ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា បានប្រកាសកាលពីយប់ថ្ងៃទី១ ឧសភា កន្លងមកថា ប្រតិបត្តិការរបស់អាមេរិកបានសម្លាប់មេដឹកនាំអាល់កៃដា អូសាម៉ា ប៊ីនឡាដេន នៅតំបន់មួយក្បែររដ្ឋធានីអ៊ិស្លាមម៉ាបាដ ប្រទេសប៉ាគីស្ថាន ហើយសពប៊ីនឡាដេន ត្រូវដឹកយកមកដាក់ក្នុងពន្ធនាគារមួយរបស់អាមេ
រិក ។ ជាមួយគ្នានេះ ប្រភពព័ត៌មានពីប្រទេសប៉ាគីស្ថានបានអះអាងបញ្ជាក់ថា ប៊ីនឡាដេន បានត្រូវសម្លាប់នៅក្នុងនិវេសនដ្ឋានរបស់ខ្លួននៅតំបន់ Abbottabad ជិតរដ្ឋធានីអ៊ីស្លាម៉ាបាដ។ ប្រភពព័ត៌មានដដែលឱ្យដឹងទៀតថា ប្រតិបត្តិការរបស់អាមេរិកនោះក៏បណ្តាលឱ្យស្លាប់យុវជនជាច្រើននាក់ទៀតផងដែរ ក្នុងនោះម្នាក់ជាកូនប្រុសរបស់ប៊ីនឡាដេន ។
ក្នុងសុន្ទរកថានេះដែលមិនធ្លាប់ធ្វើពីមុនមក លោកអូបាម៉ា បានលើកសរសើរការសម្លាប់មេដឹកនាំភេរវកម្មរូបនេះថា ជាសមិទ្ធផលដ៏សំខាន់បំផុតមួយ សម្រាប់កិច្ចខិតខំប្រឹងប្រែងរបស់អាមេរិក ដើម្បីកំចាត់មេដឹកនាំភេវកម្មរូបនេះ។
កាលពីព្រឹកថ្ងៃទី១ ឧសភា សហរដ្ឋអាមេរិក បានបើកប្រតិបត្តិការមួយប្រឆាំងទីតាំងមួយនៅតំបន់ Abbottabad ហើយក្រោយមកអះអាងបញ្ជាក់ថា មេដឹកនាំអាល់កៃដាអូសាម៉ា ប៊ីនឡាដេន ស្ថិតក្នុងចំណោមអ្នកស្លាប់ក្នុងប្រតិបត្តិការនេះ ។ នេះបើតាមការថ្លែងឱ្យដឹងដោយលោកប្រធានាធិបតីអូបាម៉ា ។
លោកអូបាម៉ា ថ្លែងថា ក្រោយពីលោកឡើងកាន់តំណែងប្រធានាធិបតីកាលពីឆ្នាំ២០០៩ មក លោកបានស្នើដល់នាយកទីភ្នាក់ងារចារកម្មកណ្តាលលោក Leon Panette ឱ្យតាមសម្លាប់ឬចាប់ខ្លួនអូសាម៉ា ប៊ីនឡាដេន ដែលនេះជាអាទិភាពមួយក្នុងសង្គ្រាមប្រឆាំងក្រុមអាល់កៃដា។ លោកប្រធានាធិបតីថ្លែងទៀតថា «នៅទីបញ្ចប់កាលពីសប្តាហ៍មុន ខ្ញុំបានកំណត់ថា យើងមានព័ត៌មានចារកម្មគ្រប់គ្រាន់ដើម្បីចាត់វិធានការហើយអនុញ្ញាតឱ្យបើកប្រតិបត្តិការដើម្បីតាមរកចាប់ខ្លួនប៊ីនឡាដេន យកមកកាត់ទោស» ។
លោកអូបាម៉ា ថ្លែងថា ក្រុមប្រតិបត្តិការតូចមួយបានធ្វើការវាយឆ្មក់ហើយបានសម្លាប់អូសាម៉ា ប៊ីនឡាដេន ដោយការបាញ់ប្រហារ ហើយគ្រប់គ្រងសពរបស់គេ ។ ក្នុងប្រតិបត្តិការនោះពុំបណ្តាលឱ្យជនជាតិអាមេរិករងរបួសទេ ។
ប្រតិបត្តិការដែលទទួលបានជោគជ័យនេះក៏ដោយសារមានកិច្ចខិតខំប្រឹងប្រែងប្រឆាំងភេរវកម្មពីប្រទេសប៉ាគីស្ថានដែរ ។
អូសាម៉ា ប៊ីនឡាដេន កើតនៅក្នុងប្រទេសអារ៉ាប៊ី សាអ៊ូឌីត នៅឆ្នាំ១៩៥៧ ជាមេដឹកនាំភេរវកម្មដ៏ល្បីនៅលើពិភពលោក ហើយជាអ្នកទទួលខុសត្រូវចំពោះការវាយប្រហារប្រឆាំងអាេមរិកជាបន្តបន្ទាប់ក្នុងនោះមានការវាយប្រហារភេរវកម្មថ្ងៃទី១១ កញ្ញា ឆ្នាំ២០០១ ដែលធ្វើឱ្យពិភពលោកមានការភ្ញាក់ផ្អើលយ៉ាងខ្លាំង ដោយការវាយប្រហារប្រើយន្តហោះប្រឆាំងអគារភ្លោះមជ្ឈមណ្ឌលពាណិជ្ជកម្មពិភពលោក WTC នៅក្នុងទីក្រុងញូវយ៉ក បណ្តាលឱ្យស្លាប់មនុស្សជិត៣.០០០នាក់ ។
ក្រោយពីទទួលបានព័ត៌មានថា អូសាម៉ា ប៊ីនឡាដេន ស្លាប់ភ្លាម ពលរដ្ឋអាមេរិកក្នុងចំនួនដ៏ច្រើនប្រមូលផ្តុំគ្នានៅបរិវេណមុខសេតវិមានដើម្បីសម្តែងក្តីរីករាយយ៉ាងខ្លាំង ។
កូនៗ៦នាក់ និងប្រពន្ធ២នាក់របស់ប៊ីនឡាដេន ត្រូវចាប់ខ្លួននៅប៉ាគីស្ថាន
ទូរទស្សន៍ក្នុងស្រុក Urdu របស់ប៉ាគីស្ថានបានដកស្រង់សម្តីប្រភពមួយដែលនិយាយថា កូនៗ៦នាក់ និងប្រពន្ធ២នាក់របស់អូសាម៉ា ប៊ីនឡាដេន ត្រូវបានចាប់ខ្លួនរួមជាមួយមិត្តភក្តិជិតស្និទ្ធរបស់ប៊ីនឡាដេន ៤នាក់ទៀតនៅក្នុងប្រតិបត្តិការស្រាវជ្រាវកាលពីព្រឹកថ្ងៃទី២ ឧសភា ដោយកងកម្លាំងប៉ាគីស្ថាន នៅតំបន់ភ្នំមានចម្ងាយប្រមាណ៦០គីឡូម៉ែត្រភាគខាងជើងរដ្ឋធានីអ៊ិស្លាម៉ាបាដ ៕
ចែករំលែកព័តមាននេះ