បរទេស ៖ កំពូលកីឡាករបាល់ទាត់២រូប បានប្រកាសដំណឹងធ្វើឱ្យអ្នកគាំទ្រខកចិត្ត ដោយកំពូលខ្សែប្រយុទ្ធស៊ុយអែត Zlatan Ibrahimovic ប្រកាសចូលនិវត្តន៍ពីអាជីពបាល់ទាត់នៅវ័យ ៤១ឆ្នាំ ស្របពេលកំពូលខ្សែប្រយុទ្ធបារាំង Karim Benzema នឹងចាកចេញពីក្រុមអធិរាជស Real Madrid ក្រោយចំណាយពេល ១៤ឆ្នាំជាមួយគ្នា។
Zlatan Ibrahimovic ខ្សែប្រយុទ្ធក្រុមយក្ស AC Milan នៃលីគកំពូលអ៊ីតាលី Serie A បានប្រកាសចូលនិវត្តន៍ពីអាជីពបាល់ទាត់ជាផ្លូវការ កាលពីថ្ងៃទី០៤ ខែមិថុនា ឆ្នាំ២០២៣ កន្លងទៅ។
អតីតប្រធានក្រុមជម្រើសជាតិស៊ុយអែតរូបនេះ បានថ្លែងទៅកាន់អ្នកគាំទ្ររាប់ម៉ឺននាក់ នៅក្នុងកីឡដ្ឋាន San Siro នៅក្រោយការប្រកួតបិទរដូវកាលនេះ យ៉ាងដូច្នេះថា «ខ្ញុំសូមនិយាយលាបាល់ទាត់ ប៉ុន្តែមិនមែនសម្រាប់អ្នកទេ។ វាមានអារម្មណ៍ច្រើនពេកហើយសម្រាប់ខ្ញុំនៅពេលនេះ។ លើកទីមួយដែលខ្ញុំមកទីនេះ អ្នកផ្តល់សុភមង្គលដល់ខ្ញុំ ហើយលើកទីពីរ អ្នកផ្តល់ក្តីស្រឡាញ់ដល់ខ្ញុំ។ អ្នកបានស្វាគមន៍ខ្ញុំដោយបើកចំហរ អ្នកធ្វើឱ្យខ្ញុំមានអារម្មណ៍ថាដូចផ្ទះខ្លួនឯង ខ្ញុំនឹងក្លាយជាមនុស្សរបស់ AC Milan (Milanista) ពេញមួយជីវិតរបស់ខ្ញុំ»។
គួរបញ្ជាក់ថា ពេញមួយអាជីពបាល់ទាត់ Zlatan Ibrahimovic បានលេងឱ្យក្រុមចំនួន ៩ ក្នុងនោះរួមទាំង Ajax, Juventus, Inter Milan, Barcelona, AC Milan, PSG, Manchester United និង LA Galaxy ដោយស៊ុតបញ្ចូលទីសរុប ៥១១គ្រាប់ពីការបង្ហាញខ្លួន ៨៦៦ប្រកួត និងបានឈ្នះពានរង្វាន់ជាច្រើនក្នុងរួមទាំង UEFA Europa League, FIFA Club World Cup, UEFA Super Cup, Eredivisie, Serie A, La Liga និង Ligue 1 ផងដែរ។ ជាមួយក្រុមជម្រើសជាតិស៊ុយអែត Ibrahimovic ត្រូវបានកោះហៅចូលក្នុងឈុតធំចាប់តាំងពីឆ្នាំ ២០០១ ដោយស៊ុតបញ្ចូលទីបាន ៦២គ្រាប់ពីការបង្ហាញខ្លួន ១២២ប្រកួត។
ដោយឡែក ក្នុងថ្ងៃជាមួយគ្នានោះ កំពូលខ្សែប្រយុទ្ធបារាំង Karim Benzema នឹងចាកចេញពីក្រុម Real Madrid ក្នុងនាមជាភ្នាក់ងារគ្មានតម្លៃខ្លួន (Free Agent) នៅបញ្ចប់រដូវកាលនេះ បន្ទាប់ពីចំណាយពេល ១៤ឆ្នាំ លើទឹកដី Santiago Bernabeu ស្របពេលដំណឹងចុងក្រោយបង្ហាញថា ម្ចាស់ពាន Ballon d’Or ឆ្នាំ២០២២ វ័យ៣៥ឆ្នាំរូបនេះ ទំនងនឹងផ្លាស់ទៅចូលរួមជាមួយក្រុម Al Ittihad នៅលីគកំពូលអារ៉ាប៊ីសាអូឌីត។
តាមពិតទៅ Benzema នៅសល់លក្ខខណ្ឌជម្រើសបន្ត១ឆ្នាំទៀតជាមួយ Real Madrid ប៉ុន្តែរូបគេបានសម្រេចចិត្តលុបចោល ខណៈដែលខាងក្លិបក៏បានបញ្ជាក់ថា ពួកគេគោរពតាម និងទទួលយកការសម្រេចចិត្តអនាគតរបស់កីឡាកររូបនេះ។
ស្ថានីយ៍ទូរទស្សន៍រដ្ឋ Al Ekhbariya របស់អារ៉ាប៊ីសាអូឌីតបានរាយការណ៍ថា Al Ittihad បានឈានដល់កិច្ចព្រមព្រៀងជាមួយ Benzema ក្នុងកិច្ចសន្យារយៈពេល២ឆ្នាំជាមួយនឹងមន្ត្រីក្លិបនៅទីក្រុង Madrid ប្រទេសអេស្ប៉ាញ ហើយតាមការផ្តល់ជូនក្លិបនៅអារ៉ាប៊ីសាអូឌីតមួយនេះ ដែលត្រូវបានប៉ាន់ស្មានដោយប្រព័ន្ធផ្សព្វផ្សាយថាមានតម្លៃជាង ១០០លានអឺរ៉ូឯណោះ។
គួររំលឹកជូនថា Karim Benzema បានផ្លាស់ពីក្លិប Lyon មកចូលរួមជាមួយ Real Madrid នៅក្នុងឆ្នាំ ២០០៩ ក្នុងតម្លៃ ៣៥លានអឺរ៉ូ។ រយៈពេល១៤ឆ្នាំកន្លងមកនេះ រូបគេបានស៊ុតបញ្ចូលទី ៣៥៤គ្រាប់ពីការបង្ហាញខ្លួន ៦៤៨ប្រកួតជាមួយ Real Madrid ដោយឈ្នះពានរង្វាន់ UEFA Champions League ៥ដង, UEFA Super Cup ៤ដង, FIFA Club World Cup ៥ដង, La Liga ៤ដង, Copa del Rey ៣ដង និង Spanish Super Cup ៣ដង៕
ចែករំលែកព័តមាននេះ