រាជធានីភ្នំពេញ ៖ ថ្លែងជាសាធារណៈសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានកោតសរសើរចំពោះអតីតនាយករដ្ឋមន្ដ្រីថៃ លោក ថាក់ស៊ីន ស៊ីណាវ៉ាត្រា និងលោកស្រី យីងឡាក់ស៊ីណាវ៉ាត្រា ដែលកំពុងរស់នៅក្រៅប្រទេសមិនដែលអំពាវនាវឱ្យបរទេសកាត់ជំនួយដល់ប្រទេសថៃមិនដូចអ្នកប្រឆាំងនៅកម្ពុជាវិញតែងតែអំពាវនាវដល់បណ្ដាប្រទេសនានាកាត់ជំនួយមកកម្ពុជា ។
ថ្លែងនាឱកាសអញ្ជើញសំណេះសំណាលជាមួយកម្មករនិយោជិតក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ (ROYAL GROUP PIINOM PENH SEZ) នៅព្រឹក ថ្ងៃទី២៧ ខែឧសភា ឆ្នាំ២០២៣ សម្ដេចតេជោ ហ៊ុន សែន បានឱ្យដឹងថា នៅប្រទេសថៃអ្នកនយោបាយគេប្រឆាំងគ្នា ក៏ប៉ុន្ដែពួកគេមិនដែលសម្លា.ប់ជនជាតិរបស់ខ្លួនឡើយតាមរយៈការអំពាវនាវកុំឱ្យបរទេសមកវិនិយោគ ឬឈប់ទិញទំនិញនោះទេ ។
សម្ដេចតេជោ បញ្ជាក់ថា «ខ្ញុំសូមសរសើរអតីតនាយករដ្ឋមន្ដ្រីថៃ ថាក់ស៊ីន ស៊ីណាវ៉ាត្រា-យីងឡាក់ ស៊ីណាវ៉ាត្រា ដែលជាអតីតនាយករដ្ឋមន្ដ្រីថៃទាំងបង ទាំងប្អូន ទោះបីគេទម្លាក់ដោយរដ្ឋប្រហារ ហើយរស់នៅបរទេសដែលមិនចូលក្នុងស្រុកបាន ប៉ុន្ដែអ្នកទាំងពីរមិនមែនអំពាវនាវបរទេសកាត់ជំនួយ ឬឈប់ទិញទំនិញថៃ ឬឈប់វិនិយោគក្នុងប្រទេសថៃ» ។
សម្តេចតេជោ បានលើកឡើងថា វាជារឿងអយុត្តិធម៌ពន់ពេកណាស់ចំពោះគ្រួសារ ថាក់ស៊ី និងយីងឡាក់ ត្រូវបានគេធ្វើរដ្ឋប្រហារទម្លាក់ពីតំណែងនាយករដ្ឋមន្ត្រីជាបន្តបន្ទាប់ គ្មានបរទេសណា ឬក្រុមប្រឆាំងណាមួយចេញមុខថ្កោលទោស ឬប្រឆាំងសកម្មភាពរដ្ឋប្រហារនោះឡើយ ។
ជុំវិញបញ្ហាអតីតនាយករដ្ឋមន្ត្រីថៃទាំងនេះ សម្ដេចនាយករដ្ឋមន្ដ្រីលើកឡើងថា ប៉ុន្ដែអ្នកជ្រុលនិយមនៅកម្ពុជាវិញទៅដល់ទីណាទាមទារឱ្យបរទេសឈប់ទិញទំនិញនៅកម្ពុជា ឬដាក់ទណ្ឌកម្មនានាមកលើប្រទេសកម្ពុជា ខណៈសម្ដេច បានឱ្យដឹងថា រងចាំមើលជោគវាសនារបស់ពួកអ្នកឯងទៅក្រោយអំពាវនាវឱ្យបរទេសកាត់ជំនួយលើកម្ពុជា ។
សម្ដេចគូសបញ្ជាក់ទៀតថា «ប៉ុន្ដែមិននឹកស្មានថា អ្នកជ្រុលនិយមក្នុងប្រទេសកម្ពុជាទៅអំពាវនាវឱ្យបរទេសដាក់ទណ្ឌកម្មលើខ្មែរឈប់ទិញទំនិញខ្មែរមិនមកវិនិយោគនៅខ្មែរក៏ប៉ុន្ដែពួកអ្នកឯងរងចាំមើលជោគវាសនារបស់ពួកអ្នកឯងទៅ»។
សូមជម្រាបថា ទណ្ឌិត សម រង្ស៊ី ឬអ្នកប្រឆាំងមួយចំនួនទៀតបានធ្វើនយោបាយបិទខ្ទ ប់ដង្ហើមសេដ្ឋកិច្ចជាតិ តាមរយៈអំពាវនាវឱ្យបរទេសកាត់ជំនួយ ឬឈប់វិនិយោគនៅកម្ពុជា និងយកប្រជាជនធ្វើជាចំណាប់ខ្មាំង ដើម្បីអំណាចខ្លួន ។ ខណៈអ្នកនយោបាយទូទៅធ្វើអ្វីដើម្បីជំរុញការអភិវឌ្ឍន៍សេដ្ឋកិច្ចជាតិ និងជីវភាពរបស់ប្រជាជន៕
ចែករំលែកព័តមាននេះ