ខេត្តកំពង់ចាម ៖ រថយន្តកូរ៉េពណ៌ខៀវ ចំណុះ២តោនកន្លះពាក់ស្លាកលេខតាកែវ3A-0060 បានបោះពួយយ៉ាងលឿនទៅបុកម៉ូតូម៉ាកវ៉េវ១គ្រឿង នៅលើកំណាត់ផ្លូវជាតិលេខ៧ លាន់ដូចរន្ទះ កាលពីវេលាម៉ោង១០និង៣០នាទីព្រឹក ថ្ងៃទី៥ ឧសភា ២០១១ នៅត្រង់ចំណុចហង្ស ស្ថិតនៅក្នុងភូមិអណ្តូងច្រុះ ឃុំអំពិល ស្រុកកំពង់សៀម
ខេត្តកំពង់ចាម ៖ រថយន្តកូរ៉េពណ៌ខៀវ ចំណុះ២តោនកន្លះពាក់ស្លាកលេខតាកែវ3A-0060 បានបោះពួយយ៉ាងលឿនទៅបុកម៉ូតូម៉ាកវ៉េវ១គ្រឿង នៅលើកំណាត់ផ្លូវជាតិលេខ៧ លាន់ដូចរន្ទះ កាលពីវេលាម៉ោង១០និង៣០នាទីព្រឹក ថ្ងៃទី៥ ឧសភា ២០១១ នៅត្រង់ចំណុចហង្ស ស្ថិតនៅក្នុងភូមិអណ្តូងច្រុះ ឃុំអំពិល ស្រុកកំពង់សៀម។ ឧប្បត្តិហេតុនេះបានបណ្តាលឲ្យអ្នកជិះម៉ូតូឈ្មោះវ៉ា សុខនី ភេទប្រុស អាយុ៣២ឆ្នាំ រស់នៅភូមិថ្មី ឃុំរកាគយ ស្រុកកងមាស ផ្លោងខ្ទាតមកលើទ្រូងថ្នល់សំណាងល្អដោយគ្រាន់តែរងរបួសធ្ងន់មិនស្លាប់ ឯម៉ូតូត្រូវរថយន្តអូសបែកផ្កាភ្លើងប្រហែល២០ម៉ែត្រទើបឈប់។
តាមសាក្សីនៅកន្លែងកើតហេតុបានប្រាប់ឲ្យដឹងថា មុនពេលកើតហេតុរថយន្តកូរ៉េបានបើកចេញមកពីទិសខាងលិចឆ្ពោះមកកើតក្នុងល្បឿនលឿន លុះមកដល់ចំណុចកើតហេតុក៏បានបុកម៉ូតូវ៉េវនោះពីក្រោយយ៉ាងពេញទំហឹងលាន់ដូចរន្ទះ ហើយរថយន្តក៏បានបុកឆត្រដែលគេដាក់អែបនឹងចិញ្ចើមថ្នល់ប៉ើងដូចក្រដាសទៀតផង ។
សាក្សីបានប្រាប់បន្តថា បុរសអ្នកជិះម៉ូតូបានត្រូវរថយន្តបុកផ្លោងខ្ទាតចេញពីម៉ូតូធ្លាក់មកលើថ្នល់រងរបួសជាទម្ងន់ រីឯម៉ូតូវិញនៅជាប់ខាងក្រោមរថយន្តអូសប្រហែលជា២០ម៉ែត្រ ទើបឈប់។ រំពេចនោះអ្នកបើកបររថយន្តបានបើកទ្វាររថយន្តរត់គេចខ្លួនជាមួយព្រូ២-៣នាក់ទៀតបាត់តែម្តង។ ដោយឡែកអ្នកជិះម៉ូតូរងគ្រោះត្រូវបានប្រជាពលរដ្ឋនៅក្បែរនោះ សែងមកដាក់នៅមុខផ្ទះរបស់អ្នកភូមិរួចនាំគ្នាជួយរឹតទ្រូង និងបានទូរស័ព្ទហៅរថយន្តសាមុយរបស់មន្ទីរពេទ្យ ៧«D» មកដឹកយកទៅសង្គ្រោះភ្លាមៗផងដែរ។
តាមការពិនិត្យ ម៉ូតូរបស់អ្នករងគ្រោះបានរងការខូចខាតស្ទើរតែទាំងស្រុង ដោយបានកៀបជាប់នៅក្រោមកង់រថយន្តផ្នែកខាងក្រោយ ធ្វើឲ្យអ្នកឃើញហេតុការណ៍នេះញាក់សាច់គ្រប់ៗគ្នាដោយលាន់មាត់ថា «នេះសំណាងហើយដែលអ្នកជិះម៉ូតូផ្លោងចេញពីម៉ូតូ បើពុំនោះទេ នឹងត្រូវក្ស័យជីវ៉ាមិនខានឡើយ»។ លោកងិន ហេង ប្រធាននគរបាលចរាចរស្រុកកំពង់សៀមបានប្រាប់ឲ្យដឹងថា អ្នករងគ្រោះបានពាក់មួកសុវត្ថិភាព តែត្រូវបានរថយន្តបុកយ៉ាងពេញទំហឹង ជាហេតុបណ្តាលឲ្យដាច់ជ្រុះមួកសុវត្ថិភាពចេញពីក្បាល ទើបបែកក្បាល ដោយសារតែបោកផ្ទប់ទៅនឹងកញ្ចក់រថយន្ត។ រថយន្ត និងម៉ូតូត្រូវបាននាំយកទៅរក្សាទុកនៅអធិការដ្ឋាននគរបាលស្រុកកំពង់សៀម ដើម្បីដោះស្រាយទៅតាមច្បាប់៕
ចែករំលែកព័តមាននេះ