បេក្ខ​ជន​នាយក​រដ្ឋមន្ត្រី​លំដាប់​ទី២​របស់​គណបក្ស​ភឿថៃ លោក​ស្រឹត្ថា ថាវិស៊ីន (Srettha Thavisin) ​​​​ច្រាន​ចោល​ពាក្យ​ចចាម​អារ៉ាម​​ដែល​និយាយ​ថា​ «​គណបក្ស​ភឿថៃ​កំពុង​មាន​របៀប​វារៈ​សម្ងាត់។​​ ​បាន​សេចក្ដី​ថា​ប្រុង​លេង​ល្បែង​បៀរ​បី​សន្លឹក ឬ​ក្បត់​សម្ព័ន្ធ​ភាព»​​។ ពាក្យ​ចចាម​អារ៉ាម​នោះ​និយាយ​ថា «​​គណបក្ស​ភឿថៃ​កំពុង​រៀប​ផែន​ការ​សម្ងាត់​ដើម្បី​ត្រៀម​បង្កើត​សម្ព័ន្ធ​ភាព​ថ្មី​១​ទៀត​។​ ជា​ពិសេស, ​​នៅ​ពេល​​សម្ព័ន្ធ​ភាព​​ដែល​ដឹក​នាំ​ដោយ​គណបក្ស​ឆ្ពោះ​ទៅ​មុខ​​មិន​អាច​គ្រប់​សំឡេង​អនុម័ត​ពី​សភា​​​។​

​​ទោះ​បី​រឿង​នេះ​ពិត​ ឬ​មិន​ពិត​កម្រិត​ណា​នៅ​មិន​ទាន់​ដឹង​ទេ​។ ​នៅ​ក្នុង​រឿង​នយោបាយ​ អ្វី​ក៏​អាច​កើត​ឡើង​ដែរ​នៅ​ពី​ក្រោយ​វាំង​នន​ខ្មៅ​។ ប៉ុន្តែ​នៅ​ខាង​ក្រៅ​ឆាក​, មន្ត្រី​ជាន់​ខ្ពស់​​គណ​បក្ស​ភឿថៃ​រូប​នេះ​​ចេញ​មក​បដិសេធ​យ៉ាង​ដាច់​អហង្ការ​ថា​គ្មាន​រឿង​​​​បែប​នេះ​​​ទេ​។ អ្នក​វិភាគ​យល់​ថា​រឿង​នេះ​ជា​បញ្ហា​រសើប​​។​ ​នៅ​ក្នុង​ស្ថាន​ភាព​ដ៏​ផុយ​ស្រួយ​នេះ,​ គណបក្ស​ធំៗ​ទាំង​២ ឆ្ពោះ​ទៅ​មុខ​ និង​ភឿថៃ អាច​នឹក​យក​លេស​ដើម្បី​​​និយាយ​យក​ត្រូវ​រៀង​ៗ​ខ្លួន​ ប្រសិន​បើ​សម្ព័ន្ធ​ភាព​គណបក្ស​ទាំង​៨​ត្រូវ​បែក​បាក់​គ្នា​។​

បាន​សេចក្ដី​ថា​​បើ​ភឿថៃ​ធ្វើ​អ្វី​មិន​ស្រួល​​នៅ​ក្នុង​ពេល​នេះ មហា​ជន​អាច​នឹង​វិនិច្ឆ័យ​ថា «​​មក​ពី​ភឿថៃ​​មិន​ស្មោះ​ត្រង់​នឹង​ដៃ​គូ​នយោបាយ​ ទើប​បាន​ជា​​គណ​បក្ស​​ឆ្ពោះ​ទៅ​មុខ​​ ​មិន​ព្រម​ប្រគល់​តំណែង​ប្រធាន​រដ្ឋ​សភា​​»​។​ រឿង​នេះ​កាន់​តែ​បង្ក​ការ​សង្ស័យ​បន្ទាប់​ពី​ក្រុម​អនាមិក​បង្ហោះ​នៅ​លើ​បណ្ដាញ​ទ្វីត​ថឺ​នូវ​រូប​ថត​របស់​លោក​ស្រឹត្ថា ថត​ជា​មួយ​ប្រធាន​គណបក្ស​ភូមិ​ចៃថៃ។

​​អ្នក​ទាំង​២​អញ្ជើញ​ទៅ​​ទស្សនា​បាល់​ទាត់​នៅ​អង់គ្លេស​​។​ លោក​ស្រឹត្ថា​បក​ស្រាយ​​ត្រង់​ចំណុច​នេះ​ថា «​​វា​គ្រាន់​តែ​ជា​រឿង​ចៃ​ដន្យ​តែ​ប៉ុណ្ណោះ​»​។​ សូម​ជម្រាប​ថា​គណបក្ស​ភូមិ​ចៃថៃ​ក៏​ទទួល​បាន​អាសនៈ​នៅ​ក្នុង​រដ្ឋ​សភា​ច្រើន​គួរ​សម​ផង​ដែរ​រហូត​ដល់​ជាង​៧០​កៅ​អី​។ ​លោក​ស្រឹត្ថា​ថ្លែង​ថា​ «​តាម​ពិត​ទៅ, រូប​លោក​ និង​​ប្រធាន​គណបក្ស​ភូមិ​ចៃថៃ ​ជា​មនុស្ស​ស្គាល់គ្នា​​ក្នុង​ក្រប​ខណ្ឌ​បុគ្គល​តាំង​ពី​យូរ​មក​ហើយ​។​ កាល​នោះ, យើង​គ្រាន់​តែ​សម្ដែង​ការ​គួរ​សម​ដាក់​គ្នា​ និង​និយាយ​សំណេះ​សំណាល​​គ្នា​​នៅ​ពេល​ជួប​គ្នា​ដោយ​ចៃដន្យ​»​។

​​លោក​បញ្ជាក់​ថា​បើ​ពួក​លោក​ត្រូវ​ការ​និយាយ​រឿង​នយោបាយ​មិន​ចាំ​បាច់​ជិះ​យន្ត​ហោះ​ចម្ងាយ​ណា​ណី​ទៅ​និយាយ​គ្នា​ដល់​អង់គ្លេស​ទេ។​ ​និយាយ​គ្នា​ត្រឹម​តែ​នៅ​​ប្រទេស​ថៃ​វា​បាន​ណាស់​ទៅ​ហើយ​​។ ប៉ុន្តែ​​អ្នក​វិភាគ​យល់​ថា​ការ​បក​ស្រាយ​របស់​លោក​ស្រឹត្ថា​មិន​អាច​​ធ្វើ​ឱ្យ​មហា​ជន​​អស់​សង្ស័យ​ទេ​។​ ​​​ថ្មីៗ​នេះ, ​​លោក​ស្រី​ផែថងថាន​​​ក៏​បាន​​ធ្វើ​ដំណើរ​ទៅ​ក្រៅ​ប្រទេស​ផង​ដែរ​ដើម្បី​​ជួប​លោក​ថាក់​ស៊ីន​ នៅ​ក្នុង​ស្ថាន​ភាព​ដែល​មាន​ការ​ខ្វែង​គំនិត​គ្នា​ពាក់​ព័ន្ធ​នឹង​តំណែង​ប្រធាន​រដ្ឋ​សភា​ ដែល​ភឿថៃ​ចង់​បាន​។

តាម​ពិត ពាក្យ​ចចាម​អារ៉ាម​មិន​មែន​សុទ្ធ​តែ​ជា​ពាក្យ​ប្រឌិត​ទាំង​ស្រុង​ទេ​។ ជួន​កាល​ពាក្យ​ចចាម​អារ៉ាម​ក៏​អាច​មាន​ការ​ពិត​ខ្លះ​​ផង​ដែរ​។ ជា​ពិសេស ពាក្យ​ចចាម​អារ៉ាម​ខ្លះ​ចេញ​ពី​ប្រភព​ដែល​ដឹង​រឿង​អាថ៌​កំបាំង​នៅ​ក្នុង​ផ្ទៃ​ក្នុង​បក្ស​នយោបាយ​នី​មួយ​ៗ​។ ជួន​កាល​ជា​ចេត​នា​របស់​គណបក្ស​ទម្លាយ​រឿង​ហ្នឹង​ចេញ​ទៅ​ខាង​ក្រៅ​តែ​ម្ដង​ដើម្បី​ជា​ការ​ក្រើន​រម្លឹក​ដៃ​គូ​នៅ​ក្នុង​សម្ព័ន្ធ​ភាព​។​

​ពាក្យ​ចចាម​អារ៉ាម​ផ្ដើម​ចេញ​ពី​​​ថៅកែ​ហាង​ម៉ាស្សា​ លោក​ឈូវីត (Chuvit)ដែល​បាន​បង្ហោះ​នៅ​លើ​ហ្វេស​ប៊ុក​កាល​ពី​មុន​​នោះ​។ លោក​សរសេរ​​​ថា «​​​គណបក្ស​ខ្លះ​កំពុង​តែ​រៀប​ជើង​ព្រួល​បណ្ដើរ​ៗ​ហើយ​។ ​​លោក​ថា​បើ​​​សម្ព័ន្ធ​ភាព​គណបក្ស​ទាំង​៨​ដាក់​សំណើ​ទៅ​សភា​ ប៉ុន្តែ​មិនអាច​អនុម័ត​ចេញ, ​ដល់​វេន​ដែល​​គណបក្ស​ភឿថៃ​ដាក់​ស្នើ​បេក្ខ​ភាព​របស់​ខ្លួន​ទៅ​សភា​​វិញ​ម្ដង​​»​។

​​​លោក​ស្រី​​ផែ​ថង​ថាន​ក៏​បាន​ចេញ​មុខ​បដិសេធ​ពាក្យ​ចចាម​អារ៉ាម​នេះ​។ លោក​ស្រី​បង្ហាះ​រូប​ថត​​នៃ​កិច្ច​ប្រជុំ​គណបក្ស​ដែល​ចូល​រួម​ដោយ​មន្ត្រីធំ​១​​​របស់​​បក្ស​។ លោកស្រីភ្ជាប់​​ពាក្យ​ពេចន៍​អត្ថា​ធិប្បាយ​ភ្ជាប់​នឹង​រូប​ថត​ថា​ តើ​នេះ​ជា​ «​កិច្ច​ព្រម​ព្រៀង​សម្ងាត់» ឬ​ក៏​ជា​ «​កិច្ច​ព្រម​ព្រៀង​ស្នេហា»។​ ​​ប្រធាន​គណបក្ស​ភឿថៃ​ លោ​កឆូលណាន ​​​បញ្ជាក់​​​ថា​គណបក្ស​របស់​លោក​គ្មាន​​​​​​ការ​ចរ​ចា​សម្ងាត់​អ្វី​ទាំង​អស់​។ លោក​​​​ថា​​ការ​ធ្វើ​ដំណើរ​របស់​លោក​ស្រឹត្ថា​ទៅ​អង់គ្លេស​​ជា​រឿង​ឯក​ជន​របស់​លោក​តែ​ប៉ុណ្ណោះ​៕​​

ប្រភព៖ កាសែត​បាងកក​ប៉ុស្តិ៍ និង​ប្រភព​ដទៃ​ទៀត
https://www.bangkokpost.com/thailand/politics/2580871/srettha-denies-rumoured-secret-deal-to-usurp-mfp