ម៉ាស៊ីនថតស្វ័យប្រវត្តិ បង្ហាញថា សត្វប្រើសកំពុងរស់នៅក្នុងតំបន់ការពារធម្មជាតិកម្ពុជា
រាជធានីភ្នំពេញ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន នៅថ្ងៃទី៣០ ខែឧសភា ឆ្នាំ២០២៣នេះ…
រាជធានីភ្នំពេញ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន នៅថ្ងៃទី៣០ ខែឧសភា ឆ្នាំ២០២៣នេះ បានអោយដឹងថា លទ្ធផល នៃការដាក់ម៉ាស៊ីនថតស្វ័យប្រវត្តិ ក្នុងតំបន់ការពារធម្មជាតិកម្ពុជា បង្ហាញថា សត្វព្រៃជាច្រើនប្រភេទ ក្នុងនោះមានប្រភេទសត្វប្រើស បាននិងកំពុងរស់នៅតាមធម្មជាតិរបស់វា ខណៈក្រសួងបរិស្ថាន សហគមន៍ និងអង្គការដៃគូអភិរក្ស បាននិងកំពុងខិតខំប្រឹងប្រែងផ្តល់ទីជម្រកប្រកបដោយសុវត្ថិភាពដល់សត្វព្រៃ និងជីវៈចម្រុះគ្រប់ប្រភេទ តាមរយៈយុទ្ធនាការអន្ទាក់សូន្យ ដើម្បីកាត់បន្ថយ និងលុបបំបាត់អន្ទាក់ពីក្នុងព្រៃ ផ្លាស់ប្តូរឥរិយាបថពលរដ្ឋ ដែលនិយមហូបសាច់សត្វព្រៃ ដោយជឿលើជំនឿផ្សេងៗ ឲ្យបញ្ឈប់ការបរិភោគសាច់សត្វព្រៃ និងបណ្តុះស្មារតីប្រជាពលរដ្ឋឲ្យស្រឡាញ់សត្វព្រៃ និងចូលរួមថែរក្សាការពារអភិរក្សសត្វព្រៃឱ្យនៅគង់វង្ស ។
សត្វប្រើសនេះត្រូវបានថតដោយម៉ាស៊ីនថតស្វ័យប្រវត្តិ ដែលបានដាក់ក្នុងតំបន់ការពារធម្មជាតិកម្ពុជា។ ប្រើសជាប្រភេទសត្វមានដោយបង្គួរ និងត្រូវបានចុះក្នុង បញ្ជីក្រហមរបស់អង្គការ IUCN ថាជាប្រភេទអាស្រ័យលើកិច្ចអភិរក្សនៅតាមតំបន់ជាក់លាក់ ដែលវារស់នៅ។ សត្វប្រើស មានវត្តមាននៅតាមតំបន់ការពារធម្មជាតិនានា នៅភូមិភាគខាងជើង និរតី និងភូមិភាគឦសាន នៃប្រទេសកម្ពុជា។ សត្វនេះក៏បានឃើញផងដែរ នៅប្រទេសឥណ្ឌា ប្រទេសចិន និងភូមិភាគអាស៊ីអាគ្នេយ៍រួមទាំងកោះស៊ូម៉ាត្រា កោះចាវា និងបរណេអូ ៕
ចែករំលែកព័តមាននេះ