ខេត្តបាត់ដំបង ៖ ជនដៃដល់ម្នាក់ក្នុងចំណោមពីរនាក់ ត្រូវបានប្រជាពលរដ្ឋក្របួចកបានភ្លាមៗ និង វាយស្ទើរទក់សាច់ នៅពេលជននេះបន្លំលួចយកកាបូបលុយពីអ្នកលក់ដូរម្នាក់ កាលពីវេលាម៉ោង១រសៀលថ្ងៃទី៣១ ឧសភា នៅក្នុងផ្សារ«បវេល» ស្ថិតក្នុងឃុំបវេល ស្រុកបវេល តែបក្សពួកម្នាក់បានរត់រួចខ្លួន។
លោក សុខ សារិន អធិការស្រុកបវេលបានប្រាប់ថា ជនសង្ស័យដែលត្រូវចាប់ខ្លួនភ្លាមៗ ឈ្មោះ ពេជ្រ វ៉ាន់ឌី ហៅ លុច អាយុ៣៩ឆ្នាំ រស់នៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត រីឯម្នាក់ទៀតរត់រួចឈ្មោះ ណាក់ នី ហៅ ណោក អាយុ៣៧ឆ្នាំ នៅស្រុកថ្មគោល ខេត្តបាត់ដំបង។ លោកថា ជនសង្ស័យទាំងពីរនាក់ បានចូលក្នុងផ្សារបវេល រួចបន្លំលួចយកកាបូបលុយអ្នកលក់ដូរម្នាក់ឈ្មោះ ដួង សាវរីយ៏ ស្រីអាយុ៣៩ឆ្នាំ នៅភូមិព្រៃទទឹង ឃុំបូវិល ស្រុកបវេល។
ប៉ុន្តែពេលធ្វើសកម្មភាព ត្រូវប្រជាពលរដ្ឋនិងអ្នកលក់ដូរឃើញនិងត្រូវចាប់ខ្លួនភ្លាមៗ រួចចងទុកលើគ្រែក្នុងផ្សារ ដើម្បីប្រគល់ឲ្យសមត្ថកិច្ចចាត់ការតាមនីតិវិធី។ បើតាមជនរងគ្រោះបានប្រាប់សមត្ថកិច្ចថា លុយនៅក្នុងកបូបដែលត្រូវជនដៃដល់ខាងលើលួចនោះ មានប្រាក់ខ្មែរ៧០ម៉ឺនរៀល និង ប្រាក់ថៃចំនួន៤០០០បាត។ គាត់បានប្រាប់សមត្ថកិច្ចថា ពេលដែលគាត់កំពុងលក់ដូរ ស្រាប់តែជនដៃដល់បានបន្លំលួចយកកបូបលុយនោះ តែត្រូវគាត់និងអ្នកក្បែរនោះឃើញក៏ស្រែកចោរ ចោរ រហូតមនុស្សជាច្រើនក្របួចកបានភ្លាមៗ ចងទុកនៅលើគ្រែ ដើម្បីរង់ចាំកម្លាំងសមត្ថកិច្ចមកទទូលយក។
លោក សុខ សារិន អធិការស្រុកបវេល បានបញ្ជាក់ថា ក្រោយចាប់បានជនម្នាក់ភ្លាមៗ កម្លាំងរបស់លោកបានតាមរកបក្សពួកជននេះម្នាក់ទៀត តែជននោះបានរត់គេចខ្លួនបាត់ភ្លាមៗដែរ។ លោកអធិការបានបន្ថែមថា ជាមួយនឹងការឃាត់ខ្លួន យើងបានដកហូតកាបូបលុយនោះមកវិញរួមទាំងប្រាក់ផង ហើយក៏បានប្រគល់ជូនម្ចាស់កាបូបវិញ រីឯជនដៃដល់ត្រូវលោកស្នងការខេត្ត បញ្ជាឲ្យកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់ហើយ៕
ចែករំលែកព័តមាននេះ