពីមន្ត្រីប៉ូលិសបានឱ្យដឹងថា បុរសជាអ្នកបើកម៉ូតូឈ្មោះហ៊ុយ ហេង អាយុ៣៨ឆ្នាំ មានទីលំនៅបឹងទំពុន ផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន បានជិះឌុបមិត្ដឈ្មោះជឹម ស្រីពៅ អាយុ២៤ឆ្នាំ ចេញពីហាងផឹកស៊ី ខណៈជិះមកដល់ចំណុចកើតហេតុខាងលើបានជ្រុលចង្កូតទៅបុករថយន្ដម៉ាកហ៊ីយ៉ាន់ដាយ ពីក្រោយដែលឈប់លើចិញ្ចើមថ្នល់ខាងស្តាំបណ្តាលឱ្យដួលសន្លប់ស្តូកស្តឹង។ អ្នកឃើញហេតុការណ៍បានទូរស័ព្ទហៅរថយន្ដសាមុយគ្លីនិកបញ្ញាស័ក្ដិដឹកយកទៅព្យាបាល ប៉ុន្តែពេលខាងរថយន្ដសាមុយដឹកបុរសរងគ្រោះយកទៅនោះក៏បានប្រាប់ឱ្យនារីជាមិត្តស្រីទូរស័ព្ទទៅប្រាប់បងប្អូន តែនារីនោះប្រាប់ថា អត់ស្គាល់ទេ ទើបខាងរថយន្ដសាមុយ ឆែករកលេខក្នុងទូរស័ព្ទរបស់ជនរងគ្រោះហើយបានទាក់ទងទៅក៏ចំលេខរបស់ប្រពន្ធជនរងគ្រោះតែម្ដង។ ពេលប្រពន្ធជនរងគ្រោះមកដល់គ្លីនិកមិត្ដស្រីរូបនោះ បានគេចខ្លួនបាត់ស្រមោល។ ស្ដ្រីជាប្រពន្ធឈ្មោះច្រាយ ចិន្ដា អាយុ២៨ឆ្នាំ មានកូនពីរនាក់ ។
ចំណែកអ្នកបើកបររថយន្ដឈ្មោះគ្រី អុន អាយុ៣៧ឆ្នាំ មានទីលំនៅភូមិស្វាយជួ ឃុំកោះខែល ស្រុកស្អាង ខេត្ដកណ្ដាល បានឱ្យដឹងថា គាត់ដឹកអ្នកលក់បន្លែចំនួន២០នាក់ ដែលយកបន្លែទៅលក់នៅផ្សារដើមគ ពេលលក់អស់ក៏ដឹក ត្រឡប់ទៅផ្ទះវិញ។ ខណៈពេលបើករថយន្ដមកដល់មុខវិទ្យាល័យបឹងត្របែករថយន្ដរកកលរលត់ក៏បើកទៅឈប់អែបចិញ្ចើមថ្នល់ម្ខាង ទើបនឹងឈប់បានបន្តិច ស្រាប់តែមានម៉ូតូមួយគ្រឿងជិះមកបុកពីក្រោយដួលសន្លប់តែម្ដង ។
អ្នកលក់បន្លែដែលជិះលើរថយន្ដទាំងអស់បាននាំគ្នាស្រែកថា បុរសនេះជិះម៉ូតូមិនមើលមុខទេ រវល់តែប្រឡែងគ្នាជាមួយមិត្ដស្រីលើម៉ូតូ ទើបជ្រុលមកបុករថយន្ដបែបនេះ។ មើលទៅបុរសរងគ្រោះទំនងជាស្រវឹងផងដែរ ។ បន្ទាប់មករថយន្ដដឹកបន្លែបានបើកហួសទៅឈប់នៅមុខរោងចក្រ គង់ ហុង ហើយត្រូវប៉ូលិសចរាចរឃាត់យកទៅស្នងការប៉ូលិសចរាចរជើងគោកដើម្បីធ្វើការដោះស្រាយតាមនីតិវិធី៕
ចែករំលែកព័តមាននេះ