ខេត្តបាត់ដំបង ៖ ការប្រើប្រាស់ឧបករណ៍នេសាទដោយខុសច្បាប់គ្រប់ប្រភេទ ដែលប្រព្រឹត្តដោយក្រុមជនទុច្ចរិត បានដាក់ពង្រាយស្ទាក់ចាប់យកត្រី ពាសពេញផ្ទៃបឹងទន្លេសាបយ៉ាងអនាធិបតេយ្យនាសព្វថ្ងៃនេះ គេមិនឃើញមានសញ្ញាថមថយឡើយ ។ នេះបើយោងលើរបាយការណ៍និងវត្ថុតាងនានាដែលមន្ត្រីជំនាញចុះបង្ក្រាប និងរឹបអូសបានពីទីតាំងប្រព្រឹត្តបទល្មើសនៅតំបន់ទន្លេសាបនាពេលកន្លងមក…
ខេត្តបាត់ដំបង ៖ ការប្រើប្រាស់ឧបករណ៍នេសាទដោយខុសច្បាប់គ្រប់ប្រភេទ ដែលប្រព្រឹត្តដោយក្រុមជនទុច្ចរិត បានដាក់ពង្រាយស្ទាក់ចាប់យកត្រី ពាសពេញផ្ទៃបឹងទន្លេសាបយ៉ាងអនាធិបតេយ្យនាសព្វថ្ងៃនេះ គេមិនឃើញមានសញ្ញាថមថយឡើយ ។ នេះបើយោងលើរបាយការណ៍និងវត្ថុតាងនានាដែលមន្ត្រីជំនាញចុះបង្ក្រាប និងរឹបអូសបានពីទីតាំងប្រព្រឹត្តបទល្មើសនៅតំបន់ទន្លេសាបនាពេលកន្លងមក ។
ជាក់ស្ដែង កាលពីថ្ងៃទី០៤ មិថុនា មន្ត្រីផ្នែករដ្ឋបាលជលផលព្រែកទាល់ នៅស្រុកឯកភ្នំបានដឹកនាំកម្លាំងក្នុងសហគមន៍ចុះបង្ក្រាបបទល្មើសនេសាទជាច្រើនកន្លែង នៅក្នុងតំបន់ទន្លេសាប ក្នុងភូមិសាស្ត្រ ឃុំកោះជីវាំង ស្រុកឯកភ្នំ ដែលបានរឹបអូសវត្ថុតាងជាច្រើន ដែលសុទ្ធតែជាឧបករណ៍នេសាទខុសច្បាប់ តែពុំបានឃាត់ខ្លួនជនល្មើសណាម្នាក់ សូម្បីតែឈ្មោះម្ចាស់បទល្មើសក៏គេមិនស្កាល់ដែរ ។
បើតាមសេចក្ដីរាយការណ៍កម្លាំងសហគមន៍ចុះបង្ក្រាបបទល្មើសនេសាទ ដែលដឹកនាំដោយមន្ត្រីជលផលព្រែកទាល់ ខាងលើនេះ បានចុះទៅបង្ក្រាបលើទីតាំង០៣កន្លែង នៅក្នុងភូមិសាស្ត្រ ភូមិព្រែកទាល់ ឃុំកោះជីវាំង ស្រុកឯកភ្នំ ។ កិច្ចប្រតិបត្តិការបង្ក្រាបបទនេសាទខាងលើនេះ មន្ត្រីជំនាញរឹបអូសឧបករណ៍នេសាទខុសច្បាប់ (សាច់អួន និងឧបករណ៍ដទៃទៀត)បានរាប់ពាន់ម៉ែត្រជាវត្ថុតាង ។បើតាមរបាយការណ៍វត្ថុតាងដែលរឹបអូសបានពីទីតាំងបទល្មើសទាំង០៣កន្លែងនោះរួមមាន ១-របាំងសាច់អួនប្រវែងសរុប ១,៣០០ម៉ ២-បង្គោលឈើចំនួន៦០០ដើម និង ៣-ឡុកចាប់ត្រីចំនួន១២ឡុក ។
វត្ថុតាងទាំងនេះ ត្រូវបានដុតបំផ្លាញចោល និងបានប្រលែងកូនត្រីចម្រុះចូលក្នុងបឹងទន្លេសាបវិញជិត១០០គីឡូក្រាម ។ បើតាមមន្ត្រីជំនាញបានឲ្យដឹងថា ឧបករណ៍នេសាទខុសច្បាប់ទាំងនេះ ត្រូវបានជនទុច្ចរិតនានា ដាក់ពង្រាយនៅពាសពេញលំហរផ្ទៃបឹងទន្លេសាប ។ ទីតាំងខ្លះពួកជនល្មើសដាក់បង្គោលពាក់ស្បៃអួនលើកផុតទឹកព្រោងព្រាត ដែលយើងអាចជិះកាណូតមើលពីចម្ងាយឃើញ តែទីតាំងខ្លះពួកជនល្មើសដាក់បង្គោលបំពាក់ស្បៃអួនប៉ប្រះផ្ទៃទឹក ដែលធ្វើឲ្យយើងជួបការលំបាកក្នុងការស្វែងរកបទល្មើសទាំងនោះ ដោយសារមើលមិនឃើញ ។ប្រជាសហគមន៍ក៏បាននិយាយដែរថា សព្វថ្ងៃនេះបទល្មើសនេសាទហាក់គ្មានការថមថយទេ បើទោះជាកម្លាំងសមត្ថកិច្ច ឬ មន្ត្រីជលផលធ្វើការចុះបង្ក្រាបជាញឹកញាប់ក្ដី ។
ប្រភពដដែលបានលើកឡើងថា មូលហេតុដែលបទល្មើសនេសាទមិនអាចថយចុះបែបនេះ ដោយសារសមត្ថកិច្ចដែលចុះបង្ក្រាប រឹបអូសយកបានតែឧបករណ៍នេសាទខុសច្បាប់ រីឯម្ចាស់បទល្មើសមិនដែលឃើញគេចាប់បានយកទៅចាត់ការតាមច្បាប់ ។ ដូច្នេះហើយទើបជនប្រព្រឹត្តបទល្មើសនេសាទ នៅតែប្រព្រឹត្តបទល្មើសដដែល ហើយកាន់តែខ្លាំងឡើងៗ ស្ទើរគ្រប់ទីកន្លែងពាសពេញផ្ទៃបឹងទន្លេសាប។
មិនតែប៉ុណ្ណោះ បើតាមប្រភពដដែលនេះបានទម្លាយថា មិនត្រឹមតែមិនត្រូវបានឃាត់ខ្លួនទេ ក្រុមជនល្មើសដែលមានលុយ មានឥទ្ធិពល ថែមទាំងបានឃុបឃិតជាប្រព័ន្ធជាមួយមន្ត្រីជំនាញ ឬសមត្ថកិច្ចតាមស្ថាប័នមួយចំនួនទៀត ដែលប្រចាំការនៅតំបន់បឹងទន្លេសាបប្រព្រឹត្តបទល្មើសនេសាទយ៉ាងអនាធិបតេយ្យពេញបឹងទន្លេសាបតែម្ដង។ នេះជាមូលហេតុ ដែលមិនអាចធ្វើឲ្យបទល្មើសនេសាទថមថយបាន ។
បើទោះជាអាជ្ញាធរ ឬមន្ត្រីជំនាញប្រឹងប្រែងចុះបង្ក្រាបមួយថ្ងៃ១០ដង ក៏បទល្មើសនៅតែកើតមានដដែលដរាបណាជនល្មើសនៅតែនៅក្រៅសំណាញ់ច្បាប់។ ព្រោះជនល្មើស និងមន្ត្រីជំនាញមួយចំនួនកំពុងសហការគ្នាយ៉ាងរមួត ក្នុងការប្រព្រឹត្តបទល្មើស ខណៈដែលមានមន្ត្រីជំនាញខ្លះទៀតក៏កំពុងសម្ងំលេបប្រាក់សំណែន ប្រាក់សំណូកប្រចាំខែ ឬប្រចាំរដូវយ៉ាងផ្អែមមាត់ ៕
ចែករំលែកព័តមាននេះ