រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ដែលស្រវឹងស្រាជិះរថយន្តឈ្នួលដោយសារតោងមិនជាប់ក៏ធ្លាក់បោកក្បាលទៅនឹងថ្នល់បណ្តាលឱ្យរងរបួសធ្ងន់រហូតសន្លប់បាត់ស្មារតី ហើយត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យជ័យជំនះក្រុងតាខ្មៅ ចំណែកឯរថយន្តឈ្នួលបានគេចទៅបាត់។ ហេតុការណ៍នេះបានកើតឡើង
រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ដែលស្រវឹងស្រាជិះរថយន្តឈ្នួលដោយសារតោងមិនជាប់ក៏ធ្លាក់បោកក្បាលទៅនឹងថ្នល់បណ្តាលឱ្យរងរបួសធ្ងន់រហូតសន្លប់បាត់ស្មារតី ហើយត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យជ័យជំនះក្រុងតាខ្មៅ ចំណែកឯរថយន្តឈ្នួលបានគេចទៅបាត់។ ហេតុការណ៍នេះបានកើតឡើងកាលពីវេលាម៉ោង១២ និង៣០នាទីថ្ងៃត្រង់ ថ្ងៃទី៤ ខែឧសភា ឆ្នាំ២០១១ នៅលើកំណាត់ផ្លូវជាតិលេខ២ ស្ថិតក្នុងភូមិក្រាំងស្វាយ សង្កាត់ព្រែកកំពិស ខណ្ឌដង្កោ។
បុរសរងគ្រោះមានអាយុប្រហែល៤០ឆ្នាំចុះក្រោម សម្បុរស្រអែម ស្លៀកខោខូវប៊យជើងវែងពណ៌ខៀវ ហើយនៅក្នុងខ្លួនពុំមានលិខិតសំគាល់ ឬអត្តសញ្ញាណប័ណ្ណឡើយ ។ បុរសរូបនេះរងរបួសបែកលើចិញ្ចើមខាងស្តាំ សន្លប់បាត់ស្មារតី ហើយត្រូវបានគេនាំទៅមន្ទីរពេទ្យភ្លាមៗផងដែរ។
តាមប្រភពព័ត៌មានបានឱ្យដឹងថា នៅមុនពេលកើតហេតុបុរសនេះបានជិះលើដំបូលរថយន្តឈ្នួលមិនស្គាល់ម៉ាក១គ្រឿងធ្វើដំណើរតាមផ្លូវជាតិលេខ២ក្នុងទិសដៅពីលិចទៅកើតចូលក្រុងតាខ្មៅ។ ពេលនោះរថយន្តបើកលឿន ហើយរលាក់ផង ម្យ៉ាងបុរសនេះផឹកស្រាស្រវឹងទៀតទើបតោងមិនជាប់ក៏ធ្លាក់បោកទៅលើថ្នល់បណ្តាលឱ្យរងរបួសធ្ងន់តែម្តង។ ប្រភពពីប្រជាពលរដ្ឋបានឱ្យដឹងថា ចំណែកអ្នកបើករថយន្តឈ្នួលខាងលើពេលដឹងថាមានមនុស្សធ្លាក់ពីលើដំបូលមិនបានឈប់មើលទេ គឺបន្ថែមល្បឿនគេចទៅបាត់។ ភ្លាមៗនោះ គេបានទាក់ទងហៅរថយន្តគ្លីនិកឯកជនមកដឹកយកទៅសង្គ្រោះ ប៉ុន្តែពេលទៅដល់រថយន្តនោះអត់ទទួលយកទេ គឺបើកត្រឡប់ក្រោយវិញ ព្រោះឃើញជនរងគ្រោះមានរបួសធ្ងន់។
ប្រភពដដែលឱ្យដឹងទៀតថា ក្រោយមកកម្លាំងប៉ូលិសប៉ុស្តិ៍ព្រែកកំពិសបានចុះទៅកាន់ទីនោះ រួចនាំយកជនរងគ្រោះទៅកាន់មន្ទីរពេទ្យជ័យជំនះដើម្បីសង្គ្រោះ។ ពេលទៅដល់មន្ទីរពេទ្យ ជនរងគ្រោះដឹងខ្លួនឡើងវិញ ប៉ុន្តែរើបម្រះធាក់គ្រែពេទ្យ និងមិនឱ្យក្រុមគ្រូពេទ្យដេររបួសឱ្យទេ ។ មិនតែប៉ុណ្ណោះ ពេលគ្រូពេទ្យសួរនាំបុរសនេះមិនបានឆ្លើយអ្វីទាំងអស់ដែលធ្វើឱ្យក្រុមគ្រូពេទ្យមានការលំបាកយ៉ាងខ្លាំង ហើយពេលនេះសមត្ថកិច្ចបានអំពាវនាវ និងស្រាវជ្រាវរកក្រុមគ្រួសារ តែរកមិនទាន់ឃើញនៅឡើយ ៕
ចែករំលែកព័តមាននេះ