WHO ព្រមានថា ពិភពលោកត្រូវត្រៀមខ្លួន សម្រាប់ជំងឺសកលថ្មី អាចអាក្រក់ជាងកូវីដ-១៩
ស្វីស ៖ ប្រធានអង្គការសុខភាពពិភពលោក កាលពីថ្ងៃទី២៣ ខែឧសភា ឆ្នាំ២០២៣ បានធ្វើការ
ស្វីស ៖ ប្រធានអង្គការសុខភាពពិភពលោក កាលពីថ្ងៃទី២៣ ខែឧសភា ឆ្នាំ២០២៣ បានធ្វើការព្រមានថា បណ្តារដ្ឋាភិបាលនៃប្រទេសទូទាំងពិភពលោក ត្រូវតែត្រៀមខ្លួនជាស្រេចសម្រាប់ជំងឺរាតត្បាតថ្មី (បង្ការទុកមុន) ដែលអាចបង្កមានអ្នកស្លា.ប់ច្រើនជាងជំងឺរាតត្បាតកូវីដ-១៩ ដើម្បីបញ្ចៀសសោកនាដកម្មកាន់តែអាក្រក់។ នេះបើយោងតាមប្រភពពីសារព័ត៌មានចក្រភពអង់គ្លេស Independent ចេញផ្សាយកាលពីថ្ងៃទី២៣ ខែឧសភា កន្លងទៅ។
លោកវេជ្ជបណ្ឌិត Tedros Adhanom Ghebreyesus ប្រធានអង្កការសុខភាពូពិភពលោក ដែលហៅកាត់ថា WHO បានថ្លែងក្នុងសន្និបាតសុខភាពប្រចាំឆ្នាំរបស់ខ្លួន នៅទីក្រុងហ្សឺណែវ ប្រទេសស្វីស ថា វាដល់ពេលដែលត្រូវជំរុញការចរចាលើការការពារសម្រាប់ជំងឺរាតត្បាតបន្ទាប់។ លោកបានព្រមានថា រដ្ឋនានាមិនអាចមិនអើពើ ឬធ្វេសប្រហែសបាននោះទេ ដោយសារជំងឺសាកលបន្ទាប់អាចមានឥទ្ធិពលខ្លាំងក្លា។
លោកវេជ្ជបណ្ឌិតបាននិយាយថា «ប្រសិនបើយើងមិនធ្វើការផ្លាស់ប្តូរ ដែលត្រូវធ្វើ នោះ តើអ្នកណានឹងធ្វើ? ហើយបើយើងមិនបង្កើតវិធានការឥឡូវនេះទេ តើនៅពេលណាទើបបង្កើត?»។
លើសពីនេះទៀត លោកបានបន្ថែមថា «ការគំរា.មកំហែងនៃការប្រែប្រួលផ្សេងទៀតដែលបង្កឱ្យមានការកើនឡើងនៃជំងឺថ្មី និងការស្លា.ប់ នៅតែមាន។ ហើយការគំរាមកំហែងនៃមេរោគមួយផ្សេងទៀត ដែលកំពុងលេចចេញមកជាមួយនឹងសក្ដានុពលធ្ងន់ធ្ងរជាងនេះ នៅតែមាន»។
សន្និបាតសុខភាពពិភពលោកប្រចាំឆ្នាំរយៈពេល១០ថ្ងៃ នៅក្នុងទីក្រុងហ្សឺណែវ ត្រូវបានកំណត់ដើម្បីដោះស្រាយបញ្ហាប្រឈមសុខភាពជាសកល រួមទាំងជំងឺរាតត្បាតនាពេលអនាគតផងដែរ។ ប្រទេសសមាជិកចំនួន ១៩៤ របស់ WHO បច្ចុប្បន្នកំពុងចរចារកំណែទម្រង់ចំពោះច្បាប់ចង ដែលជួសជុលកាតព្វកិច្ចរបស់ពួកគេ ក្នុងករណីមានការគំរាមកំហែងសុខភាពអន្តរជាតិ។ ពួកគេក៏កំពុងធ្វើសេចក្តីព្រាងសន្ធិសញ្ញាស្តីពីជំងឺរាតត្បាតដ៏ទូលំទូលាយ ដែលនឹងផ្តល់សច្ចាប័ននៅឆ្នាំក្រោយ។
លោកវេជ្ជបណ្ឌិត Tedros បានបន្តថា «ការប្តេជ្ញាចិត្តពីជំនាន់នេះ ចំពោះកិច្ចព្រមព្រៀងជំងឺរាតត្បាត គឺមានសារៈសំខាន់បំផុត ព្រោះវាគឺជាមនុស្សជំនាន់នេះ ដែលបានជួបប្រទះនូវអ្វីដែលមេរោគតូចមួយអាចកាន់តែអាក្រក់»។
ការព្រមាននេះ ធ្វើឡើងតែប៉ុន្មានសប្តាហ៍ប៉ុណ្ណោះ បន្ទាប់ពីទីភ្នាក់ងារសុខភាពបានលើកឡើងថា ជំងឺរាតត្បាតកូវីដ-១៩ លែងជាគ្រាអាសន្នសកលតទៅទៀតហើយ ហើយ WHO ក៏បានអះអាងថា ប្រទេសនានាគួរតែគ្រប់គ្រងជំងឺរាតត្បាត ដែលបានសម្លា.ប់មនុស្សជាង ៦.៩លាននាក់ នៅទូទាំងពិភពលោកនេះ បានដោយខ្លួនឯង។
យោងតាមទិន្នន័យ WHO បានបង្ហាញថា អត្រាមរណភាពដោយជំងឺកូវីដ-១៩ បានថយចុះពីកម្រិតកំពូលជាង១០ម៉ឺននាក់ក្នុងមួយសប្តាហ៍នៅក្នុងខែមករា ឆ្នាំ ២០២១ មកត្រឹមជាង ៣,៥០០នាក់ក្នុងមួយសប្តាហ៍រហូតដល់ថ្ងៃទី២៣ ខែមេសា ឆ្នាំ ២០២៣ ដែលនេះឆ្លុះបញ្ចាំងពីការចាក់វ៉ាក់សាំងបង្ការយ៉ាងទូលំទូលាយ លទ្ធភាពទទួលបានការព្យាបាលប្រសើរជាងមុន និងកម្រិតនៃភាពស៊ាំរបស់ប្រជាជនពីការឆ្លងពីមុន៕
ចែករំលែកព័តមាននេះ