អង្គការលើកលែងទោសអន្តរជាតិនិយាយថា ប្រទេសកូរ៉េខាងជើងមានអ្នកទោសនយោបាយដល់ទៅ២០០.០០០នាក់ ជាហេតុធ្វើឱ្យប្រទេសនេះពង្រីកមន្ទីរឃុំឃាំងជាបន្តបន្ទាប់ ។ ក្រុមសិទ្ធិមនុស្សមួយនេះនិយាយថា រូបភាពដែលថតដោយផ្ការណបបង្ហាញថា ទីតាំងនានាដែលគេដឹងថា ជាមន្ទីរឃុំឃាំងនៅក្នុងប្រទេសកូរ៉េខាងជើងជារដ្ឋកុំមុយនីស្តមួយត្រូវបានពង្រីកជាបន្តបន្ទាប់ក្នុងរយៈពេលប៉ុន្មានឆ្នាំថ្មីៗនេះ។
អតីតអ្នកទោសដែលលួចរត់ចេញពីពន្ធនាគារនៅក្នុងប្រទេសកូរ៉េខាងជើង បានពិពណ៌នាអំពីលក្ខខណ្ឌគួរឱ្យរន្ធត់នៅពន្ធនាគារនេះមានដូចជាការធ្វើទារុណកម្ម និងការខ្វះអាហារជាដើម។
អ្នកទោសជាច្រើនម៉ឺននាក់ត្រូវបានឃុំខ្លួនដោយសារមានទោសកំហុសផ្សេងៗ។ លោក Sam Zarifi នាយកអង្គការលើកលែងទោសអន្តរជាតិប្រចាំតំបន់អាស៊ីប៉ាស៊ីហ្វិក ថ្លែងថា អ្នកទោសភាគច្រើននៅកូរ៉េខាងជើងត្រូវបានគ្រប់គ្រងដូចជាទាសករ ។
នៅពេលកូរ៉េខាងជើងហាក់ដូចជាកំពុងធ្វើដំណើរឆ្ពោះទៅរកការមានមេដឹកនាំថ្មីក្រោមការដឹកនាំរបស់លោកគឹម ជុងអុ៊ន កូនប្រុសរបស់លោកគីម ជុងអុីល បញ្ហាដែលត្រូវព្រួយបារម្ភបំផុតនោះគឺមន្ទីរឃុំឃាំងនឹងត្រូងពង្រីកបន្ថែមទៀត ។
រូបភាពដែលថតដោយផ្កាយរណបបង្ហាញមន្ទីរឃុំឃាំងចំនួន៤ក្នុងចំណោមមន្ទីរឃុំឃាំងចំនួន៦ នៅលើដីនៃតំបន់ដាច់ស្រយាលក្នុងបណ្តាខេត្តនានារបស់កូរ៉េខាងជើង ៕
ចែករំលែកព័តមាននេះ