ខេត្តស្ទឹងត្រែង ៖ ខេត្តស្ទឹងត្រែងនៅក្នុងរដូវបិទនេសាទ គេសង្កេតឃើញសំបូរត្រីជាច្រើនប្រភេទ ជាពិសេស ត្រីព្រួល និងត្រីក្អែក មានទំងន់មិនក្រោមពី២គីឡូដល់៥គីឡូក្រាមទេ ត្រូវគេចាក់លក់រាប់សិបតោនពេញផ្សារសាមគ្គីស្ទឹងត្រែង ក្នុងតំលៃត្រឹមតែ១.២០០០រៀល…
ខេត្តស្ទឹងត្រែង ៖ ខេត្តស្ទឹងត្រែងនៅក្នុងរដូវបិទនេសាទ គេសង្កេតឃើញសំបូរត្រីជាច្រើនប្រភេទ ជាពិសេស ត្រីព្រួល និងត្រីក្អែក មានទំងន់មិនក្រោមពី២គីឡូដល់៥គីឡូក្រាមទេ ត្រូវគេចាក់លក់រាប់សិបតោនពេញផ្សារសាមគ្គីស្ទឹងត្រែង ក្នុងតំលៃត្រឹមតែ១.២០០០រៀល ទៅ១.៥០០០រៀលក្នុង១គីឡូក្រាមតាមទីផ្សារភ្ញៀវសំរុកទិញតិច ឬច្រើន ។
រយៈពេល៣ថ្ងៃហើយ គិតចាប់ពីថ្ងៃទី២៩, ៣០ និងទី៣១ ខែឧសភា នេះ ត្រីជាច្រើនប្រភេទ ប្រជានេសាទ បាននេសាទត្រីនៅទន្លេសេកុង សេសាន មេគង្គ ក្នុងខេត្តស្ទឹងត្រែងបានរាប់តោន សុទ្ធសឹងជាត្រីមានពង ដែលមិនអាសូររក្សាអភិរក្សត្រីទុកឆ្នាំក្រោយៗឡើយ ទោះបីជារដ្ឋបាលជលផលបានចេញសេចក្តីជូនដំណឹងរដូវបិទនេសាទក្នុងដែននេសាទខេត្តស្ទឹងត្រែង គឺចាប់អនុវត្តពីថ្ងៃទី០១ ខែឧសភា ដល់ថ្ងៃទី៣០ ខែកញ្ញា រៀងរាល់ឆ្នាំ ។
ក្នុងអំឡុងពេលបិទនេសាទនេះ គឺមិនអនុញ្ញាតឲ្យធ្វើការនេសាទដោយឧបករណ៍មងគ្រប់ប្រភេទ សំដៅដើម្បីការពារត្រីមេពូជនាអំឡុងពេលបង្កកំណើតខ្ពស់នេះ ។ បញ្ឈប់ជាបន្ទាន់នូវការប្រើឧបករណ៍ឆក់ បំពុល និងគ្រឿងផ្ទុះ ដែលជាប្រភេទឧបករណ៍នាំឲ្យវិនាសអន្តរាយដល់ធនធានជលផល និងមច្ឆជាតិយ៉ាងធ្ងន់ធ្ងរបំផុត ។
ទោះបីជាក្នុងរដូវបិទនេសាទក៏ដោយ បងប្អូនប្រជានេសាទនៅតែអាចធ្វើការនេសាទ បានដោយប្រើនូវឧបករណ៍នេសាទជាលក្ខណៈគ្រួសារដូចជា៖ សៃយ៉ឺន លប សំណាញ់ សន្ទូចផ្លែមួយ អង្កេត ចាន់ តុម ទូ កញ្ច្រែងដងត្រី និងឧបករណ៍មួយចំនួនទៀតដែលច្បាប់អនុញ្ញាត សម្រាប់ផ្គត់ផ្គង់ជីវភាពគ្រួសារប្រចាំថ្ងៃ ។
លោក ស្រី វិចិត្រ នាយខណ្ឌរដ្ឋបាលជនផលស្ទឹងត្រែងបានឱ្យដឹងថា រយៈពេលបីថ្ងៃកន្លងមកនេះ ប្រជានេសាទបាននេសាទត្រីធំៗជាត្រីមេពូជ ឬត្រីធម្មតា ពិតជាមានលក់នៅទីផ្សារប្រាកដមែន ។ លោកបានបញ្ជាក់ថា៖ ប្រសិនបើប្រជានេសាទ នេសាទលក្ខណៈគ្រួសារគឺមិនមានអ្វីខុសច្បាប់ទេ ព្រោះហាមឃាត់តែការនេសាទដូចជាធ្វើការនេសាទដោយឧបករណ៍មង គ្រប់ប្រភេទ ។ បញ្ឈប់ជាបន្ទាន់នូវការប្រើឧបករណ៍ឆក់ បំពុល និងគ្រឿងផ្ទុះ ដែលជាប្រភេទឧបករណ៍នាំឲ្យវិនាសអន្តរាយ ដល់ធនធានជលផល និងមច្ឆជាតិ យ៉ាងធ្ងន់ធ្ងរបំផុត។
លោក ស្រី វិចិត្រ បានឱ្យដឹងបន្តថា ចាប់ពីយប់ថ្ងៃទី២៩ ដល់ដល់ថ្ងៃទី៣០ ខែឧសភា នេះ នាយរងខណ្ឌនាយរងផ្នែក និងមន្ត្រីខណ្ឌ សហការជាមួយប៉ុស្តិ៍នគរបាលរដ្ឋបាលឃុំថាឡាបរិវ៉ាត់ សហគមន៍នេសាទអូរត្រែល អន្លង់ស្វាយ និងកាំងដីស ចុះត្រួតពិនិត្យ និងបង្ក្រាបបទល្មើសជលផលក្នុងយុទ្ធនាការរដូវបិទនេសាទ ជាលទ្ធផលដកហូតមងបណ្ដែតប្រវែង២.២០០ម៉ែត្រ និងឃាត់ទូកអ្នកនេសាទចំនួន០៦គ្រឿង ដើម្បីណែនាំ និងធ្វើកិច្ចសន្យា។
ឆ្មាំទន្លេអភិរក្សសត្វផ្សោតប៉ុស្តិ៍កោះសំពាយ-សៀមបូកចុះត្រួតពិនិត្យបទល្មើសជលផល នៅតំបន់អភិរក្សសត្វផ្សោតកោះសន្ទក់-កាំងកូនសត្វ ស្រុកសៀមបូក បានដកហូតមង ប្រវែងសរុប៣៧០ម៉ែត្រ និងអប់រំប្រជានេសាទជាកុមារ ០២នាក់ និងបោះជំរុំប្រចាំការឃ្លាំមើលបទល្មើសបណ្ដោះអាសន្ន នៅកោះសន្ទក់ ។
ចែករំលែកព័តមាននេះ