ខេត្តបាត់ដំបង ៖ កាមេរ៉ាសុវត្ថិភាពបានបន្សល់ទុកនូវរូប«ចោរ» ដែលធ្វើសកម្មភាព«លួច-ឆក់» ជាបន្តបន្ទាប់ ស្ទើរគ្រប់កន្លែងកើតហេតុ ក្រោយប្រព្រឹត្តអំពើ«ចោរកម្ម» តែកម្លាំងសមត្ថកិច្ចហាក់មិនទាន់មានតម្រុយពីមុខសញ្ញាចោរលួច ចោរឆក់ទាំងនេះ ដែលហាក់នៅមានភាពកម្សោយចំពោះវិធានការទប់ស្កាត់…
ខេត្តបាត់ដំបង ៖ កាមេរ៉ាសុវត្ថិភាពបានបន្សល់ទុកនូវរូប«ចោរ» ដែលធ្វើសកម្មភាព«លួច-ឆក់» ជាបន្តបន្ទាប់ ស្ទើរគ្រប់កន្លែងកើតហេតុ ក្រោយប្រព្រឹត្តអំពើ«ចោរកម្ម» តែកម្លាំងសមត្ថកិច្ចហាក់មិនទាន់មានតម្រុយពីមុខសញ្ញាចោរលួច ចោរឆក់ទាំងនេះ ដែលហាក់នៅមានភាពកម្សោយចំពោះវិធានការទប់ស្កាត់ និងការស្រាវជ្រាវបង្ក្រាបបទល្មើសនេះ ។ រយៈពេលប៉ុន្មានថ្ងៃកន្លងទៅនេះ អំពើ«ចោរកម្ម» បានកើតឡើងជាបន្តបន្ទាប់គួរឲ្យបារម្ភ ។
ជាពិសេស បទល្មើស «ឆក់ លួច គាស់ទម្លុះទម្លាយ និងក្រុមក្មេងទំនើងដេញកាប់គ្នា ក្លាយទៅជាអំពើប្លន់» ដែលកន្លែងខ្លះរូបភាពនៃសកម្មភាពចោរបានបន្សល់ទុកនៅក្នុងកាមេរ៉ាសុវត្ថិភាព ដែលគេបានបំពាក់តាមលំនៅឋាន ឬតាមហាងលក់ទំនិញនានា នៅក្នុងក្រុងបាត់ដំបង ។ ជាក់ស្ដែងគ្រាន់តែរយៈពីរថ្ងៃ គឺថ្ងៃទី ១៣និង១៤ ឧសភា អំពើ«ឆក់ និង លួច» បានកើតឡើងជាច្រើនករណី ហើយកន្លែងកើតហេតុខ្លះ ត្រូវបានថតជាប់ដោយកាមេរ៉ាសុត្ធិភាពយ៉ាងច្បាស់ក្រឡែត នៅពេលជនល្មើសទាំងនោះធ្វើសកម្មភាព ។
នៅម៉ោងជាង១០ព្រឹកថ្ងៃទី ១៤ ឧសភា ចោរបានចូលលួចយកម៉ូតូមួយគ្រឿង នៅចំណុចឱសថស្ថាន «រស្មីពេជ្រ» ស្ថិតក្នុងភូមិដំណាក់ហ្លូង សង្កាត់វត្តគរ ក្រុងបាត់ដំបង។ ម៉ូតូដែលត្រូវចោរលួច ម៉ាកឃ្លីកពណ៌ស ពាក់ស្លាកលេខ បាត់ដំបង 1AI.8087 ម្ចាស់ម៉ូតូឈ្មោះ ឡេង ហ្វីលីពីន ប្រុសអាយុ២១ឆ្នាំ ធ្វើការនៅឪសថស្ថានខាងលើ។ កាមេរ៉ាសុវត្ថិភាពនៅក្បែរនោះ បានបង្ហាញរូបជនម្នាក់ស្លៀកពាក់ខ្មៅ ពាក់មួកកន្តិបនិងពាក់ម៉ាស់មុខ បានដើរកាត់ទីនោះ ដែលត្រូវគេសង្ស័យថា អាចជា «ជនសង្ស័យ» ចូលលួចយកម៉ូតូ។
បើតាមម្ចាស់ម៉ូតូបាននិយាយថា ខ្លួនបានជិះម៉ូតូទៅទុកក្បែរឱសថស្ថាន តែភ្លេចដកសោចេញពីម៉ូតូ។ ពេលនោះ ខ្លួនបានជិះម៉ូតូនៅកន្លែងធ្វើការចេញទៅក្រៅ លុះត្រឡប់មកវិញក៏បាត់ម៉ូតូ ហើយពេលឆែកកាមេរ៉ាសុវត្ថិភាព ស្រាប់តែឃើញបុរសម្នាក់ដើរមកសំដៅកន្លែងកើតហេតុ ទើបខ្លួនសង្ស័យថា បុរសនោះអាចជាជនដៃដល់លួចយកម៉ូតូខ្លួន ។ នៅវេលាទៀបភ្លឺ ថ្ងៃទី១៤ ឧសភា ដែរ ករណីចោរ«ឆក់ទូរស័ព្ទ» បានកើតឡើងនៅក្បែរស្ដុប២ធ្នូ ក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង។
បើតាមព័ត៌មានបឋម ជនបង្កមានគ្នាពីរនាក់ បានជិះម៉ូតូធ្វើសកម្មភាព«ឆក់»យកទូរស័ព្ទពីជនភេទទី៣ ម្នាក់ដែលកំពុងជិះម៉ូតូ រួចជនល្មើសជិះគេចខ្លួនដោយសុវត្ថិភាព ។ បើតាមប្រភពដដែល ជនសង្ស័យ និងជនរងគ្រោះ អាចជាមនុស្សស្គាល់គ្នាទៀតផង។ ដោយឡែក បើនិយាយពីអំពើ
«ចោរកម្ម» ដែលបានកើតឡើងនៅថ្ងៃទី១៣ ឧសភា វិញ ប្រភពបានផ្ដល់ព័ត៌មានថា ជនម្នាក់បានបង្ហាញពីសកម្មភាពចូល«លួចទ្រព្យសម្បត្តិ»នៅក្នុងហាងលក់ទំនិញមួយកន្លែង នៅចំណុចភូមិជ្រៃកោង សង្កាត់ស្លាកែត ក្រុងបាតដំបង។
សកម្មភាពជនសង្ស័យម្នាក់នេះ ត្រូវបានថតជាប់នៅក្នុងកាមេរ៉ាសុវត្ថិភាពរបស់ម្ចាស់ហាង។ នៅក្នុងកាមេរ៉ាសុវត្ថិភាពបានបង្ហាញភិនភាគ ជនសង្ស័យពាក់មួកកន្តិប កំពុងឈ្ងោកទាញថតតុ ឆែកឆេររករបស់មានតំលៃនៅក្នងហាងទំនិញ តែគេមិនទាន់ទទូលបានរបាយការណ៍ពីម្ចាស់ហាងអំពីការបាត់បង់ទ្រព្យសម្បត្តិនៅឡើយទេ ។ ក្រោយពីបទល្មើស«លួច»ខាងលើនេះ បានកើតឡើង ស្រាប់តែនៅរសៀលដដែល ជនសង្ស័យពីរនាក់ បានជិះម៉ូតូធ្វើសកម្មភាព«ឆក់កាបូប» ពីស្ត្រីម្នាក់ដែលកំពុងជិះម៉ូតូ ដល់ត្រង់ចំណុចភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។
បើតាមសេចក្ដីរាយការណ៍បានឲ្យដឹងថា ជនដៃដល់បានបាន«ឆក់យកកាបូបស្ពាយ» ពីស្ត្រីរងគ្រោះមិនបានសម្រេចទេ តែធ្វើឲ្យជនរងគ្រោះដូលម៉ូតូរងរបួសដៃ ជើង និង ផ្ទៃមុខ។ នេះជាអំពើ«ចោរកម្ម» ដែលកើតឡើងនៅក្នុងក្រុងបាត់ដំបង ត្រិមរយៈពេលពីរថ្ងៃ(១៣និង១៤ ០៥ ២៣)កន្លងទៅនេះ ខណៈបទល្មើសស្ទាក់កាប់មនុស្សតាមដងផ្លូវ និង កាប់កំទេចម៉ូតូ «ប្លន់យកស្លាកលេខ» បង្កឡើងដោយក្រុមចោរហារយ ដែលបម្លែងចេញពីក្រុមក្មេងទំនើង បានកើតឡើងជាបន្តបន្ទាប់កន្លងទៅនេះ នៅក្នុងខេត្តបាត់ដំបង។
ពាក់ព័ន្ធនឹងអំពើចោរកម្ម«ឆក់និងលួច» ដែលកើតឡើងប៉ុន្មានករណីខាងលើនេះ គេមិនទាន់ដឹងថា តើកម្លាំងសមត្ថកិច្ចបានធ្វើការស្រាវជ្រាវ កំណត់មុខសញ្ញាជនសង្ស័យបានខ្លះដែរ ឬ បែបណានោះទេ ? ប៉ុន្តែបើតាមប្រភពពីសមត្ថកិច្ចដែរ ទំនងគ្មានតម្រុយពីជនប្រព្រឹត្តទាំងប៉ុន្មានករណីខាងលើនេះ នៅឡើយទេ បើទោះជាជនសង្ស័យត្រូវបានបង្ហាញរូបរាងយ៉ាងច្បាស់ក្រឡែត នៅក្នុងកាមេរ៉ាសុវត្ថិភាពក្ដី ៕
ចែករំលែកព័តមាននេះ