ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងនៅវេលាម៉ោង១២ និង១២នាទីថ្ងៃត្រង់ថ្ងៃទី៤ ឧសភា នៅលើកំណាត់ផ្លូវជាតិលេខ៤ចន្លោះគីឡូម៉ែត្រលេខ៣៧ និង៣៨ ខាងលិចផ្សារព្រៃផ្តៅប្រមាណ២០០ម៉ែត្រ រវាងរថយន្ត និងម៉ូតូ បណ្តាលឱ្យអ្នកជិះម៉ូតូពីរនាក់ស្លា.ប់យ៉ាងអាណោចអាធ័មនៅកន្លែងកើតហេតុ
ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងនៅវេលាម៉ោង១២ និង១២នាទីថ្ងៃត្រង់ថ្ងៃទី៤ ឧសភា នៅលើកំណាត់ផ្លូវជាតិលេខ៤ចន្លោះគីឡូម៉ែត្រលេខ៣៧ និង៣៨ ខាងលិចផ្សារព្រៃផ្តៅប្រមាណ២០០ម៉ែត្រ រវាងរថយន្ត និងម៉ូតូ បណ្តាលឱ្យអ្នកជិះម៉ូតូពីរនាក់ស្លាប់យ៉ាងអាណោចអាធ័មនៅកន្លែងកើតហេតុ ។
មន្ត្រីប៉ូលិសចរាចរខេត្តលោកវរសេនីយ៍ត្រីយ៉ែម តន បានប្រាប់កោះសន្តិភាពថា មុនពេលកើតហេតុរថយន្តម៉ាកសាំយ៉ុងមួយគ្រឿងពណ៌ទឹកប្រាក់ ដឹកអ្នកដំណើរ ពាក់ស្លាកលេខខេត្តព្រះសីហនុ 2A 3621 បើកបរពីទិសខេត្តព្រះសីហនុទៅរាជធានីភ្នំពេញ ។ លុះមកដល់ចំណុចខាងលិចផ្សារព្រៃផ្តៅប្រមាណ២០០ម៉ែត្រ ក៏បានបុកម៉ូតូគុបមូល ពណ៌ទឹកប៊ិច គ្មានស្លាកលេខជិះគ្នាពីរនាក់ពីក្រោយ ពេលដែលម៉ូតូនោះបត់ដោយមិនមានការផ្តល់ភ្លើងស៊ីញ៉ូ ឬពេលប្រុងបត់មិនមើលក្រោយ បណ្តាលឱ្យអ្នកជិះម៉ូតូត្រូវរថយន្តកិនពីលើស្លាប់ទាំងពីរនាក់ ។
ក្រោយពេលកើតហេតុ អ្នកបើកបររថយន្តបានរត់ គេចខ្លួនបាត់បន្សល់អ្នកស្លាប់នៅកន្លែងកើតហេតុ ១-ឈ្មោះឃុន សុខរី ភេទប្រុស អាយុ១៨ឆ្នាំ ជាអ្នកបើកម៉ូតូ និង២-ឈ្មោះជា លីម ភេទប្រុស អាយុ៤៨ឆ្នាំ ជិះពីក្រោយ។ អ្នកស្លាប់ទាំងពីរនាក់មានទីលំនៅភូមិត្រពាំងអណ្តូង ឃុំពាំងល្វា ស្រុកឧដុង្គ ខេត្តកំពង់ស្ពឺ ។ រថយន្ត និងម៉ូតូត្រូវសមត្ថកិច្ចយកទៅរក្សាទុកនៅការិយាល័យចរាចរណ៍ខេត្ត រង់ចាំធ្វើការដោះស្រាយតាមផ្លូវច្បាប់ ។
មន្ត្រីប៉ូលិសនិយាយថា គ្រោះថ្នាក់នេះកើត ឡើងដោយសារអ្នកបើកបរម៉ូតូធ្វេសប្រហែសពេលបត់ពុំមើលមុខមើលក្រោយថែមទាំងមិនពាក់មួកសុវត្ថិភាពទៀត ចំណែករថយន្តក៏បើកលឿនណាស់ដែរ ។ ក្រោយពីវាស់វែងរួច សពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យ ៕
ចែករំលែកព័តមាននេះ