ភ្លៀងលាយឡំទៅដោយខ្យល់កន្ត្រាក់ធ្វើផ្ទះសម្បែងជិត៤០ខ្នងរងការខូចខាត
- បន្ទាយមានជ័យ
ភ្លៀងលាយឡំទៅដោយខ្យល់កន្ត្រាក់ ធ្វើឱ្យប៉ះពាល់ដល់២ឃុំ បណ្ដាលឱ្យផ្ទះសម្បែងរបស់ប្រជាពលរដ្ឋរងការខូចខាតអស់ចំនួន៣៦ខ្នងផ្ទះ បង្កឱ្យមាន
ខេត្តបន្ទាយមានជ័យ ៖ ភ្លៀងលាយឡំទៅដោយខ្យល់កន្ត្រាក់ ធ្វើឱ្យប៉ះពាល់ដល់២ឃុំ បណ្ដាលឱ្យផ្ទះសម្បែងរបស់ប្រជាពលរដ្ឋរងការខូចខាតអស់ចំនួន៣៦ខ្នងផ្ទះ បង្កឱ្យមានការភ្ញាក់ផ្អើលកាលពីថ្ងៃទី២៦ ខែឧសភា ឆ្នាំ២០២៣ ស្ថិតនៅក្នុងស្រុកអូរជ្រៅ។
លោក កែវ តារារស្មី អភិបាលស្រុកអូរជ្រៅ បានប្រាប់ថា នៅស្រុកអូរជ្រៅ មាបភ្លៀងលាយឡំដោយខ្យល់កន្ត្រាក់ ធ្វើឱ្យប៉ះពាល់២ឃុំ ហើយផ្ទះសម្បែងរបស់ប្រជាពលរដ្ឋរងការខូចខាតដោយប៉ើងដំបូល និងរលំអស់ចំនួន៣៦ខ្នងផ្ទះ ក្នុងនោះរួមមាន ៖ ១- ឃុំចង្ហា ប៉ះពាល់២៨ខ្នង ២- ឃុំសឹង្ហ ប៉ះពាល់ចំនួន៨ខ្នង និងរងការដួលរំលំស្លាកសញ្ញាគណបក្សចំនួន២ផងដែរ។
លោកបានបញ្ជាក់ថា ក្រោយរងគ្រោះដោយសារខ្យល់កន្ត្រាក់ អាជ្ញាធរស្រុកនិងឃុំ បានចុះពិនិត្យ និងរាយការណ៍ជូនគណៈកម្មាធិការគ្រប់គ្រងគ្រោះមន្តរាយខេត្ត និងសុំកងកម្លាំងដើម្បីជួយអន្តរាគមន៍ជួសជុលផ្ទះជូនប្រជាពលរដ្ឋផងដែរ ក្រោយពេលស្រុកអូរជ្រៅមានភ្លៀងធ្លាក់ជាប់គ្នារយៈពេល២ថ្ងៃមកហើយ និងរងគ្រោះដោយខ្យល់កន្ត្រាក់ ប៉ុន្តែសំណាងគ្មានអ្នកណារងគ្រោះនោះទេ។
លោក កែវ តារារស្មី បានកោតសរសើរចំពោះកងកម្លាំងយោធា និងនគរបាលកងរាជអាវុធហត្ថ ក្រោយទទួលបានព័ត៌មានប្រជាពលរដ្ឋរងគ្រោះដោយសារខ្យល់កន្ត្រាក់ ក៏បានចុះទៅជួយអន្តរាគមន៍ជួសជុលរហូតរួចរាល់៕
ចែករំលែកព័តមាននេះ