ខេត្តបន្ទាយមានជ័យ ៖ ក្រោយមានករណីបាត់នារីម្នាក់ជាអ្នកលក់ក្រឡាន នៅតាមបណ្តោយផ្លូវជាតិលេខ៥ ក្នុងភូមិសាស្ត្រឃុំបន្ទាយនាង ស្រុកមង្គលបូរី ហើយត្រូវបានអ្នកសារព័ត៌មានក្នុងស្រុក និងអ្នកនិយមលេងសង្គមហ្វេសប៊ុកមួយចំនួនបានបង្ហោះផ្សព្វផ្សាយចែកចាយព័ត៌មានថា នារីលក់នំក្រឡាន នៅឃុំបន្ទាយនាង…
ខេត្តបន្ទាយមានជ័យ ៖ ក្រោយមានករណីបាត់នារីម្នាក់ជាអ្នកលក់ក្រឡាន នៅតាមបណ្តោយផ្លូវជាតិលេខ៥ ក្នុងភូមិសាស្ត្រឃុំបន្ទាយនាង ស្រុកមង្គលបូរី ហើយត្រូវបានអ្នកសារព័ត៌មានក្នុងស្រុក និងអ្នកនិយមលេងសង្គមហ្វេសប៊ុកមួយចំនួនបានបង្ហោះផ្សព្វផ្សាយចែកចាយព័ត៌មានថា នារីលក់នំក្រឡាន នៅឃុំបន្ទាយនាង ស្រុកមង្គលបូរី ត្រូវបានជនមិនស្គាល់មុខចា.ប់ញាត់រថយន្ត រួចដឹកយកទៅបាត់ ។ នេះបើតាមស្នងការដ្ឋាននគរបាលខេត្តបន្ទាយមានជ័យបានបង្ហោះមុននេះ។
ទន្ទឹមគ្នានេះ នៅខេត្តបន្ទាយមានជ័យ ក៏មានគណនីហ្វេសប៊ុកមួយ ឈ្មោះ Maly kubota កាលពីថ្ងៃទី១៩ ខែឧសភានេះ វេលាម៉ោង១៤:៣០នាទី បានបង្ហោះសារថា «មានក្មេងប្រុសមួយក្រុមជិះឡានម៉ាកលុចស៊ីស និងហាយឡែនឌ័រ ពណ៌ទឹកប្រាក់ បានចា.ប់ក្មួយស្រីរបស់ខ្ញុំឡើងឡាន កំពុងតែអង្គុយលក់ក្រឡាន នៅបណ្ដោយផ្លូវជាតិលេខ៥ ទិសដៅប្រហែលទៅផ្លូវប៉ោយប៉ែត ។ សូមបងៗប៉ូលិសជួយចាប់ និងធ្វើអន្តរាគមន៍ផង» ។
អ្នកនាំពាក្យ និងក្រុមការងារប្រតិកម្មរហ័សស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២៨ ខែឧសភា ឆ្នាំ២០២៣នេះ សូមច្រានចោលទាំងស្រុង រាល់ការចុះផ្សាយពត៌មានខាងលើ ក្រោយទទួលបានពត៌មានខាងលើ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំបញ្ជាកម្លាំងផែនជំនាញព្រហ្មទណ្ឌ កម្លាំងអធិការនគរបាលស្រុកមង្គលបុរី សហការជាមួយកម្លាំងអធិការដ្ឋាននគរបាលក្រុង-ស្រុកទាំង៩ បានបើកការស៊ើបអង្គេត និងស្រាវជ្រាវ ជាលទ្ធផលបានបង្ហាញថា ព័ត៌ខាងលើ គឺជាព័ត៌មានមិនពិត គ្មានមូលដ្ឋានប្រភពច្បាស់លាស់ ជាព័ត៌មានបំពុលសង្គម ។
ពាក់ព័ន្ធករណីខាងលើ លោកស្រី ឆប គឹមឡាង ដែលត្រូវជាម្ដាយកូនស្រីដែលបានបាត់ខ្លួនបានចេញមុខអះអាងថា ពុំមានករណីជនណាចាប់ជម្រិត ឬចា.ប់កូនគាត់ទេ នេះ គឺជារឿងស្នេហារបស់កូនៗគាត់ប៉ុណ្ណោះ សូមសាធារណជនកុំមានការយល់ច្រឡំ ។
ជាក់ស្តែង នៅថ្ងៃទី២៨ ខែឧសភា ឆ្នាំ២០២៣នេះ នារីដែលគេផ្សាយព័ត៌មានថា បាត់ខ្លួននោះបានចេញមុខបំភ្លឺថា នាងមានឈ្មោះ ខ្នួច ស៊ីមាន ភេទស្រី អាយុ១៩ឆ្នាំ នៅភូមិពោធិរៀង ឃុំអូរប្រាសាទ ស្រុកមង្គលបូរី កាលពីរថ្ងៃទី១៩ ខែឧសភានេះ វេលាម៉ោង១៦ និង៣០នាទីខ្លួនបានអង្គុយលក់ក្រឡាន នៅមុខសាលាឃុំបន្ទាយនាង ក្រោយមកខ្លួនបានឡើងឡានទៅជាមួយឈ្មោះ សុខ វណ្ណៈ ហៅប៉ែត អាយុ២៨ឆ្នាំ នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ដោយគ្មានការបង្ខិតបង្ខំ រឺចា.ប់ជំរិតទេ ពីព្រោះខ្លួន និងឈ្មោះ សុខវណ្ណៈ ហៅប៉ែតនេះបានស្រឡាញ់គ្នាយូរមកហើយ គឺពួកគេទៅដើរលេងជាមួយគ្នាតែប៉ុណ្ណោះ ។
អាស្រ័យហេតុនេះ សូមសាធារណជនមេត្តាជ្រាប និងកុំមានការភាន់ច្រឡំ អ្នកនាំពាក្យ និងក្រុមការងារប្រតិកម្មរហ័សស្នងការដ្ឋានដ្ឋាននគរបាលខេត្តបន្ទាយមានជ័យ សូមអំពាវនាវ ប្រជាពលរដ្ឋ អ្នកលេងបណ្តាញសង្គមហ្វេសបុក ដែលមិនទាន់ដឹងការពិត គ្មានមូលមូលដ្ឋានច្បាស់លាស់ ផ្សាយមិនពិត គឺជាការបំភ្លៃសក្ខីកម្មនាំឲ្យខុសច្បាប់ ធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សង្គម និងធ្វើឲ្យប៉ះពាល់ការប្រឹងប្រែងរបស់នគរបាលជាតិ ។
ថ្នាក់ដឹកនាំនៃស្នងការដ្ឋាននគរបាលខេត្តបន្ទាយមានជ័យ នឹងចាត់វិធានការតាមផ្លូវច្បាប់ ចំពោះជនទាំងឡាយណាដែលប្រឌិតរឿងដែលនាំឲ្យមានចលាចលសង្គម ៕
ចែករំលែកព័តមាននេះ