អាស៊ីអាគ្នេយ៍ដែលមានប្រជាជនសរុបប្រមាណជាជាង៦០០លាននាក់ត្រូវបានគេដឹងថា គឺជាទីផ្សារម៉ូតូដ៏ធំបំផុតរបស់ពិភពលោក ហើយនៅពេលនេះ ទីផ្សារម៉ូតូដែលកំពុងតែមានសក្តានុពលខ្លាំង
អាស៊ីអាគ្នេយ៍ដែលមានប្រជាជនសរុបប្រមាណជាជាង៦០០លាននាក់ត្រូវបានគេដឹងថា គឺជាទីផ្សារម៉ូតូដ៏ធំបំផុតរបស់ពិភពលោក ហើយនៅពេលនេះ ទីផ្សារម៉ូតូដែលកំពុងតែមានសក្តានុពលខ្លាំងបំផុត គឺឥណ្ឌូនេស៊ី និង វៀតណាម ។
នៅពេលនេះ ស្ថិតិបានបង្ហាញថា គ្រាន់តែនៅប្រទេសឥណ្ឌូនេស៊ីតែមួយ គឺមានម៉ូតូសរុប ប្រមាណជា ១២៥ លានគ្រឿង ហើយប្រជាជាតិមួយនេះ ត្រូវបានគេអះអាងថា គឺជាទីផ្សារម៉ូតូដ៏ធំបំផុតនៅលើពិភពលោក ខណៈពេលដែលប្រជាជននៅក្នុងប្រទេស មានចំនួនប្រជាពលរដ្ឋសរុប ជាង ២០០ លាននាក់ បានចាត់ទុកម៉ូតូ គឺជាមធ្យោបាយធ្វើដំណើរដ៏ពេញនិយមបំផុត។
សម្រាប់វៀតណាមឯណោះវិញក៏មិនអន់ដែរ ដោយសារតែទីនោះ ថ្វីត្បិតតែមានប្រជាជនតិច ជាងឥណ្ឌូនេស៊ី ប៉ុន្តែភាគរយនៃពលរដ្ឋដែលប្រើប្រាស់ម៉ូតូក៏មានភាគរយមិនធម្មតា ពោលគឺ ធំជាងឥណ្ឌូនេស៊ីផង ប្រសិនបើគេយកតួលេខម៉ូតូធៀបនឹងចំនួនប្រជាពលរដ្ឋ។
សមាគមក្រុមហ៊ុនផលិតម៉ូតូវៀតណាម ដែលដកស្រង់ដោយកាសែត Vietnam News បានឱ្យដឹងថា ទីផ្សារម៉ូតូនៅប្រទេសនេះ បានស្ថិតក្នុងចំណោមទីផ្សារដែលមានកំណើនលឿនបំផុតលើពិភពលោកក្នុងរយៈពេលប៉ុន្មានទសវត្សរ៍ចុងក្រោយនេះ ។
ប្រភពដដែលបានអះអាងថា បច្ចុប្បន្ននេះ នៅក្នុងប្រទេសវៀតណាម ដែលមានប្រជាពលរដ្ឋ ប្រមាណជា ១០០ លាននាក់ មានម៉ូតូចុះបញ្ជីជាង៧០លានគ្រឿង ជាមួយនឹងតួលេខដែល ត្រូវបានព្យាករណ៍ថា នឹងកើនឡើងកាន់តែច្រើននាពេលអនាគត ហើយក្នុងរយៈពេល៤ខែ ដំបូងនៃឆ្នាំ២០២៣ ប្រទេសនេះបានផលិតម៉ូតូថ្មីជាងមួយលានគ្រឿង។
ក្រុមហ៊ុនផលិតធំៗចំនួន៥ ដូចជា ៖ ហុងដា, យ៉ាម៉ាហា, ស៊ុយហ្សូគី, ភៀហ្គោ និងស៊ីម ( SYM) ជាដើម គឺសុទ្ធតែបានអះអាងអំពីការជំរុញផលិតកម្មម៉ូតូរបស់ពួកគេនៅក្នុងប្រទេសនេះ។
ប្រភពដដែលបានអះអាងថា បច្ចុប្បន្ន ក្រុមហ៊ុនហុងដា នៅប្រទេសវៀតណាម ដែលកំពុង ដំណើរការរោងចក្រចំនួន៣ក្នុងប្រទេស មានសមត្ថភាពផលិតម៉ូតូរហូតដល់២,៥ លានគ្រឿង ក្នុងមួយឆ្នាំ រីឯក្រុមហ៊ុន យ៉ាម៉ាហា និងក្រុមហ៊ុនផ្សេងៗនៅក្នុងប្រទេសនេះ ក៏បានកំពុង ដំណើរការរោងចក្រចំនួន២ ដែលកំពុងតែជំរុញផលិតកម្មម៉ូតូរាប់ម៉ឺនគ្រឿងបន្ថែមទៀត ។
សម្រាប់ប្រទេសថៃវិញ ទីផ្សារម៉ូតូអាចមានច្រើនដែរ ប៉ុន្តែទោះបីជាយ៉ាងណាក៏ដោយ ក៏តូចជាងវៀតណាម និងឥណ្ឌូនេស៊ីទេ ។
យោងតាមកាសែតបាងកកប៉ុស្តិ៍ បានឲ្យដឹងថា ប្រទេសនេះមានម៉ូតូដែលចុះបញ្ជីសរុប ប្រមាណជា ២២ លានគ្រឿង ។ ទីផ្សារម៉ូតូនៅថៃ មានស្ថានភាពល្អដែរ ប៉ុន្តែដោយសារតែ គ្រោះថ្នាក់ចរាចរណ៍ដោយសារម៉ូតូខ្ពស់ពេក ជាទូទៅម៉ូតូមិនត្រូវបានលើកទឹកចិត្តឲ្យប្រើប្រាស់ឡើយ។
ដោយឡែកបើយោងតាមសារព័ត៌មាន the Straits Times បានឲ្យដឹងថា នៅទូទាំងប្រទេសម៉ាឡេស៊ី ក៏មានយានយន្តសរុប ២៣ លានគ្រឿង នៅក្នុងនោះ ៤៧ភាគរយ គឺជាម៉ូតូ ដូចនេះ ចំនួនម៉ូតូនៅក្នុងប្រទេសនេះ អាចមានប្រមាណជាជាង ១០ លានគ្រឿងដែរ ។
កម្ពុជាវិញ ថ្វីត្បិតតែជាទីផ្សារមួយដែលមានប្រជាពលរដ្ឋត្រឹមតែប្រមាណជា ១៧ លាននាក់ ប៉ុន្តែទោះបីជាយ៉ាងណាក៏ដោយ តួលេខពីក្រសួងសាធារណការ និងដឹកជញ្ជូនបានប៉ាន់ប្រមាណថា កម្ពុជាមានម៉ូតូដែលចុះបញ្ជីប្រមាណជាជាង ៦ លានគ្រឿង។
សម្រាប់ប្រទេសឡាវ ដែលមានប្រជាពលរដ្ឋប្រមាណជា៧លាននាក់ គឺមានម៉ូតូប្រមាណជា ១,៨លានគ្រឿង នៅក្នុងនោះគេដឹងថា ម៉ូតូច្រើនគេ គឺប្រមាណជា ៧០០.០០០ គ្រឿង គឺចុះបញ្ជីនៅទីក្រុងវៀងច័ន្ទ ។ ដោយ ៖ ហេង ចេស្តារ
ចែករំលែកព័តមាននេះ