សម្តេចតេជោ ៖ តើឲ្យខ្ញុំទៅពឹងអ្នកណា បើមិនពឹងចិន?
- ព្រះសីហនុ
ខេត្តព្រះសីហនុ ៖ ថ្លែងចេញពីទឹកដីខេត្តព្រះសីហនុជាថ្មីម្តងទៀត សម្តេចតេជោ ហ៊ុន សែន នាយករដ្ឋមន្ត្រីបានគូសបញ្ជាក់ថា បើមិនឲ្យកម្ពុជាទៅពឹងមិត្តចិន ទៅឲ្យពឹងទៅអ្នកណា ។…
ខេត្តព្រះសីហនុ ៖ ថ្លែងចេញពីទឹកដីខេត្តព្រះសីហនុជាថ្មីម្តងទៀត សម្តេចតេជោ ហ៊ុន សែន នាយករដ្ឋមន្ត្រីបានគូសបញ្ជាក់ថា បើមិនឲ្យកម្ពុជាទៅពឹងមិត្តចិន ទៅឲ្យពឹងទៅអ្នកណា ។ ការលើកឡើងនេះបន្ទាប់ពីមានមួយចំនួននាំគ្នាថា កម្ពុជាកំពុងតែខិតទៅរកចិន ។
ថ្លែងក្នុងពិធីសំណេះសំណាលជាមួយកម្មករ និយោជិត ទស្សនាពិព័រណ៌សមិទ្ធផល និងពិធីសម្ពោធដាក់ឱ្យដំណើរការរោងចក្រផលិតសំបកកង់ ដើម្បីអបអរសាទរខួបលើកទី១០ នៃគំនិតផ្តួចផ្តើមខ្សែក្រវ៉ាត់មួយ ផ្លូវមួយ នៅតំបន់សេដ្ឋកិច្ចពិសេស ក្រុងព្រះសីហនុ នាព្រឹកថ្ងៃទី២២ ឧសភា ឆ្នាំ២០២៣ សម្តេចតេជោ បានបញ្ជាក់យ៉ាងដូច្នេះថា ៖«ក្នុងសន្និសីទសារព័ត៌មានតាមអនឡាញស្តីពីអនាគតអាស៊ីអ្នកសម្របសម្រួលបានសួរថា ឯកឧត្តមប្រហែលទៅកៀកចិនពេកហើយ? ខ្ញុំឆ្លើយត្រង់ថា បើមិនឲ្យខ្ញុំពឹងចិន តើឲ្យខ្ញុំពឹងអ្នកណា? ស្ពាន ផ្លូវប្រឡាយ ទឹក ពេលនេះវ៉ាក់សាំង បើមិនពឹងចិន តើខ្ញុំបានវ៉ាក់សាំងចាក់ប្រជាពលរដ្ឋពេលនេះ» ។
សម្តេចបន្តថា បើខ្ញុំមិនពឹងចិនទេ តើឲ្យខ្ញុំទៅពឹងអ្នកណា? ឧទាហរណ៍៖ ចិនបានជួយធ្វើស្ពានឆ្លងកាត់ទន្លេមគង្គ ហើយស្ពានគីស្សូណា ខ្ញុំហ៊ាននិយាយថា បើខ្ញុំមិនពឹងជប៉ុន តើឲ្យខ្ញុំទៅពឹងអ្នកណា? ផ្លូវជាតិលេខ១ តភ្ជាប់ទៅផ្លូវជាតិលេខ៥ នៅកំពង់ឆ្នាំង បើមិនពឹងជប៉ុន តើពឹងអ្នកណា? សម្តេចបានលើកឡើងថា សូមអ្នកកុំច្រណែននឹងសម្តេចថា ទៅពឹងចិន ឬពឹងជប៉ុនអី បើអ្នកមិនធ្វើតាមខ្ញុំក៏ខ្ញុំមិនដឹងធ្វើយ៉ាងណាដែរ ។ ពេលខ្លះមួយថ្ងៃៗអ្នកបានទះកំផ្លៀងខ្ញុំរហូត ។
សម្តេចក៏បានបន្ថែមថា ចិនបានបបួលសម្តេចធ្វើជាមិត្ត ហេតុអ្វីជាមិត្តម៉េចពិបាកនោះ ។ សម្តេចបញ្ជាក់ថា ៖«បើអ្នកមិនជឿខ្ញុំ ខ្ញុំក៏មិនជឿអ្នកដែរ វាមិនមែនជាសិទ្ធិ តែអ្នកឯងទេ ។ វាក៏ជាសិទ្ធិរបស់ខ្ញុំដែរត្រូវយល់អំពីបញ្ហាហ្នឹង» ។ សម្តេចបានលើកឡើងថា នៅពេលឆ្លងជំងឺកូវីដ១៩ បើគ្មានវ៉ាក់សាំងចិនទេ ប្រហែលជាអ្នកខ្លះគ្មានមុខមកដល់ពេលនេះទេ ។
សម្តេចតេជោ ក៏បានលើកឡើងថា តាមការពិនិត្យនយោបាយការបរទេសរបស់ចិន នៅពេលនេះមិនបានប្រកាសធ្វើសត្រូវជាមួយប្រទេសណាមួយនោះទេ ទោះបីជាអ្នកដទៃបានរកវិធីរារាំងចិន ក៏ប៉ុន្តែចិនមិនដែលរារាំង ឬធ្វើសត្រូវជាមួយប្រទេសណាមួយនោះទេ ។ ដូច្នេះគោលនយោបាយ ខ្សែក្រវ៉ាត់ និងផ្លូវចេញតែរីក ។
ជាក់ស្តែងនោះកិច្ចព្រមព្រៀងអាស៊ានចិនបានផ្តល់ផលប្រយោជន៍ធំណាស់ សម្រាប់បណ្តាប្រទេសអាស៊ាន ។ ប្រទេសអាស៊ាននាំចូលទៅប្រទេសចិនច្រើនជាង ចិននាំចូលប្រទេសអាស៊ាន ។ អីញ្ចឹងទេ សហប្រតិបត្តិការក្របខណ្ឌអាស៊ាន-ចិន ផ្តល់ផលប្រយោជន៍សម្រាប់ប្រទេសអាស៊ាន ៕
ចែករំលែកព័តមាននេះ