ខេត្តបាត់ដំបង ៖ សេចក្ដីជូនដំណឹងរបស់រដ្ឋបាលខេត្តស្ដីពី «ការបញ្ឈប់រថយន្តដឹកទំនិញធុនធ្ងន់ចូលក្នុងក្រុងបាត់ដំបង» ដែលទុករយៈពេល០១ឆ្នាំ មុនពេលចាប់ផ្ដើមចុះអនុវត្តស.ជ.ណនេះ។ ហើយបើគិតត្រិមថ្ងៃទី០៩ មិថុនា នេះ ស.ជ.ណ…
ខេត្តបាត់ដំបង ៖ សេចក្ដីជូនដំណឹងរបស់រដ្ឋបាលខេត្តស្ដីពី «ការបញ្ឈប់រថយន្តដឹកទំនិញធុនធ្ងន់ចូលក្នុងក្រុងបាត់ដំបង» ដែលទុករយៈពេល០១ឆ្នាំ មុនពេលចាប់ផ្ដើមចុះអនុវត្តស.ជ.ណនេះ។ ហើយបើគិតត្រិមថ្ងៃទី០៩ មិថុនា នេះ ស.ជ.ណ នេះ លើសផុតកំណត់រយៈជាងមួយខែហើយ តែគេនៅតែឃើញរថយន្តធុនធ្ងន់ដឹកទំនិញចូលពេញក្រុងដដែល ធ្វើឲ្យកកស្ទះចរាចរណ៍ពាសពេញផ្លូវគ្មានសមត្ថកិច្ចណាអើពើឡើយ ដែលបង្ហាញថា ស.ជ.ណ របស់លោកអភិបាលខេ្ត គ្មានប្រសិទ្ធភាព និងសាបដូចទឹកទន្លេ ។
ជាក់ស្ដែង កាលពីព្រឹកថ្ងៃទី៩ មិថុនា គេប្រទះឃើញរថយន្តដឹកទំនិញធុនធ្ងន់វែងៗ ដូចរថភ្លើងប្រភេទ «វ៉េអង»ចំនួនពីរគ្រឿង បានពើបប្រទះគ្នាបង្កការកកស្ទះ នៅត្រង់ចំណុចផ្លូវបែកជា៤ ដ៏មមារញឹកមួយកន្លែងក្បែរសាលាបឋមសិក្សាអូរតាគាំ ក្នុងសង្កាត់ទូលតាឯក ក្រុងបាត់ដំបង។ រថយន្តយក្សទាំងពីរគ្រឿងនេះ បានបង្កឲ្យមានការកក់ស្ទះចរាចរណ៍ រំខានដល់អ្នកដំណើរមួយស្របក់ តែមិនរំខានដល់ការងារសមត្ថកិច្ចអាជ្ញាធរសង្កាត់ ឬក្រុងទេ។
ប្រជាពលរដ្ឋរស់នៅទីនោះ បានប្រតិកម្មយ៉ាងខ្លាំងចំពោះរថយន្តវែងៗទាំងពីរគ្រឿងនោះ ដែលបើកបរចូលកន្លែងផ្លូវតូចចង្អៀត ធ្វើឲ្យមានការកកស្ទះ និងអាចបង្កឲ្យមានគ្រោះថ្នាក់ដល់អ្នកដំណើរដទៃទៀតងាយបំផុត ។ ប្រជាពលរដ្ឋបាននិយាយថា នៅពេលរថយន្តកំពុងពើបប្រទះគ្នា
ចំកណ្ដាលផ្លូវបែកជា៤ នោះគេពុំឃើញមានសមត្ថកិច្ចណាម្នាក់ចុះជួយធ្វើអន្តរាគមន៍សម្រួលចរាចរណ៍ទេ គេទុកឲ្យរថយន្តខ្លួនវែងដូចរថភ្លើងនោះ បើកបរឆ្លងកាត់យ៉ាងអនាធិបតេយ្យ ខណៈកូនសិស្សចេញពីសាលាផង និងអ្នកដំណើរខ្វែងខ្វាត់ផង ដែលមើលទៅប្រឈមនឹងហានិភ័យបំផុត ។
ពាក់ព័ន្ធនឹងរថយន្តដឹកទំនិញធុនធ្ងន់ បើកចេញចូលក្នុងក្រុងបាត់ដំបង យ៉ាងអនាធិបតេយ្យ គ្មានសណ្ដាប់ធ្នាប់ គ្មានរបៀបនៅលើដងផ្លូវដ៏តូចចង្អៀត និងមមារញឹកបំផុត ដែលគេមើលឃើញថា អាចប្រឈមនឹងគ្រោះថ្នាក់បំផុត សម្រាប់អ្នកដំណើរនានា អភិបាលខេត្តបាត់ដំបង លោក សុខ លូ ក៏បានសម្រេចចេញ សេចក្ដីជូនដំណឹង ស្ដីពី« បញ្ឈប់រថយន្តដឹកទំនិញធុនធ្ងន់ ចូលក្នុងក្រុងបាត់ដំបង និងផ្លាស់ប្ដូរទីតាំងឃ្លាំងស្ដុកទំនិញទៅនៅក្រៅក្រុងបាត់ដំបង» ចុះថ្ងៃទី០២ ខែឧសភា ឆ្នាំ២០២២ ។ គោលបំណងនៃសជណ គឺរដ្ឋបាលខេត្ត «ចង់ឲ្យម្ចាស់ឃ្លាំងស្ដុកទំនិញ ឬ ម្ចាស់រថយន្តធុនធ្ងន់នានា ចូលរួមរក្សាសណ្ដាប់ធ្នាប់ របៀបរៀបរយ សុវត្ថិភាពសាធារណៈ និងការពារថែរក្សាផ្លូវថ្នល់ឲ្យបានយូរអង្វែង» ។
សេចក្ដីជូនដំណឹងនោះ លោកអភិបាលខេត្ត បានជំរាបជូនដំណឹងដល់ម្ចាស់ឃ្លាំងស្ដុកទំនិញទាំងអស់ក្នុងភូមិសាស្ត្រ ក្រុងបាត់ដំបង សុំស្នើឲ្យប្ដូរទីតាំងឃ្លាំងស្ដុកទំនិញ ដែលមាននៅក្នុងក្រុងបាត់ដំបង ទៅនៅតាមផ្លូវវាងក្រុងវិញ។ នៅក្នុង សជណ លោក សុខ លូ បានដាក់កំហិតរយៈពេលយ៉ាងយូរមួយឆ្នាំ ដោយគិតចាប់ពីថ្ងៃជូនដំណឹងនេះ ដល់ដំណាច់ខែមេសា ឆ្នាំ២០២៣ ដើម្បីឲ្យម្ចាស់ទីតាំងឃ្លាំងស្ដុកទំនិញទាំងអស់ត្រូវធ្វើឲ្យរួចរាល់ (ប្ដូរឃ្លាំងពីក្នុងក្រុង ទៅនៅផ្លូវវាងក្រុង)។ លោកអភិបាលខេត្ត បានលើកហេតុផលយ៉ាងដូច្នេះថា «កន្លងមក មានបងប្អូន អាជីវករ ពាណិជ្ជករ និងអ្នកប្រកបអាជីវកម្មផ្សេងៗ បានដឹកជញ្ជូនទំនិញលើសទម្ងន់ កម្រិតកំណត់ចូលក្នុងក្រុង ធ្វើឲ្យខូចខាតផ្លូវថ្នល់ និងរងមតិរិះគន់មកលើអាជ្ញាធរមានសមត្ថកិច្ច ពុំបានធ្វើការទប់ស្កាត់ ឬ ហាមឃាត់ទៅលើការដឹកជញ្ជូនតាមរថយន្តធុនធ្ងន់ ចូលក្រុងបាត់ដំបង» នេះជាមូលហេតុ ដែលនាំឲ្យលោកអភិបាលខេត្តសម្រេចចេញ សជណ ខាងលើនេះ។
នៅក្នុង សជណ លោក សុខ លូ បានប្រកាសថា រដ្ឋបាលខេត្ត នឹងមានវិធានការតាមផ្លូវច្បាប់យ៉ាងម៉ឺងម៉ាត់នូវរាល់ការដឹកជញ្ជូនរថយន្តធុនធ្ងន់ ចូលក្នុងក្រុងបាត់ដំបង ។ លោកបានបញ្ជាក់ថា ក្នុងរយៈពេលទុកឲ្យប្ដូរទីតាំងឃ្លាំងចេញក្រៅក្រុងនេះ ប្រសិនបើម្ចាស់ឃ្លាំងស្ដុកទំនិញពុំទាន់បានប្ដូរទីតាំងទៅផ្លូវវាងក្រុង ស្នើឲ្យមានការផ្ទេរទំនិញពីរថយន្តធុនធ្ងន់ មករថយន្តតូចៗ និង ហាមឃាត់រថយន្តធុនធ្ងន់គ្រប់ប្រភេទ ដែលមានទម្ងន់លើសពី១៦តោន (ទម្ងន់សរុប) ធ្វើចរាចរណ៏ក្នុងក្រុងបាត់ដំបង។ ប៉ុន្តែផ្ទុយពីខ្លឹមសារ ដែលមានចែងនៅក្នុង សជណ របស់លោកអភិបាលខេត្តខាងលើនេះ។ បើពិនិត្យលើកាលបរិច្ឆេតនៃ សជណ ដែលលោកអភិបាលខេត្ត ទុកឪសានុវាទរយៈពេលមួយឆ្នាំ គឺ បានផុតហើយ។
មិនតែប៉ុណ្ណោះ ថែមទាំងលើកំណត់រហូតដល់ជាងមួយខែទៀតផង។ ប៉ុន្តែជាក់ស្ដែង រហូតមកដល់ពេលនេះ គេមិនឃើញម្ចាស់ឃ្លាំងស្ដុកទំនិញ ឬ ម្ចាស់រថយន្តធុនធ្ងន់ណាម្នាក់ បានគោរព ឬ យកភ្នែកអាន សជណ របស់លោកអភិបាលខេត្តឡើយ។ រីឯសមត្ថកិច្ច ឬ អាជ្ញាធរ ដែលគេអួតថា ជាអ្នកអនុវត្តច្បាប់ ឬ ជាអ្នកអនុវត្ត សជណ នេះ ក៏ពុំឃើញមានកម្រើតដៃជើងដែរ បើទោះជាមានរថយន្តខ្នាតយក្សសណ្ដោយកន្ទុយវែងៗដូចរថយន្តភ្លើង បើកដឹកទំនិញចូលក្រុង បង្កការកកស្ទះចរាចរណ៏ស្ទើររាល់ថ្ងៃក្ដី។
ដោយឡែក បើនិយាយពីមន្ត្រីចរាចរណ៏វិញ ពូនស្ទាក់ស្ទើរគ្រប់ច្រកល្ហក នៅតាមផ្លូវចូលក្រុង ដែលគេអះអាងថា មានភារកិច្ចចាំស្ទាក់ ឬ ចាំទប់ស្កាត់រថយន្តធុនធ្ងន់ចុលក្រុង តែបែរជាគេឃើញរថយន្តធុនធ្ងន់ នៅតែអាចបើកចូលលុកលុយពេញក្នុងក្រុងបានដដែល។ មតិរិះគន់ខ្លះបាននិយាយបែបចំអកលែងសើចដល់មន្ត្រីយាមផ្លូវថា «រថយន្តសណ្ដោងកន្ទុយវែងៗ ដូចរថភ្លើង បើកកាត់មុខមន្ត្រីយាមផ្លូវ តែបែរជាមើលមិនឃើញ សង្ស័យរថយន្តចេះបំបាំងកាយ ឬ ក៏រថយន្តនោះចេះហោះ ទើបសមត្ថកិច្ចមើលមិនឃើញបែបនេះ» ៕
ចែករំលែកព័តមាននេះ