មានប្រជាពលរដ្ឋប្រមាណ៣០នាក់ រស់នៅក្នុងភូមិត្រពាំងតាអី ឃុំព្រៃតាអី ស្រុកស្វាយទាប បានលើកគ្នាតវ៉ាទាមទារឲ្យអាជ្ញាធរឃុំ ដោះស្រាយរក្សាទុកស្រះរណ្តៅដីមួយកន្លែងដែលប្រជាពលរដ្ឋបានចោទប្រកាន់ថា ក្រុមហ៊ុនធ្វើការអភិវឌ្ឍ ហើយបិទផ្លូវមិនឲ្យប្រជាពលរដ្ឋចូលអាស្រ័យផល (ចូលនេសាទត្រី និងឲ្យគោក្របីចុះផឹកទឹក) ដោយទាមទារទុក
ខេត្តស្វាយរៀង ៖ មានប្រជាពលរដ្ឋប្រមាណ៣០នាក់ រស់នៅក្នុងភូមិត្រពាំងតាអី ឃុំព្រៃតាអី ស្រុកស្វាយទាប បានលើកគ្នាតវ៉ាទាមទារឲ្យអាជ្ញាធរឃុំ ដោះស្រាយរក្សាទុកស្រះរណ្តៅដីមួយកន្លែងដែលប្រជាពលរដ្ឋបានចោទប្រកាន់ថា ក្រុមហ៊ុនធ្វើការអភិវឌ្ឍ ហើយបិទផ្លូវមិនឲ្យប្រជាពលរដ្ឋចូលអាស្រ័យផល (ចូលនេសាទត្រី និងឲ្យគោក្របីចុះផឹកទឹក) ដោយទាមទារទុកស្រះរណ្តៅដីនេះ ជាទ្រព្យសម្បត្តិសហគមន៍។
ក៏ប៉ុន្តែក្រុមហ៊ុនបានលើកឡើងថា ស្រះរណ្តៅដីទំហំ១,២៥ហិកតានេះ ក្រុមហ៊ុនបានទិញពីប្រជាពលរដ្ឋម្ចាស់ដីដែលមានឈ្មោះ ឈុន គឹមលន់ មិនមែនជាស្រះ ឬត្រពាំងសាធារណៈរបស់ឃុំ ឬសហគមន៍នោះទេ។
បើតាមឈ្មោះ សួន វុត្ថា ភេទប្រុស អាយុ៣៣ឆ្នាំ ជាប្រជាពលរដ្ឋរស់នៅក្នុងភូមិត្រពាំងតាអី ដែលជាតំណាងឲ្យប្រជាពលរដ្ឋមកតវ៉ា បានឱ្យដឹងថា ពួកគេមកតវ៉ានេះ ដោយសារក្រុមហ៊ុន បានឈូសឆាយដីមាត់ស្រះ និងលុបដីរណ្តៅមាត់ស្រះ (សង្ស័យក្រុមហ៊ុនធ្វើការអភិវឌ្ឍន៍) ហើយបិទផ្លូវមិនឲ្យប្រជាពលរដ្ឋចូលអាស្រ័យផល ដូចជា ៖ ចូលនេសាទត្រី និងយកសត្វគោ ក្របី ចូលផឹកទឹកនៅរដូវប្រាំងនោះទេ។ ទើបប្រជាពលរដ្ឋលើកគ្នាតវ៉ាសុំឲ្យអាជ្ញាធរភូមិ-ឃុំដោះស្រាយរក្សាស្រះរណ្តៅដីនេះ ទុកជាសម្បត្តិសហគមន៍ អាស្រ័យផល ដោយទុកភ្លឺទំហំ០៤ម៉ែត្រជុំវិញស្រះ និងរក្សាទុកផ្លូវ ថ្នល់លំទំហំទទឹង០៨ម៉ែត្រ ប្រវែងប្រមាណជាង២០០ម៉ែត្រពីផ្លូវជាតិលេខ៣១៧B ដល់មាត់ស្រះទុកជាផ្លូវសាធារណៈ។
ទាក់ទិនករណីខាងលើនេះដែរ លោក ស្រី សុខសាវណ្ណ មេភូមិត្រពាំងតាអី បានមានប្រសាសន៍ផងដែរថា តាមពិតស្រះរណ្តៅដីនេះ ជាដីស្រែម្ចាស់ដើមឈ្មោះ យ៉ាន់រី ភេទស្រី អាយុ៧២ឆ្នាំ និងប្តីឈ្មោះ កែន ពៅ អាយុ៧៦ឆ្នាំ រស់នៅភូមិត្រពាំងតាអី ឃុំព្រៃតាអី បានលក់ឲ្យឈ្មោះ ឈុន គឹមលន់ ភេទប្រុស ជាអតីតមេឃុំព្រៃតាអី នៅឆ្នាំ២០០៦។ ហើយលោក ឈុន គឹមលន់ បានលក់អាចម៍ដីឲ្យទៅឈ្មោះ កាំង ម្ចាស់គ្រឿងចក្រជីករណ្តៅដីយកអាចម៍ដីទៅធ្វើផ្លូវលំ ដែលជាគម្រោងផ្លូវលំជនបទរបស់ក្រសួងអភិវឌ្ឍន៍ជនបទ។ បន្ទាប់ពីក្រុមហ៊ុនទទួលការជីករណ្តៅដីយកអាចម៍ដីសាងសង់ផ្លូវលំ រួចក៏ប្រគល់រណ្តៅដីឲ្យទៅលោក ឈន់ គឹមលន់ វិញ។
ទាក់ទិនករណីនេះដែរ លោក នុត ផល្លា មេឃុំព្រៃតាអី បានប្រាប់អ្នកសារព័ត៌មានឱ្យដឹងថា លោកទើបតែកាន់តំណែងជាមេឃុំបានប៉ុន្មានឆ្នាំទេ លោកមិនបានដឹងរឿងលំអិតឡើយ ដោយសារអ្នកលក់ក៏ស្លា.ប់ លោកមេឃុំចាស់ សាម ឆាន ក៏ស្លា.ប់។ ក៏ប៉ុន្តែបើតាមឯកសារលក់ទិញ ដីស្រះរណ្តៅដីនេះ គឺមិនមែនជាស្រះសាធារណៈរបស់រដ្ឋ ឬរបស់ឃុំទេ គឺជាដីឯកជនរបស់ប្រជាជនបានលក់តៗគ្នា៣ម្ចាស់មកហើយ ចុងក្រោយ ក្រុមហ៊ុនបានទិញពីឈ្មោះឈុន គឹម លន់។
ទោះបីយ៉ាងណាក៏ដោយ ក្នុងនាមលោកជាអាជ្ញាធរ និងស្នើសុំឲ្យលោក សួស សម្បត្តិ តំណាងក្រុមហ៊ុនម្ចាស់ដីរក្សាស្រះរណ្តៅដីទុកជាសម្បត្តិរបស់ឃុំ ដើម្បីឲ្យប្រជាពលរដ្ឋបានប្រើប្រាស់អាស្រ័យផលបន្តទៀត៕
ចែករំលែកព័តមាននេះ