ខេត្តបាត់ដំបង ៖ កម្លាំងនគរបាលការិយាល័យព្រហ្មទណ្ឌកំរិតស្រាលនៃស្នងការខេត្តបានកសាងសំណុំរឿងបញ្ជូនជនសង្ស័យចំនួន០៤នាក់ទៅប្រគល់ជូនតុលាការចាត់ការតាមផ្លូវច្បាប់ កាលពីព្រឹកថ្ងៃទី០៥ មិថុនា ក្រោយពីបញ្ចប់ការសាកសួរលើសំណុំរឿង «កាប់បំផ្លាញស្លាកគណបក្សប្រជាជនកម្ពុជា» នៅស្រុករុក្ខគិរី ។ សេចក្ដីរាយការណ៍បានឲ្យដឹងថា…
ខេត្តបាត់ដំបង ៖ កម្លាំងនគរបាលការិយាល័យព្រហ្មទណ្ឌកំរិតស្រាលនៃស្នងការខេត្តបានកសាងសំណុំរឿងបញ្ជូនជនសង្ស័យចំនួន០៤នាក់ទៅប្រគល់ជូនតុលាការចាត់ការតាមផ្លូវច្បាប់ កាលពីព្រឹកថ្ងៃទី០៥ មិថុនា ក្រោយពីបញ្ចប់ការសាកសួរលើសំណុំរឿង «កាប់បំផ្លាញស្លាកគណបក្សប្រជាជនកម្ពុជា» នៅស្រុករុក្ខគិរី ។
សេចក្ដីរាយការណ៍បានឲ្យដឹងថា ជនសង្ស័យរពឹសដៃទាំង០៤នាក់នោះ ១-ឈ្មោះ រិន បូរី អាយុ១៩ឆ្នាំ ២-ឈ្មោះ ប្រុញ ម៉ៃ អាយុ២១ឆ្នាំ ៣-ឈ្មោះ ជិម ចិន្តា អាយុ២២ឆ្នាំ និង៤-ឈ្មោះ នីម នុន អាយុ២៤ឆ្នាំ។ ពួកគេទាំង០៤នក់ រស់នៅភូមិកោះថ្កូវ ឃុំគារ ស្រុកមោងប្ញស្សី ។ មន្ត្រីការិយាល័យព្រហ្មទណ្ឌកំរិតស្រាលបានប្រាប់ថា ជនរពឹសដៃទាំង០៤នាក់នេះ ត្រូវបានកម្លាំងនគរបាលស្រុករុក្ខគិរី ធ្វើការស្រាវជ្រាវឃាត់ខ្លួនបានជាបន្តបន្ទាប់ ក្រោយពីសង្ស័យថា ពួកគេបានប្រើប្រាសដាវ និងកាំបិតប៉័ងតោកាប់បំផ្លាញស្លាក «គណបក្សប្រជាជនកម្ពុជា»បណ្ដាលឲ្យខូចខាតខ្ទេចខ្ទីអស់គ្មានសល់ កាលពីពាក់កណ្ដាលអធ្រាត្រថ្ងៃទី ០៣ មិថុនា នៅចំណុចភូមិទូលគគីរ ឃុំស្ដុកប្រវឹក ស្រុករុក្ខគិរី ។
គេមិនទាន់ដឹងពីមូលហេតុជាក់លាក់ដែលនាំឲ្យជនចង្រៃទាំង០៤នាក់នេះចងគំនុំជាមួយស្លាកគណបក្សខាងលើ រហូតយកដាវ និងកាំបិតប៉័ងតោ ទៅកាប់កម្ទេចចោលទាំងកណ្ដាលអធ្រាត្របែបនេះទេ ។ ប៉ុន្តែគេបានដឹងតាមរយៈរបាយការណ៍បឋមរបស់សមត្ថកិច្ចថា ការកាប់បំផ្លាញស្លាកបក្ស ស៊ី ភី ភី ខាងលើនេះ គឺកើតឡើងក្រោយពីក្រុមជនអន្ធពាលទាំង០៤នាក់នេះ នាំគ្នាផឹកស្រាសស្រវឹងធ្លាក់ភ្នែក ។
មានសាក្សីមួយចំនួនបានដឹង និងបានឃើញពីសកម្មភាពក្រុមជនពាលនេះ កាប់បំផ្លាញស្លាកបក្ស ហើយគេបានរាយការណ៏ទៅអាជ្ញាធរមូលដ្ឋាន ទើបត្រូវសមត្ថកិច្ចធ្វើការស្រាវជ្រាវ រហូតឃាត់ខ្លួនក្រុមជនដៃដល់ទាំង០៤នាក់នេះតែម្ដង ។ ស្លាកគណបក្សប្រជាជនកម្ពុជា ដែលត្រូវជនអន្ធពាលកាប់បំផ្លាញនោះ មានទំហំ១,៥ម៉x២ម៉ ដែលមានស្នាមកាប់ចិញ្ច្រាំរយះជាច្រើនកន្លែងបណ្ដាលឲ្យខូចខាតស្ទើរទាំងស្រុង ។ នេះបើតាមសេចក្ដីរាយការណ៍ពីមន្ត្រីមូលដ្ឋាន ។
យ៉ាងណាក្ដី បើតាមលោកឈឿង គឹមសុង ស្នងការរងបានប្រាប់ថា ក្រុមជនដៃដល់ទាំង០៤នាក់ខាងលើនេះ ត្រូវបានលោកស្នងការខេត្ត បញ្ជាឲ្យបញ្ជូនទៅប្រគល់ជូនតុលាការចាត់ការតាមផ្លូវច្បាប់ហើយ នៅព្រឹកថ្ងៃទី ០៥ មិថុនា ហើយតំណាងអយ្យការកំពុងសួរនាំ។
ចែករំលែកព័តមាននេះ