រាជធានីភ្នំពេញ ៖ ក្រុមកីឡាបាល់បោះជិះរទេះកម្ពុជា ទាំងបុរស និងនារី លើវិញ្ញាសា ៣ទល់៣ វគ្គសន្សំពិន្ទុវិលជុំ បានចាញ់នៅក្នុងការប្រកួតដំបូងដូចគ្នា នៅថ្ងៃប្រកួតដំបូង…
រាជធានីភ្នំពេញ ៖ ក្រុមកីឡាបាល់បោះជិះរទេះកម្ពុជា ទាំងបុរស និងនារី លើវិញ្ញាសា ៣ទល់៣ វគ្គសន្សំពិន្ទុវិលជុំ បានចាញ់នៅក្នុងការប្រកួតដំបូងដូចគ្នា នៅថ្ងៃប្រកួតដំបូង នាព្រឹកថ្ងៃសុក្រទី០២ ខែឧសភា ឆ្នាំ២០២៣ នៅទីលានសាលដំរី នៃពហុកីឡដ្ឋានជាតិមរតកតេជោ ក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ។
នៅក្នុងការប្រកួតដំបូងនេះ គឺក្រុមការពារមេដាយមាសនារីកម្ពុជា បានប្រកួតចាញ់ក្រុមនារីថៃ ក្នុងលទ្ធផលពិន្ទុ ៧ទល់១០។ លើវិញ្ញាសានារី ៣ទល់៣នេះ មាន៤ប្រទេស គឺម្ចាស់ផ្ទះកម្ពុជា ថៃ ឡាវ និងហ្វីលីពីន។
ចំណែកវិញ្ញាសាបុរស ៣ទល់៣វិញ គឺក្រុមកម្ពុជាបានប្រកួតចាញ់ក្រុមថៃ ក្នុងលទ្ធផលពិន្ទុ ៨ទល់១៥។ វិញ្ញាសាបុរសនេះមាន៥ក្រុម គឺម្ចាស់ផ្ទះកម្ពុជា ថៃ ឥណ្ឌូណេស៊ី ម៉ាឡេស៊ី និងហ្វីលីពីន។
បើទោះបីក្រុមបុរស-នារី ចាញ់ការប្រកួតដំបូងនេះក្តី ក៏ក្រុមកម្ពុជា វិញ្ញាសាបុរស-នារី នៅសល់ច្រើនប្រកួតទៀត ដើម្បីប្រជែងនៅចំណាត់ថ្នាក់ល្អ ដើម្បីឈានទៅឡើងជុំផ្តាច់ព្រ័ត្រ ដណ្តើមមេដាយបញ្ចប់លើវិញ្ញាសា ៣នាក់ទល់៣នាក់ ទាំងបុរស-នារី នៅព្រឹកថ្ងៃសៅរ៍ស្អែកនេះ។
សូមបញ្ជាក់ថា ប្រភេទកីឡាបាល់បោះជិះរទេះនេះ មាន២វិញ្ញាសាទៀត គឺវិញ្ញាសា ៥នាក់ទល់៥នាក់ បុរស-នារី ដែលនឹងត្រូវប្រកួតសន្សំពិន្ទុវិលជុំ ដូចគ្នា ពីថ្ងៃទី០៣ ខែមិថុនា តទៅ និងបញ្ចប់នាថ្ងៃទី០៧ ខែមិថុនា ឆ្នាំ២០២៣ ខាងមុខ ៕
ចែករំលែកព័តមាននេះ