សិង្ហបុរី ៖ កំពូលខ្សែប្រយុទ្ធ Cristiano Ronaldo បានយកពេលសម្រាកក្រោយបញ្ចប់យុទ្ធនាការបាល់ទាត់នៃលីគកំពូលអារ៉ាប៊ីសាអូឌីតរដូវកាល ២០២២-២៣ (Saudi Pro League) ដើម្បីចំណាយពេលជួបជុំយ៉ាងពិសេសរយៈពេល ២ថ្ងៃជាមួយអ្នកគាំទ្រក្នុងប្រទេសិង្ហបុរី ពោលនៅពីថ្ងៃទី០៣-០៤ ខែមិថុនា កន្លងទៅ។
កំពូលខ្សែប្រយុទ្ធក្រុមជម្រើសជាតិព័រទុយហ្គាល់ Cristiano Ronaldo បានបញ្ចប់យុទ្ធនាការបាល់ទាត់លីគកំពូលអារ៉ាប៊ីសាអូឌីតរដូវកាល ២០២២-២៣ ជាមួយនឹងក្រុម Al-Nassr នៅក្នុងជ័យជម្នះលទ្ធផល ៣-០ លើក្រុម Al Fateh កាលពីថ្ងៃ៣១ ខែមិថុនា កន្លងទៅ។ Al-Nassr ក្រោមការដឹកនាំរបស់លោក Dinko Jelicic មិនអាចដណ្ដើមជើងឯកពានរង្វាន់ Saudi Pro League បានឡើយ ដោយពួកគេបញ្ចប់ទៅនៅចំណាត់ថ្នាក់លេខ២ តាមពីក្រោយក្រុមម្ចាស់ជើងឯក Al-Ittihad ចំនួន ៥ពិន្ទុ។
ជាក់ស្តែង កាលពីថ្ងៃទី០៤ ខែមិថុនា កន្លងទៅថ្មីៗនេះ Ronaldo បានបង្ហាញវត្តមានយ៉ាងភ្ញាក់ផ្អើល ដើម្បីបង្ហាញសមត្ថភាពលេងកីឡាប៉ាឌែលតេស្នី (Padel Tennis) យ៉ាងស្ទាត់ជំនាញនៅចំពោះមុខអ្នកគាំទ្រយ៉ាងច្រើនកុះករ។
យោងតាមរបាយការណ៍ពីសារព័ត៌មានកីឡា Goal.com បានឱ្យដឹងថា ការធ្វើទស្សនកិច្ចយ៉ាងពិសេសរបស់ខ្សែប្រយុទ្ធវ័យ ៣៨ឆ្នាំរូបនេះ ទៅកាន់ប្រទេសសិង្ហបុរី គឺដើម្បីផ្សព្វផ្សាយគំនិតផ្តួចផ្តើមសប្បុរសធម៌ រួមជាមួយមិត្តរបស់គេគឺ លោក Peter Lim ដែលជាមហាសេដ្ឋីធុរកិច្ចដ៏ល្បីរបស់ប្រទេសសិង្ហបុរី។
នៅទីនោះ Ronaldo បានបង្ហាញភាពស្និទ្ធស្នាលយ៉ាងខ្លាំងទៅកាន់អ្នកគាំទ្រ ហើយថែមទាំងបានជជែកអំពីកីឡាបាល់ទាត់ ប៉ាឌែលតេស្នី និងបាល់ទះ ទៅកាន់ក្មេងៗផងដែរ។
សូមជម្រាបថា Cristiano Ronaldo បានខកចិត្តសម្រាប់យុទ្ធនាការរដូវកាលនេះ បន្ទាប់ពីក្រុម Al-Nassr ខកខានការឈ្នះពានរង្វាន់ Saudi Pro League ប៉ុន្តែម្ចាស់ពាន Ballon d’Or ៥សម័យកាលរូបនេះ បានទទូចថា រូបគេនឹងបន្តជាមួយ Al-Nassr ហើយមិនមានគម្រោងត្រឡប់ទៅលេងនៅអឺរ៉ុបវិញទេ បើទោះបីជាមានការផ្សារភ្ជាប់ជាមួយនឹងក្រុម Bayern Munich យ៉ាងណាក៏ដោយ។
ក្រោយបញ្ចប់ដំណើរទស្សនកិច្ចនៅសិង្ហបុរី Ronaldo នឹងត្រឡប់ទៅចូលរួមជាមួយក្រុម Al-Nassr វិញក្នុងពេលឆាប់ៗនេះ ដោយក្រុមមួយនេះ គ្រោងនឹងជួបក្រុម Al-Shabab, PSG និង Inter Milan ក្នុងការប្រកួតមិត្តភាពមុនបើករដូវកាលថ្មី៕
ចែករំលែកព័តមាននេះ