ខេត្តបាត់ដំបង ៖ សាកសពបុរសម្នាក់ដែលមានស្នាមវាយដំស្ទើរផុងលលាដ៍ក្បាលផង ត្រូវបានអ្នកគង្វាលពពែម្នាក់ប្រទះឃើញ កាលពីវេលាម៉ោង៨និង៣០នាទីព្រឹក ថ្ងៃទី១៣ មិថុនា នៅលើទូលកណ្ដាលវាលស្រែមួយកន្លែង នៅក្នុងភូមិនរា២ ឃុំនរា…
ខេត្តបាត់ដំបង ៖ សាកសពបុរសម្នាក់ដែលមានស្នាមវាយដំស្ទើរផុងលលាដ៍ក្បាលផង ត្រូវបានអ្នកគង្វាលពពែម្នាក់ប្រទះឃើញ កាលពីវេលាម៉ោង៨និង៣០នាទីព្រឹក ថ្ងៃទី១៣ មិថុនា នៅលើទូលកណ្ដាលវាលស្រែមួយកន្លែង នៅក្នុងភូមិនរា២ ឃុំនរា ស្រុកសង្កែ ដែលគេសង្ស័យជាអំពើឃាតកម្ម ដែលត្រូវជនដៃដល់សម្លាប់នៅកន្លែងផ្សេង រួចដឹកតាមម៉ូតូយកទៅប្លុងចោលនៅទី
នោះ ។
មន្ត្រីប៉ុស្ដិ៍រដ្ឋបាលនរាបាននិយាយថា សាកសពបុរសនោះ ត្រូវអ្នកគង្វាលពពែម្នាក់ ឈ្មោះសើ ហ្វីលីន ភេទស្រី អាយុ៤០ឆ្នាំ ជាអ្នកប្រទះឃើញដំបូងគេ នៅពេលគាត់ដេញហ្វូងពពែយកទៅឃ្វាលនៅទីនោះ ហើយគាត់ក៏បានរាយការណ៍ប្រាប់សមត្ថកិច្ចតែម្ដង ។ មន្ត្រីដដែលបានបញ្ជាក់ថា សាកសពបុរសនោះ ត្រូវគេស្គាល់ថា ឈ្មោះ ទក ប៊ុនធឿន អាយុ៤៧ឆ្នាំ រស់នៅភូមិសំរោងអូរទ្រា ឃុំសំរោងក្នុង ស្រុកឯកភ្នំ ។
បើតាមប្រភពនានានៅកន្លែងកើតហេតុរាប់ទាំងមន្ត្រីមូលដ្ឋានផងបានប្រាប់កោះសន្តិភាពថា ជនរងគ្រោះជាមនុស្សមានសតិមិនប្រក្រតី ។ មុនពេលកើតហេតុប៉ុន្មានថ្ងៃ ដោយសារមានបញ្ហាសុខភាព ក្រុមគ្រួសារក៏បាននាំគាត់ទៅសម្រាកនៅមន្ទីរពេទ្យបង្អែក ឃុំរកា ដើម្បីព្យាបាលជំងឺប្រចាំកាយ ។ ប៉ុន្តែក្រោយមក គាត់ក៏បានរត់ចេញពីពេទ្យ ហើយបាត់ដំណឹងរហូត លុះនៅព្រឹកថ្ងៃទី ១៣ មិថុនា ក៏ស្រាប់តែត្រូវគេប្រទះឃើញសាកសពគាត់នៅលើទូលកណ្ដាលវាលស្រែធ្វើឲ្យមានការភ្ញាក់ផ្អើលតែម្ដង ។សាកសពជនរងគ្រោះដេកស្លាប់នៅលើស្មៅគ្មានខោអាវ តែស្លៀកខោខ្លី ។
អ្នកគង្វាលពពែឈ្មោះ សើ ហ្វីលីន បានប្រាប់កោះសន្ដិភាព នៅកន្លែងកើតហេតុថា គាត់តែងដេញហ្វូងពពែគាត់ទៅឃ្វាលនៅទីនោះរាល់ថ្ងៃ ។ ប៉ុន្តែនៅព្រឹកថ្ងៃទី១៣ មិថុនា ពេលគាត់ដេញហ្វូងទៅទីនោះ ស្រាប់ហ្វូងពពែគាត់វាផ្អើលរត់ត្រឡប់ក្រោយ ។ គាត់បានបញ្ជាក់ថា ពេលនោះគាត់ឆ្ងល់ពេលឃើញពពែផ្អើលបែបនេះ ហើយគាត់ក៏ដើរទៅមើល ស្រាប់តែប្រទះឃើញសាកសពបុរសម្នាក់ដេកច្រង៉ាងលើស្មៅ ។
គាត់ភ័យរន្ធត់យ៉ាងខ្លាំង ពេលប្រទះឃើញសពបែបនេះ ហើយគាត់ក៏បានទាក់ទងទៅអ្នកភូមិ ឲ្យជួយរាយការណ៏ប្រាប់សមត្ថកិច្ចភ្លាមៗដែរ។ នៅកន្លែងកើតហេតុ គេមិនប្រទះឃើញវត្តមានមន្ត្រីនគរបាលករិយាល័យជំនាញ នៃស្នងការខេត្តចុះទៅសួរនាំ ឬ ពិនិត្យកន្លែងកើតហេតុទេ តែគេឃើញមានវត្តមាន មន្ត្រីការិយាល័យបច្ចេកទេស និង មន្ត្រីមូលដ្ឋាន ចុះពិនិត្យសាកសព ក្រោមការចោមរោមពីប្រជាពលរដ្ឋរាប់រយនាក់។
លោក កោ ស៊ុនកាំង នាយការិយាល័យព្រហ្មទណ្ឌកំរិតធ្ងន់ បានប្រាប់ថា លោកមិនបានដឹងថា ការប្រទះឃើញមនុស្សស្លាប់ខាងលើនេះ ជារឿងអ្វីទេ ហើយកម្លាំងការិយាល័យរបស់លោកក៏ពុំបានចុះទៅកន្លែងកើតហេតុដែរ តែមានមន្ត្រីការិយាល័យបច្ចេកទេសបានចុះទៅពីនិត្យសាកសពហើយ។ លោក កោ ស៊ុនកាំង បានបញ្ជាក់ថា «ទាល់តែខាងបញ្ចេកទេសធ្វើការសន្និដ្ឋាន ទើបយើងអាចវាយតំលៃបាន»។ បើតាមសមត្ថកិច្ចដែលស្ថិតនៅកន្លែងសាកសព បានផ្ដល់ព័ត៏មានបឋមថា នៅកន្លែងកើតហេតុ គេឃើញមាន«ដានកង់ម៉ូតូ» ជិះចូល និង បត់ចេញវិញ ។
ដោយឡែក នៅលើខ្លួនសាកសព មានស្លាកស្នាមរបួស តែធ្ងន់ធ្ងរត្រង់លលាដ៍ក្បាល ដែលមានស្នាមវាយដំច្រើនកន្លែង។ មន្ត្រីដដែលបានបញ្ជាក់ថា បើពិនិត្យចំណុចកើតហេតុ គ្មានស្លាកស្នាមគួរឲ្យសង្ស័យថា ជនរងគ្រោះអាចត្រូវគេសម្លាប់នៅទីនោះទេ ។ គេសង្ស័យជនរងគ្រោះអាចត្រូវឃាតកដែលមានគ្នាលើសពីម្នាក់វាយសម្លាប់នៅកន្លែងផ្សេង រួចដឹកតាមម៉ូតូយកទៅបោះចោលនៅចំណុចខាងលើ ដែលកើតឡើងនៅយប់ថ្ងៃទី ១២ មិថុនា។ ប៉ុន្តែនៅកន្លែងពិនិត្យសាកសព សមត្ថកិច្ចហាក់គេពុំទាន់មានតម្រុយអំពីមុខសញ្ញាជនសង្ស័យក្នុងករណី «ឃាតកម្ម» នេះនៅឡើយទេ។
ហើយក៏ពុំទាន់ដឹងថា តើជនរងគ្រោះមានរឿងអ្វី ? តើជនដៃដល់ជានរណា ? តើកើតឡើងនៅកន្លែងណា ទើបត្រូវបានគេដឹកសាកសពជនរងគ្រោះ យកទៅផ្លុងចោលនៅចំណុចខាងលើនេះ ? យ៉ាងណាក្ដី សមត្ថកិច្ចមូលដ្ឋានបាននិងកំពុងពិនិត្យកន្លែងកើតហេតុ កំពុងសួរនាំសាក្សីនានា និង កំពុងធ្វើការស្រាវជ្រាវលើអំពើ«ឃាតកម្មកំបាំងមុខ»នេះហើយ បើទោះជាគ្មានវត្តមានមន្ត្រីការិយាល័យព្រហ្មទណ្ឌកំរិតធ្ងន់ចូលរួមក្ដី៕
ចែករំលែកព័តមាននេះ