ខេត្តកណ្តាល ៖ ប៉ូលិសការិយាល័យប្រឆាំងគ្រឿងញៀ.ន ដឹកនាំដោយលោកវរសេនីយ៍ឯកលន់ សុផាត ស្នងការរងទទួលបន្ទុកប្រឆាំងគ្រឿងញៀន បានបំបែកសំបុកចែកចាយគ្រឿងញៀនមួយកន្លែង និងបំបែកសំបុកប្រើប្រាស់គ្រឿងញៀ.នមួយកន្លែងទៀត ព្រមទាំងឃាត់ខ្លួនមនុស្សប្រុស ស្រីចំនួន៦នាក់ និងរឹបអូសបានវត្ថុតាងថ្នាំញៀន
ខេត្តកណ្តាល ៖ ប៉ូលិសការិយាល័យប្រឆាំងគ្រឿងញៀន ដឹកនាំដោយលោកវរសេនីយ៍ឯកលន់ សុផាត ស្នងការរងទទួលបន្ទុកប្រឆាំងគ្រឿងញៀន បានបំបែកសំបុកចែកចាយគ្រឿងញៀនមួយកន្លែង និងបំបែកសំបុកប្រើប្រាស់គ្រឿងញៀនមួយកន្លែងទៀត ព្រមទាំងឃាត់ខ្លួនមនុស្សប្រុស ស្រីចំនួន៦នាក់ និងរឹបអូសបានវត្ថុតាងថ្នាំញៀន និងឧបករណ៍ប្រើប្រាស់មួយចំនួន ។
លោកវរសេនីយ៍ឯកលន់ សុផាត បានឱ្យដឹងថា ដោយអនុវត្តតាមបទបញ្ជារបស់អគ្គស្នងការនគរបាលជាតិ និងដោយមានការណែនាំចង្អុលបង្ហាញពីលោកស្នងការ កម្លាំងការិយាល័យជំនាញបានធ្វើការស្រាវជ្រាវយ៉ាងយកចិត្តទុកដាក់រហូតដល់កំណត់មុខសញ្ញា និងកំណត់បាននូវទីតាំងចែកចាយ និងប្រើប្រាស់គ្រឿងញៀន ហើយលោកបានដឹកនាំកម្លាំង និងបញ្ជាដោយផ្ទាល់ធ្វើការឆែកឆេរទីតាំងចែកចាយ និងប្រើប្រាស់គ្រឿងញៀនពីរករណីផ្សេងពីគ្នា ។
ករណីទី១ នៅវេលាម៉ោង៣ និង៥០នាទីរសៀលថ្ងៃទី២ ឧសភា យើងបានធ្វើការឆែកឆេរនៅចំណុចផ្ទះឈ្មោះម៉ក់ សែត នៅភូមិព្រែកថ្មី ឃុំកំពង់ស្វាយ ស្រុកកៀនស្វាយ ឃាត់ខ្លួនជនសង្ស័យចែកចាយគ្រឿងញៀន២នាក់ប្តីប្រពន្ធដែលប្តីឈ្មោះសែត ចន្ថា អាយុ២១ឆ្នាំ ប្រពន្ធឈ្មោះសំរិទ្ធ អានី អាយុ២២ឆ្នាំ អ្នកទាំងពីរនៅភូមិព្រែកថ្មី ឃុំកំពង់ស្វាយ ស្រុកកៀនស្វាយ និងចាប់យកវត្ថុតាងថ្នាំញៀនប្រភេទមេតំហ្វេតាមីនទឹកកក ចំនួន១១កញ្ចប់តូចស្មើនឹង០,៨៥ក្រាម និងសំភារប្រើប្រាស់មួយចំនួនទៀត ។
ករណីទី២ ជាករណីប្រើប្រាស់គ្រឿងញៀន ដោយកម្លាំងជំនាញបានសហការជាមួយប៉ូលិសក្រុងតាខ្មៅ កាលពីវេលាម៉ោង៧ និង៨នាទីយប់ ថ្ងៃទី២ ឧសភា ដដែល ធ្វើការឃាត់ខ្លួនជនសង្ស័យប្រើប្រាស់ថ្នាំញៀន៤នាក់នៅចំណុចផ្ទះឈ្មោះម៉ាវ អ៊ូ នៅភូមិដើមមៀន សង្កាត់ដើមមៀន ក្រុងតាខ្មៅ ។ ជនសង្ស័យទាំង៤នាក់នេះមាន១-ឈ្មោះម៉ាវ អ៊ូ ភេទប្រុស អាយុ៣១ឆ្នាំ ជាអ្នកផ្តល់ទីតាំង និងប្រើប្រាស់គ្រឿងញៀន ២-ឈ្មោះទុំ ចាន់ធារ៉ូ ភេទប្រុស អាយុ៣១ឆ្នាំ ជាអ្នកប្រើប្រាស់ អ្នកទាំងពីរនៅភូមិដើមមៀន សង្កាត់ដើមមៀន ក្រុងតាខ្មៅ ៣-ឈ្មោះសុខ សុវុត្ថា ភេទប្រុស អាយុ២០ឆ្នាំ ទីលំនៅបច្ចុប្បន្នផ្ទះលេខ២៥ ផ្លូវលេខ២២៦ សង្កាត់ផ្សារដើមគ ខណ្ឌទួលគោក រាជធានីភ្នំពេញ និង៤-ឈ្មោះឈាង ម៉េងស៊្រាង ភេទប្រុស អាយុ២០ឆ្នាំ ទីលំនៅបច្ចុប្បន្នផ្ទះលេខ១៤៧ ផ្លូវលេខ១២២ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។
ក្រោយពីឃាត់ខ្លួន សមត្ថកិច្ចរឹបអូសបានវត្ថុតាងថ្នាំញៀនប្រភេទមេតំហ្វេតាមីនទឹកកចំនួន២កញ្ចប់ និងសំភារប្រើប្រាស់គ្រឿងញៀនមួយចំនួន ។ ចំពោះករណីទាំងពីរនេះ ការិយាល័យប្រឆាំងគ្រឿងញៀនបានកសាងសំណុំរឿងបញ្ជូនទៅកាន់សាលាដំបូង ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ