រាជធានី​ភ្នំពេញ ៖ នគរបាល​ការិយាល័យ​ព្រហ្មទណ្ឌ​កម្រិត​ស្រាល នៃ​នាយកដ្ឋាន​ព្រហ្មទណ្ឌ​ក្រសួងមហាផ្ទៃ កាលពី​ថ្ងៃ​ទី​១៤ ខែឧសភា ឆ្នាំ​២០២៣ បាន​ចាប់ខ្លួន​ជនជាតិ​វៀតណាម​ប្រុស​ស្រី​ចំនួន​៦​នាក់ បញ្ជូន​ទៅ​កាន់​សាលាដំបូង​រាជធានី​ភ្នំពេញ ពាក់ព័ន្ធ​ករណី «​បង្ខាំង​ធ្វើ​ទា​រុ​.​ណ​កម្ម និង​ជ​ម្រិ​.​ត​ទារប្រាក់​ពី​ជន​រង​គ្រោះ​ដែល​ជា​ជនជាតិ​វៀតណាម​ដូច​គ្នា​»​។

ជនសង្ស័យ​ទាំង​៦​នាក់​ខាងលើ​នេះ រួម​មាន ៖ ១- ឈ្មោះ LE MING HAU ភេទ​ប្រុស អាយុ​២៦​ឆ្នាំ​, ២- ឈ្មោះ TRAN VAN CONG ភេទ​ប្រុស អាយុ​៤១​ឆ្នាំ​, ៣- ឈ្មោះ NGUYEN VAN SANG ភេទ​ប្រុស អាយុ​៤៣​ឆ្នាំ​, ៤- ឈ្មោះ DO LUONG TRUNG ភេទ​ប្រុស អាយុ​២៥​ឆ្នាំ​, ៥- ឈ្មោះ NGUYEN VAN DUNG ភេទ​ប្រុស អាយុ​៤០​ឆ្នាំ និង​៦- ឈ្មោះ THANH THUY ភេទ​ស្រី អាយុ​៤១​ឆ្នាំ​។

បើ​តាម​សមត្ថកិច្ច​បាន​បង្ហើប​ឲ្យ​ដឹង​ថា ការ​ចាប់ខ្លួន​ជនសង្ស័យ​ជា​ក្រុម​ចាប់ជម្រិត​ខាងលើ គឺ​ធ្វើ​ឡើង​តាម​ពាក្យបណ្តឹង​របស់​ជន​រង​គ្រោះ​ឈ្មោះ TRUONG VANCAN ភេទ​ប្រុស ជា​ជនជាតិ​វៀតណាម​ដូច​គ្នា បាន​ប្តឹង​ចោទប្រកាន់​ជនសង្ស័យ​ទាំង​៦​នាក់​ពី​បទ «​បង្ខាំង ធ្វើ​ទា​រុ​.​ណ​កម្ម និង​ជម្រិត​ទារប្រាក់​» កាលពី​ថ្ងៃ​ទី​៨ ខែឧសភា ឆ្នាំ​២០២៣ ប្រព្រឹត្ត​នៅ​រាជធានី​ភ្នំពេញ​។

ក្រោយ​ពី​ទទួល​បាន​ពាក្យបណ្តឹង​របស់​ជន​រង​គ្រោះ​ភ្លាម លោក​ឧត្តមសេនីយ៍ឯក ង៉េ​ង ជួ ប្រធាន​នាយកដ្ឋាន​នគរបាល​ព្រហ្មទណ្ឌ បាន​បញ្ជា​ទៅ​លោក​វរសេនីយ៍ឯក ឡេ​ង ហួរ ប្រធាន​ការិយាល័យ​នគរបាល​ព្រហ្មទណ្ឌ​កម្រិត​ស្រាល ដឹកនាំ​កម្លាំង​បើក​ការ​ស៊ើបអង្កេត និង​ស្រាវជ្រាវ​រយៈពេល​២​ថ្ងៃ​ក្រោយមក ទើប​ឈាន​ដល់​កា​ចាប់ខ្លួន​ជនសង្ស័យ​ទាំង​៦​នាក់​នោះ​។ បន្ទាប់​ពី​ចាប់ខ្លួន យោង​តាម​ពាក្យបណ្តឹង និង​ចម្លើយ​ជនសង្ស័យ​ទាំងអស់​គឺ​ស៊ីសង្វាក់​ពាក់ព័ន្ធ​ទៅ​នឹង​បទល្មើស បន្ទាប់​មក​សមត្ថកិច្ច​ក៏​បាន​កសាង​សំណុំរឿង​បញ្ជូន​ជនសង្ស័យ​ទាំងអស់​ទៅ​កាន់​សាលាដំបូង​រាជធានី​ភ្នំពេញ ចាត់ការ​តាម​នីតិវិធី​។ លុះ​មក​ដល់​រសៀល​ថ្ងៃ​ទី​១៥ ខែឧសភា នេះ ដំណើរការ​សាកសួរ​បាន​ឆ្លងកាត់​ពី​ស្ថាប័ន​អយ្យកា​រហើយ ហើយ​សំណុំរឿង​បាន​បន្ត​ដល់​ដៃ​ខាង​ចៅក្រម​ស៊ើបសួរ តែ​មិន​ទាន់​សម្រេច​យ៉ាង​នៅឡើយ​ទេ​។

សមត្ថកិច្ច​បន្ត​ថា បើ​ទោះបីជា​យ៉ាងណា​ក្តី សំណុំរឿង​ព្រហ្មទណ្ឌ​ឧក្រិដ្ឋ​មួយ​នេះ ជនសង្ស័យ​មិន​អាច​គេច​ផុត​ពី​ការ​ឃុំខ្លួន​ដាក់​ពន្ធនាគារ​ជា​បណ្តោះអាសន្ន​នោះ​ឡើយ​៕