មន្ត្រីស្ថានទូតអូស្ត្រាលីប្រចាំរាជធានីភ្នំពេញបានឱ្យដឹងនៅថ្ងៃទី៣ ឧសភា ថា ស្ថានទូតអូស្ត្រាលីគ្រោងនឹងបញ្ចាំងភាពយន្តឯកសារមួយស្តីអំពីការរកឃើញវ៉ាក់សាំងមួយប្រភេទអាចទប់ស្កាត់ និងការពារជំងឺមហារីក ដោយសាស្ត្រាចារ្យមួយរូបគឺលោកអៀន ហ្វ្រាហ្ស៊ឺ (Ian Franzer) ជាជនជាតិស្កុតឡែន នៅថ្ងៃទី៤ ឧសភា នៅស្ថានទូតអូស្ត្រាលីតែម្តង
មន្ត្រីស្ថានទូតអូស្ត្រាលីប្រចាំរាជធានីភ្នំពេញបានឱ្យដឹងនៅថ្ងៃទី៣ ឧសភា ថា ស្ថានទូតអូស្ត្រាលីគ្រោងនឹងបញ្ចាំងភាពយន្តឯកសារមួយស្តីអំពីការរកឃើញវ៉ាក់សាំងមួយប្រភេទអាចទប់ស្កាត់ និងការពារជំងឺមហារីក ដោយសាស្ត្រាចារ្យមួយរូបគឺលោកអៀន ហ្វ្រាហ្ស៊ឺ (Ian Franzer) ជាជនជាតិស្កុតឡែន នៅថ្ងៃទី៤ ឧសភា នៅស្ថានទូតអូស្ត្រាលីតែម្តង។
យោងតាមឯកសារដែលទទួលបានពីស្ថានទូតអូស្ត្រាលីឱ្យដឹងថា លោកអៀន ហ្វ្រាហ្ស៊ឺ កើតនៅថ្ងៃទី៦ មករា ឆ្នាំ១៩៥៣ ក្នុងទីក្រុងអ៊ីឌីនប៊ើក ប្រទេសស្កុតឡែន ជានាយកវិទ្យាស្ថាន Diamantina ហើយលោកជាអ្នករកឃើញ និងបង្កើតវ៉ាក់សាំង HPV ទប់ស្កាត់ និងការពារជំងឺមហារីក ជាប្រភេទវ៉ាក់សាំងប្រឆាំងជំងឺមហារីកទី២ ។
លោកសាស្ត្រាចារ្យអៀន ហ្វ្រាហ្ស៊ឺ ទទួលបានពានរង្វាន់ពីនាយករដ្ឋមន្ត្រីអូស្ត្រាលីកាលពី ឆ្នាំ២០០៨ កន្លងមក សម្រាប់ជំនាញរបស់លោក ហើយលោកទទួលបានការបណ្តុះបណ្តាលជាគ្រូពេទ្យផ្នែកជំងឺតម្រងនោម និងគ្រូពេទ្យផ្នែករកថ្នាំប្រឆាំងជំងឺផ្សេងៗនៅក្នុងទីក្រុងអ៊ីឌីនប៊ើក ប្រទេសស្កុតឡែន មុនពេលលោកទៅកាន់ទីក្រុងមែលប៊ន ប្រទេសអូស្ត្រាលី នៅឆ្នាំ១៩៨០ ដើម្បីបន្តការសិក្សារបស់លោកផ្នែកស៊ាំវិទ្យា (ការសិក្សាអំពីភាពស៊ាំនឹងរោគ) នៅវិទ្យាស្ថានស្រាវជ្រាវផ្នែកសុខាភិបាល Walter and Elizal Hall ជាមួយសាស្ត្រាចារ្យ Ian Mackay ។ នៅឆ្នាំ១៩៨៥ លោកបានផ្លាស់ទៅរស់នៅក្នុងទីក្រុង Brisban ដើម្បីទទួលតំណែងជាគ្រូបង្រៀននៅសាកលវិទ្យាល័យក្រុង Queensland ហើយបច្ចុប្បន្នលោកមានតួនាទីជានាយកវិទ្យាស្ថាន Diamentina ។ ការចាប់អារម្មណ៍ផ្នែកស្រាវជ្រាវនាពេលបច្ចុប្បន្នរបស់សាស្ត្រាចារ្យអៀនហ្វ្រាហ្ស៊ឺ គឺជាការបង្កើតវ៉ាក់សាំងប្រឆាំងជំងឺមហារីក ។ លោកទទួលមូលនិធិសម្រាប់ដំណើរការស្រាវជ្រាវរបស់លោកពីអង្គការជាច្រើនរបស់ប្រទេសអូស្ត្រាលី និងសហរដ្ឋអាមេរិក ។
កាលពីឆ្នាំ២០០៥ កន្លងមក លោកទទួលបានពានរង្វាន់ CSIRO Eureka សម្រាប់ស្នាដៃរបស់លោក ដែលគេឱ្យឈ្មោះថា «ជាមេដឹកនាំផ្នែកវិទ្យាសាស្ត្រ» ហើយនៅឆ្នាំ២០០៦ លោកត្រូវបានគេដាក់ឈ្មោះឱ្យថា «ជនជាតិអូស្ត្រាលីប្រចាំឆ្នាំ» សម្រាប់ស្នាដៃរបស់លោកដែលបានបង្កើតវ៉ាក់សាំងទប់ស្កាត់ និងការពារជំងឺមហារីក។
នៅខែមីនា ឆ្នាំ២០០៧ លោកត្រូវបានផ្តល់ឱ្យនូវមេដាយដ៏មានកិត្យានុភាព Howard Florey សម្រាប់ការស្រាវជ្រាវផ្នែកសុខាភិបាលរបស់លោក ហើយនៅឆ្នាំ២០០៨ លោកទទួលបានពានរង្វាន់ Balzan ជាពានរង្វាន់លក្ខណៈអន្តរជាតិដ៏សំខាន់សម្រាប់ការសម្រេចបានផ្នែកវិទ្យាសាស្ត្រដ៏លេចធ្លោរបស់លោក និងការបង្កើតថ្នាំពេទ្យបង្ការជំងឺមានរយៈពេលយូរអង្វែង។
នៅឆ្នាំ២០០៩ សាស្ត្រាចារ្យអៀន ហ្វ្រាហ្ស៊ឺ ត្រូវបានជ្រើសតាំងជាប្រធានគណៈកម្មាធិការស្រាវជ្រាវផ្នែកសុខាភិបាលនៃមូលនិធិស្រាវជ្រាវផ្នែកជំងឺមហារីកអូស្ត្រាលី ។ ក្រោយមកលោកក្លាយជាប្រធានក្រុមប្រឹក្សាប្រឆាំងជំងឺមហារីកអូស្ត្រាលី ៕
ចែករំលែកព័តមាននេះ