កសិដ្ឋានដាំម្ទេសស្តង់ដារជប៉ុន គ្រោងបើកនៅស្រុកអង្គរធំ ខេត្តសៀមរាប
- សៀមរាប
ខេត្តសៀមរាប ៖ កាលពីថ្ងៃទី១០ ខែមិថុនា ឆ្នាំ២០២៣ ម្សិលមិញនេះ លោក សោម សមស័ក្ក នាយកទី
ខេត្តសៀមរាប ៖ កាលពីថ្ងៃទី១០ ខែមិថុនា ឆ្នាំ២០២៣ ម្សិលមិញនេះ លោក សោម សមស័ក្ក នាយកទីចាត់ការហិរញ្ញវត្ថុ សាលាខេត្តសៀមរាប និងក្រុមការងារបាននាំអ្នកវិនិយោគជនជាតិជប៉ុន លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន ចុះទៅពិនិត្យទីតាំងគ្រោងបើកកសិដ្ឋានដាំម្ទេសស្តង់ដារជប៉ុន លើផ្ទៃដីចំនួន៧២ហិកតាជំហានទី០១ ស្ថិតក្នុងភូមិត្រពាំងទូក ឃុំជប់តាត្រាវ ស្រុកអង្គរធំ ខេត្តសៀមរាប ។
តាមប្រសាសន៍របស់លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន បានឲ្យដឹងថា កសិដ្ឋាននេះ គឺជាបច្ចេកទេសថ្មីហើយ និងបានផលច្រើន និងជាគំរូមួយសម្រាប់កសិកម្មនៅក្នុងស្រុកផងដែរ ។ លោកក៏បានបញ្ជាក់ថា បច្ចុប្បន្ននេះមានអ្នកបញ្ជាទិញ ក្នុងមួយខែរហូតដល់៥០០តោន ជារៀងរាល់ខែ ហើយផែនការនេះមិនមែនលក់នៅក្នុងស្រុកនោះទេ គឺនាំចេញទៅក្រៅប្រទេស ។ ក្នុងនោះដែរ លោកក៏ត្រូវការបុគ្គលិកបង្គោល ដើម្បីមើលថែដំណាំម្ទេសដែលមានគុណភាពនិងស្តង់ដានាំ ចេញ ព្រមទាំងត្រូវការកម្លាំងកម្មករជា ច្រើននាក់ ក្នុងការប្រមូលផល កសិដ្ឋាននេះនិងជួយឱ្យប្រជាពលរដ្ឋនៅក្បែរៗនេះ មានការងារធ្វើជារៀងរាល់ថ្ងៃ ។
កសិដ្ឋាននឹងបង្រៀនអំពីបច្ចេកទេសនៃការដាំម្ទេសឲ្យត្រូវនឹងស្តង់ដារនាំចេញទៅក្រៅប្រទេសដល់ប្រជាកសិករទៀតផង ។ ចំពោះពលរដ្ឋដែលមានដី សម្រាប់ដាំដំណាំម្ទេស លោកបានសន្យាបង្រៀនទាំងផ្នែកបច្ចេកទេស ផ្តល់ពូជនិងទទួលទិញនៅផលដំណាំរបស់ប្រជាកសិករផងដែរ ។
លោកបានសង្ឃឹមថា កសិដ្ឋាននេះនិងក្លាយជាគំរូមួយ ដើម្បីឲ្យប្រជាកសិករកម្ពុជា ដែលចង់ដាំម្ទេសអាចទៅសិក្សាស្រាវនិងរៀនសូត្រពីកសិដ្ឋានបាន ។ ម្យ៉ាងទៀតក្រុមហ៊ុនលោកនឹងធ្វើមួយជំហានម្ដងៗ ធ្វើលើផ្ទៃដី៧២ហិកតា ជាជំហានដំបូងនិងធ្វើជំហានបន្តបន្ទាប់ទៀត ដើម្បីតម្រូវទីផ្សារនៅក្រៅប្រទេស ។ លោកជឿជាក់ថាពេលដែលកសិដ្ឋាននេះបានដំណើរការយើងនឹងមានអ្នកកុម្មង់ទិញផ្សេងៗទៀតកាន់តែច្រើនថែមទៀត ។
លោកបញ្ជាក់ថា តម្រូវការ ៥០០តោន ក្នុងមួយខែគឺយើងត្រូវការទំហំផ្ទៃដី ២០០ ហិកតា ទើបគ្រប់គ្រាន់សម្រាប់ផលិតអោយបាន ៥០០តោនក្នុងមួយខែ ដើម្បីឱ្យ ផលដំណាំវិលជុំបាន ហើយយើងត្រូវ ការចូលរួមពីប្រជាជននៅជុំវិញទីនោះផងដែរ ។
លោក NABESHIMA KATSUHITO លើកឡើងថា កសិដ្ឋានមួយនេះអាចដំណើរការទៅបាន អាស្រ័យទៅលើការចូលរួមពីអាជ្ញាធរ និងប្រជា ពលរដ្ឋនៅក្នុងមូលដ្ឋានចូលរួម ទើបអាចដំណើរការទៅបានដោយរលូន និង ទៅថ្ងៃអនាគតវានឹងបង្ហាញឱ្យពិភពលោកដឹងថា ផលិតផលដែលផលិតនៅក្នុងប្រទេសកម្ពុជាគឺជាផលិតផលដែលមានគុណភាពខ្ពស់ ពិភពលោកនិងទទួលស្គាល់ផលិផលរបស់កម្ពុជាដែលដាំតាមស្តង់ដារបច្ចេកទេស ។ ពេលចាប់ផ្ដើមផលិតបានយើងក៏ចាប់ផ្ដើមកែច្នៃខ្នាតតូចមួយទៀតទៅជាគ្រឿងទេស(ទឹកម្ទេស) នៅក្នុងប្រទេសកម្ពុជាក៏ដូចជាប្រទេសតំបន់អាស៊ាន គឺចូលចិត្តញ៉ាំស៊ុប ដូច្នេះពួកយើងនឹងកែច្នៃទឹកម្ទេសមួយដែលជាប្រភេទម្ទេសកសិកម្មដាំនៅក្នុងទឹកដីខេត្តសៀមរាប មានន័យថា យើងនឹងមានទឹកម្ទេសកម្ពុជាដែលឆ្ងាញ់មានរស់ជាតិ។
ការផលិតទ្រង់ទ្រាយធំបែបនេះក៏ដូចជាការផ្សព្វផ្សាយទាញទីផ្សារពិភពលោកឱ្យបានឃើញ ប្រទេសកម្ពុជាដែលអាចផលិតបាននៅផលិតផលដែលមានស្តង់ ដារ និង ទាក់ទាញនៅភ្ញៀវទេស ចរណ៍និងអ្នកវិនិយោគធំៗមកវិនិយោគនៅក្នុងខេត្តសៀមរាបកាន់តែច្រើន។ យើងត្រូវផលិត ដើម្បីផ្គត់ផ្គង់តម្រូវការទីផ្សារឱ្យបានទាន់ពេលវេលាហើយនិងមានជារៀងរាល់ខែ បើគេត្រូវការរាលសប្តាហ៍យើងផ្គត់ផ្គង់រាល់សប្តាហ៍គេត្រូវការរាល់ខែយើងផ្គត់ផ្គង់រាល់ខែពេលនោះនាក់បញ្ជាទិញនិងមកបន្ថែមទៀតជាក់ជាមិនខាន ។
លោក NABESHIMA KATSUHITO ក្នុងនាមជាអ្នកជំនាញមួយរូបលោកដឹងថា បច្ចុប្បន្នជីកំពុងតែឡើងថ្លៃ ដូច្នេះយើងអាចកែច្នៃវត្ថុធាតុដើមនៅក្នុងមូលដ្ឋាន ឱ្យទៅជាជី ដើម្បីប្រើនៅក្នុងមូលដ្ឋានផ្ទាល់ដោយមិនបាច់នាំជីចូលពីក្រៅប្រទេស វានឹង កាត់បន្ថយថ្លៃដើមក្នុងការផលិត ។
នៅក្នុងឱកាសនោះផងដែរលោក ពៅ ប៊ុនធឿន អភិបាលស្រុកអង្គរធំ ក៏ថ្លែងបានកោតសរសើរចំពោះ លោក សោម សមស័ក្ក ដែលបាននាំអ្នកវិនិយោគផ្នែកកសិកម្ម ឱ្យ មកវិនិយោគក្នុងមូលដ្ឋានរបស់លោក និង ថ្លែងអំណរគុណដល់លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន ដែល បានមកវិនិយោគនៅក្នុងស្រុកអង្គរធំខេត្តសៀមរាប ។
លោកសង្ឃឹមថា កសិដ្ឋាននេះ និង ជួយបណ្តុះបណ្តាលដល់ប្រជាកសិករ ឱ្យ មានជំនាញតាមបច្ចេកទេស និង បង្កើមការងារជូនប្រជាពលរដ្ឋក្នុងស្រុកអង្គរធំ បានកាន់តែច្រើនថែមទៀត ក្នុងការកាត់បន្ថយការធ្វើចំណាកស្រុកផងដែរ ៕
ចែករំលែកព័តមាននេះ